الرد على ابن فطيس من الشاعرين خلف وابراهيم

بسم الله الرحمن الرحيم


السلام عليكم ورحمة الله وبركاته




شاعر كان له وجهين وبئس الوجهين !!


الشاعر / محمد بن فطيس عند حظوره لشاعرالمليون في نسخته الثانيه أنسحب من المنافسه ولكنه ألقى قصيده تأولت إلى ملايرضاه الشعر

فـ بين الابيات اساء للجمهور والشعراء وخص الشعراء السعوديين !!


اساء لـ الشاعر / عيضه السفياني الثقفي :

واليوم لاوالله شفت القاف شاب=صار الشعر كورة وكلً له فر يق

بيت مكشوف وموجه لـ الشاعر عيضه السفياني الثقفي , عندما مدح الهلال السعودي باحد قصائده



وحتى الشاعر المتواضع والكبير في شعره وحضوره / ناصر الفراعنه السبيعي لم يسلم منه :

إلا الرجال اللي قصايدهم عذاب=اللي لها معنى بها حس ٍ رقيق
لاتشعل الفتنة ولاتطرد سراب=ولايرقـّع مانقصها بالزعيق


,,,,

وكذالك الشاعر / خلف مشعان العنزي وجهها له صريحه ؟ رغم ان خلف المشعان وجه له بيت من نوع التحدي الذي لايبغض ابدا ً بل يجبر الاخر على مجاراته واحترامه :

الذيب كانه ذيب يدرع فالذياب=يخلي الخرفان للضبع العويق



( حيث كان رد على بيت في قصيده سابقه لـ الشاعر خلف المشعان /
إيه الشجاعة تغلب الكثرة وانا اعطيك الدليل ** الذيب يدرع بالغنم ولا يحسب حسابها )


,,,

وهنا لم يسلم منه الجمهور /

بس العرب ماعاد تدري بالصواب=ماميّزوا ويش الزفير من الشهيق


!!!!!


وهذه قصيده محمد بن فطيس كامله /

العام خذت البيرق وصدت العقاب=يوم الرجال حلوقها من دون ريق
أسرجت شعري والجماهير الزهاب=وإسنادي بلاد وولد عم ورفيق
وحوّلت فالوادي وهو دونه ضباب=مدري ورى الوادي مطر ولاّ حريق
كم فارس وده يحوّل غير هاب=يستوحش الماخوذ لاشاف المضيق
أقدمت والفرسان ترتاب وتهاب=أجرّي الهيـّاب وأجرّ الطريق
ومثـّلت داري بالقصيد وبالجناب=من الشمال إلى العديد إلى العريق
ترابها بالحسّ ماحسّه تراب=وحزومها تسوى الزمرد والعقيق
ومثـّلت راية من تلين إله الرقاب=صليب راي وكفو وحجاجه طليق
ممشاه للعليا ذهاب بلا إياب=الشيخ ابو مشعل حمد علمً دقيق
ومثـّلت كل الشعب من شايب وشاب=بدو وحضر تاريخنا عزً عريق
ومثـّلت ربعً فالوغى مخلب وناب=مريّـةً تاريخنا ماهو لفيـق
حن مزبن اللي لايجار ولايثاب=وحن فزعة اللي ذودهم راحت وثيق
أقدامنا جبال وعمايمنا السحاب=وأمجادنا تشبه سهيل إلها بريق
ومثـّلت يام بكبرها والإنتساب=إلى بني همدان نجمً له شعيق
الله خلقنا سيلاً متونه هضاب=كل السدود يحطها حبً دقيق
شاركت متوكل على منشي الحقاب=وحزامي من الشعر والعدّة يضيق
وطرقت بيبان القواقي باب باب=وقدّمت ماشفتوا جميع إنه يليق
وحشمت أذانيكم عن سقاط الخطاب=ورقيت بأيديكم على قمة طويق
وعدت داري بالفخر قبل الكتاب=ووفيت بأمر الله بالعهد الوثيق
وسترت بأفعالي مزينـّة الخضاب=وقهرت عدواني ونومست الرفيق
ولطم بعيري شوط واحد للركاب=يقوم راس وينتهي ماهو زريق
ومن كف ابو خالد تسلمت النصاب=من كف من عينه على القمة تويق
شيخ يروم المجد ويروم الصعاب=خلـّى الشعر من نومة الغفلة يفيق
واليوم لاوالله شفت القاف شاب=صار الشعر كورة وكلً له فر يق
وضاع الهدد بين الحديا والغراب=وضاع الصهيل مكرّمين من النهيق
إلا الرجال اللي قصايدهم عذاب=اللي لها معنى بها حسً رقيق
لاتشعل الفتنة ولاتطرد سراب=ولايرقـّع مانقصها بالزعيق
بس العرب ماعاد تدري بالصواب=ماميّزوا ويش الزفير من الشهيق
من جاب ضيعة قيل شوفوا ويش جاب=انا اشهد انه جاب له معنى عميق
الذيب كانه ذيب يدرع فالذياب=يخلي الخرفان للضبع العويق
ماجيت انافس جيت دعماً للشباب=وفوزي دمه عاده على القمة يريق

