يا شاري النصيحه

بسم الله نبدأ وبه نستعين ..
كان يا ما كان في قديم الزمان رجل من أهل نجد (( وبداءت القصة بلهجة الراوي حفاظاً على حقوق النقل ))
راح من أهله يدور الظمايم {يبحث عن عمل } ويبي يطلع على مراجله .. ورح ورح ورح وليا أهل هاك الركايب حادرين نية فلسطين ( الله يفك أسرها من أيدي الطغاة ) ويعانقهم ومعهم ومعهم وهناك وهناك ويوم جاله ثلاث طعش ليله ولياهو باللد ( اللد: مدينة فلسطينية ) ويسل روحه منهم بالليل علشان ما يعرفون دربه وليا هاك العود يروسله على شجر زيتون ومعهن نوع من الفقوهات !!!! الاخرى سلام .. عليكم السلام شو بدك خيوه لاهان ؟.. والله ياعميمي مدري وش تقول لاكان أنا رجال أدور الظمايم وتراي عصاك اللي ما تعصاك .. آه ولك إفهمت بدك شغل أبشر موجود آني وخالتك أم سمير ما عدنا سوى هاي المزرعه ومحتاجينك معانا نرسلك لعند الفران وتسقي لنا البستان وزي مانتا شايف وحديك كل سنه ( إمية ليره ) شو عم بتقول ؟ .. أنا والله ما أعرف سلمكم هو وش يسوى ( يقصد عملتهم ) لاكان تراي موافق .. إمليح ما قلت أللي شو إسمك ؟ . اسمي أسمي طرقي ( يخسى ) بس ما يخلون اللكاعه ..
وتروح السنين ويوم جاله ثلاث سنين قال يا عمي أبا أدور أهلي أنا رجال حصلت خير وانتم ما قصرتم وعلمكم غانم وابي السموحه وان كان بالعمر مدد يمكن إني أرودكم ( يعني أزوركم ) وياخذ حلاله ولاله عن مناخة البل يبي لين ينشط السوق ويشري له رحول يروح عليها لاهله .. ومتوسدن عباته بقاعة هاك الجدار وليا المصوت .. ( ياشار النصيحه .. ياشار النصيح ) وليا منول النصيحه تشرى شراء .. بكم .. بكم ؟؟ قال بـ100 ليره والرجاجيل ينفهقون .. وهو يقوم من محله قال شريت قال [[ العين وما تهوى والقلب وما يود ]] ويضحكون عليه اللي عنده إنا لله وإنا إليه راجعون وهذي نصيحته لك ضحك عليك واخذ قريشاتك .. رجع الرجال وتوسد عباته بمحله ورقد .. ويوم جى من بكره وليا المصوت ( ياشار النصيحه ياشار النصيحه ) وقم يمه وليا خويه اللي أمس قال انت تبي تضحك علي مثل أمس قال أنا ما أجبرتك أنا رجال بياع وسلعتي ماشيه أنت والا غيرك قال شريت قال [[ خان الله من يخون آمنه ]] {{ ولي عليها تحفظ لأن الله سبحانه وتعالى لا يخون }} ولكن أمانة النقل تتطلب ذلك وهم يقصدون أن يسلط عليه من يخونه .. نعود للموضوع والنهار الثالث وهو جالسن يحتري الناس يحملون يبي يخاويهم مامعه فلوس تجيب له رحول .. ويجي الرجال (ياشار النصيحه ياشار النصيحه) وقم يمه قال أنا لها لاصار مابينك وبين الفقر إلا جدار هدّه حيصول ثلاث سنين أخذهن راعي هالنصايح بثلاث أيام .. [[ قال حط الرخا من بالك وليا وافقك الخير وافقه]] وارجع بقاعة جداره ونهار رابع وليا المصوت .. ياهل نجد ياهل نجد الرجال الدليله الأمين اللي يشوف بنفسه مسد يجي للوالي . قام قال يالله إنها عليك هذا أول الخير ويخوي المصوت ويوم جى عند الوالي قال له بنتي تبي تحج ومعها خدمها وحشمها ونبي دليله فقط ورجال أمين يصير مسئول عن الحمله من هنا حتى العوده .. وبسم الله ويركبون وهناك وهناك ويوم جوا على هاك الماء وليا هم ضمياء ولا قريبهم ماء غيره ـ وينزلون يبي يروون ويتغدون ويروح منهم اثنين للماء ويوم أخذوا وليا واحد منهم جاي يصيح أبك علامك قال خويي نزل يروي ويوم طلعت الدلو وليا راسه بها مقطوع .. أبك (تس يف) كيف قال هالعلم ويروحون ثلاثه ويقطع راس واحدن منهم ويجون معودين وعلمونهم قال أنا لها أنا هالمره



