أسبق من الصوت وأمضى من السيف الشطير= سالم جخير

الله انـك تستـر الحـال وتـعـز الفقـيـر=يا معين الصابر اللـي علـي الشـدة صبـر
يا مغيـث المستغيـث ومجيـر المستجيـر=مـن عذابـك مالنـا لا مكـان ولا مـفـر
جعل تسقى قبـور الاجـداد بالوبـل الغزيـر=وتصبح القيعان من حولهـا عشـب وزهـر
يوم كـان النـاس للنـاس والدنيـا بخيـر=والبـدو منهاجهـم غيـر منهـاج الحضـر
ويوم كانـت شبـت النـار فالثلـث الأخيـر=والـدلال الصفـر والنجـر وبيـوت الشعـر
يا وجودي وجد شيخن قضى عمـره كسيـر=لابـرى جرحـه وكسـره جبـر ولا جـبـر
كان قايد جيش والمـوت لامـن جـا يغيـر=ايتحـزم للثـنـادي وضـربـه فالـصـدر
لين جاته ضربة الغـدر مـن كـف الحقيـر=سـود الله وجـه راع الخيـانـة والـغـدر
وين ابلقى لي رفيقن علـى الشـده نصيـر=لا نخيتـه صـار زبـده مثـل زبـد البحـر
لا تعـزوى سـل سيفـه وطلـوح بالجفيـر=وقال ويـن؟ وقلـت لعيـون بـراق النحـر
راكب للـي كـن جنحانهـا جنحـان طيـر=كنهـا حـزن تعلـى عـن القـاع وشهـر
أسبق من الصوت وأمضى من السيف الشطير=وأسبق من السمع وأبعد من حـدود النظـر
وأثقل امن طويق وأخف مـن حـب الشعيـر=اللطف امن الورد وأقسى شوي من الصخر
شوفها غير وركوبن علـى الكشنـات غيـر=ولا بغيت الجـد كنـك تمشـي فـي قصـر
ليت عبـاس ال فرنـاس شاهدهـا عصيـر=كان مـا خاطـر بنفسـه وحـاول وانتحـر
لا استدارت كـن ذا الكـون كلـه يستديـر=ولا استقامت تسحر عيـون وقلـوب البشـر
ولا اعلن الكبتـن وقـال استعـدوا للمطيـر=شلعت في رمشـة العيـن وبلمـح البصـر
من ديـار العـز والطيـب والخيـر الكثيـر=نطلقنا مـن الكويـت وهبطنـا فـي قطـر
جيت من واقع محبه ومـن قلـب وضميـر=لجل عيـن اللـي غلاهـا تمكـن واستقـر
فـي شرايينـي وقلبـي وفكـري والنظيـر=كل مـا طولـت عنهـا يجـي دمـي فقـر
واتفقنـا فالمحـبـة وتقـريـر المصـيـر=واختلفنـا فـي المبـادي ووجهـات النظـر
ما هقيـت ان المحبـة تبـي دهنـات سيـر=لين قالت ويش ابي فيـك يـا وجـه الفقـر
كان تبغيني على طـول يـا سالـم جخيـر=لا تعـزوى بالعـذارى وحسكـات الـوبـر
خيـلا الحرشـا بصوتـن يشيـب بالغريـر=ارس يا قلـب المعنـى ووقـف يـا شعـر
واهني إلـى مـن الحـب قلبـه مستخيـر=ما اشتعل قلبه من الحب لين اصبـح جمـر
والمحبـة تشعـل القلـب نبضـات وسعيـر=كلهـا حـزن ومعانـاة واشـواق وسهـر
والمحبة كنها الحـزن فـي وجـه الاسيـر=لاقضي صبـره ودمعـه علـى خـده حـدر
والمحبـة كنهـا العلـم فـي وجـه النذيـر=لا ارتفـع صوتـه ودقـت مزاميـر الخطـر
المحبة حمـل والحمـل فـي ظهـر البعيـر=والبعير شعيـل يـا امـا رغـى ولا هـدر
والمجـرب فـي المحبـة يسمونـه خبيـر=يستشيرونـه ويعطـي مواعـيـظ وعـبـر
وان ذكرت العلم الأول بقـى العلـم الاخيـر=حالفن ممشي ورى النفس والقلـب الخضـر