====


ولكن أشفى الغليل الشاعر الكبير / خلف المشعان العنزي برد من العيار الثقيل


( وكالة يقولون )

مانيـب مـن ياتـي علـى شـان يـدرون=أنــا الــذي يــدرون بــه قـبــل يـاتــي
نجمي سطع من غيـر بيـرق ومليـون=قلـيـل فــي جـيـلـي يـســوي سـواتــي
ماجـيـت أهـايـط بــس لازم تـعـرفـون=مازعزعـت بـعـض السـوالـف ثبـاتـي
لـو شلـت فـي قلبـي مثـل مايشيـلـون=ماكانـت الطيـبـة مــن ابــرز صفـاتـي
يامحمد ابن فطيس وش فيك مشحون=ماخطيـت يـوم انــي حسبـتـك لقـاتـي
اب اطفي الفتنه وابي انشدك وشلـون=اسلـم مـن الضيـعـه واجـمـع شتـاتـي
الناس معها عقل ، ولسان ، وعيـون=وقـدامـهـم كـزيــت يــمــك وصاتي
ماجيتـك ببـيـت مــع الشـعـر مـدفـون=جيـتـك عـلـى وضــح النـقـا ياغنـاتـي
ماني من اللي في قفا النـاس يحكـون=عيـب عـلـى الـحـق خـويـي حصـاتـي
الـلــي لـيــا قـفـيـت عـنـهـم يـهــدون=مـاهــم بـكـفـو لـرجـعـتـي والـتـفـاتـي
سكـرت اذانـي عــن وكـالـة يقـولـون=وذكــرت لــي بـيـت يـفـسـر سـكـاتـي
الله يجـيـبـك مـــن بـعـيــد الــيــا دون=والله يـحـطـك بـالـلـقـا مــــن تــلاتــي

وهذا رد آخر لـ الشاعر ابراهيم خليل العنزي رد على ابن فطيس .. ( نوت المذكوره في القصيده بنت خلف المشعان )

ارسلت لبن فطيس صوط من عذاب=وسميتها لعيـون نـوت المنجنيـق
ماني وانا ابراهيم دكاك الصعـاب=ان مارشقتك في قطـرك ولا تفيـق
هذا مع اني مكنسل بيـوت العقـاب=ادري تليق اشياء واشيـاء ماتليـق
اخطيت في بيتك وجنبت الصـواب=اثرك طلعت بشنق من جنب الطريق
والذيب ماعمره درع وابك بذيـاب=كحلتهـا واعميتهـا ورب العتيـق
ياقشر لاطاح الرجل طيح الذبـاب=يستبدل اللي تكرمون عن الرحيـق
والله لو ماخفت من يـوم الحسـاب=لاعطيك بيت يورث بقلبك حريـق
النبح يابن فطيس ماضر السحـاب=وايه الفلز يغار مـن قـدر العقيـق
يكفيك يابن فطيس سوط من عـذاب=سميتهـا لعيـون نـوت المنجنيـق

وسلامتكم

متعب بن نومان
تسلم على طرح هذا الموضوع وبأسلوب سرد جميل ..
ويستحق ابن فطيس الذي ارتضى بنفسه ان يهوي الى القاع بعد ان كان نجما يتلألأ .
تقبل مروري وتقديري

فارس الحرف

مشكور على الجهد

الله يسلمك فارس الحرف

بلاشك هذا لايفقده شاعريته رغم أنه افقده نصف جمهوره !!

شاكر لتواجدك

أهلا ً هلا نازف الحرف



شاكر لتواجدك

مشكور اخوي /متعب النومان
وابن فطيس باقي في قلوب محبيه وكلن يفسر البيت على حسب نظرته الشعريه المحدوده او الا محدوده

حياك الهاوي

وشاكر لتواجدك

مشكور على النقل المتميز امتعتنا كثيرا

الله يسلمك سفير المدينه


شاكر لتواجدك

متعب لا هنت

والله فعلاً خطاء ابن فطيس واضح على خلف المشعان

لكن خلف أثبت أنه رجل بكل ما تحمل الكلمة من معنى

ماجيتك ببيت مـع الشعـر مدفـون
جيتك على وضـح النقـا ياغناتـي

كفو يا ابن وايل كفو ومليون كفو

أحترم والله شجاعتك ووضوحك وتحديك ،، كفو والله أنك كبرت بعيني .

عساك تدوم بعز ومعزة

ولا هنت متعب على الموضوع الأكثر من رائع