يبي يتميدح عند عمته ورح هو وثلاثة معه ويحول لحاله بالبير ويوم جاء وليا العلم اللي هو ما يبي وليا هاك الرجال الاسود الأكبد اللي مالين نص الماء وليا على أيمنه حرمة مثله بالتواصيف وعلى أيسره حرمة ثانية شقراء ورقبتها تجي ذراع ـ والله وتغدي عشره أربع .. سلام .. عليكم السلام وش أنت ياولد ووش تبي قال حنا حجيج ونبي نروي وغديت على اخويانا سو أنت وحريمك أنت وش قصتك ووش تبي منا قال أنا عندي سؤال إن أجبت عليه صح سلمت ورويت قربك وان أخطيت .. دربك درب أخوياك قال أجل تسمح لي أطلع قال هذاك أمس أنا ما جيتك أنت اللي جاي برجلك .. يالاجودي قال لوني أجودي ما هذا محلي قال تدري أسأل يمكن الله يفهمني وأحل لغزك قال ( أي ها الحرمتين أزين ) وللي من بلشه إن قال الشقراء طار راسه وان قال السودا كذب وممكن فيها جدعة راس بعد .. ويداير الافكار وش الحيلة وش السواه ياولد أغديك تعفيني قال ماهنا ماهنا عجِّل والله ويتذكر النصايح اللي هو شرى بحليله قال إن ما نفعتني بهالموقف متى تنفعني .. قال [[ العين وما تهوى والقلب وما يود ]] قال سلمت وسلمك الله وهو يتنحى عن الماء ويخليه يروي قربه ولا دروا اخوياه إلا وهو يهز الرشا لهم ويوم جذبوا الحبل وليا القربه مليانه والثانيه والاخرى وهذيك لين قضوا ويطلعونه .. يا ولد وش العلم قال شربتوا ولالكم إباقي الامور توكلوا على الله .. ويسرون وهناك هناك ويوم قربوا للمحرم بليلة من الليالي وهم يمرحون وتناديه عمته قالت أنا ذاله وابيك تبني خيمتك بجنب خيمتي قال إهدا ويوم أمرحوا وكل عينن شربت بللها وليا الذرا اللي من يمها يوم ارتفع ولياهي هي وهي تطايمه يمره عيني خير حنا حجيج وانتي وداعة معي وانا ما أخون الامانه قالت حنا مقبلين على خير ونستغفر ونتوب وليا والله( أخو مرّه يوم غز ذنبه عندهم ) عندك فرصه بنت الوالي ومزيونه وبس ها لمريره وتتوب والحج يكفر ما قبله .. ويقوم الحق والباطل يتصارعون داخله قال تدرين خليني أبا أطلع أقضي الحاجه واجي .. واطلع ويتذكر النصيحه [[ خان الله من يخون آمنه ]] والله وينتصر الحق ورح وارقد بحدى الخيام لين أصبح وهم يمشون ويفكه الله .. حجوا وأنكفوا لاهلهم ويوم أقبلوا على أهلهم بليله أو ليلتين وهي تناديه قالت خذ هالخط ولا تمرح إلا معطيه أبوي وبشره إنا ما حنا بعيد , قال إهدا وخذ الخط ويلث مطيته وعندك عندك ويوم حول مع هاك الجال عقب الظهر وليا البيوت قدامه قال أبا أمر ها القطين إن وافقت غدا والا شربت ومشيت ويوم جاهم ياهلا يالله حيه منين ووين ويعلمهم بالقصه ويتقهوا ويوم بغى يمشي ويقوم راع البيت ويحلف عليه قال غدانا ما هو رييض حط الرخا من بالك قال هاك الشايب بطويل المجلس ياولد [[ لا وافقك الخير وافقه ]] قال سمع وطاعه لأنه تذكر النصيحه الثالثه اللي حتت تالي الدريهمات ..
وينقز هاك المقرود قال أنا ماني مشتهي غداكم ومستعجل وأبا أمر الوالي وابشره قال تدري دوك الخط وعطهيه ويوم تغدى واللي عليه بالخير واركب ذلوله قال أبا أمر عمي أبو سمير واسلم عليه وليا طمعت إنهم وصولوا رحت للوالي وسلمت عليه .. ويوم جاء وليا المقرود اللي فقع أولا يرفس بدمه .. هذا وش علمه قال حقه وما جاه .. قال يستاهل والله ويقلطه الوالي ويعطيه شرهته ويهبب ريحه ويعرض عليه إنه يزوجه خويته ـ قال مقبولة موفوره والله ياطويل العمر قربكم يشرى شراء .. ويوم اصبح وهو يستاذنه بالممشى وقم يالوالي وحمله بالارزاق والخيرات ويعطيه ثلاث من الجيش .. وجيتك من عنده وهو مسندن يم نجد يدور أهله ..
عسى أكون آنستكم بهذه القصه رغم طولها الممل ..

(( سبحانك اللهم وبحمدك .. أشهد أن لا إله إلا أنت .. أستغفرك وأتوب إليك ))

اكمل لافض فوك ياالراوي

القصة اكثر من رائعة وفيها من الحكم الشي الكثير

واجمل مافي القصة انك تكتبها من ذاكرتك ولم تنقلها من احد المنتديات وجملها اسلوبك الجميل الذي تعودناه منك دائماً

عساك بالوجود ولاتحرمنا من مثل هذه القصص الرائعة نحن نتابع

f15
الفريدي (يوسف )
أشكركما على المرور والتعليق وأرجو أن تنال إعجابكم وبقية الزملاء ..

ابو عبدالله قصة رائعة فعلا وفيها من الحكم الشئ الكثير
سلمت ودمت وبارك الله فيك وبالاخ الراوي
لكن السؤال ليش المسكين قتلوه اكيد الرسالة فيها شي

مشكور على القصة والرسالة تقول اقطعو راس حملها والقصة قديمة وكل واحد يرويها بشكل مشكور مرة اخرى وفي انتضار ك

السؤال ليش المسكين قتلوه اكيد الرسالة فيها شي ؟ .

حياك الله أخوي أبو محمد وشرف لي مروركم على القصة : أما سؤالك فإجابته هي :

ما تقول الله يجيرك من النار والصواديف القشر إن ( زليخه خافت إنه يعلم أبوها باللي صار ) أو ( تريد الانتقام منه ) لإنه لم يلبي رغبتها والرساله كانت معك يا قايد الرحله لكن بقدرة قادر ودنو أجل هاك المقرود دبره الله .

أخوي f15 حياك الله مرة أخرى وبالنسبه للقصه أنا ذكرت أنها في كان ياماكان ـ وما شهدنا إلا بما سمعنا .. وأمانة النقل تتطلب المحافظة على الموروث .. بورك فيك وعوفيت ..

يا ابن مخيمر انها قصه رائعه

وتسلم ايديك على النقل

سلمت لنا يا ذيبان يارع الحصان والدلال الرسلان