يابو( هبه ) وضّح حروف الطباعه......... للشاعر حمود العويني

أبدع الشاعر الكبير / حمود العويني بالوفاء لصاحبه
( مجدي ) ذلك الرجل الذي لا يستغني أبو ناصر عن طباعته
لقصائده حتى جعل منه متذوقا للشعر النبطي تلاحظ ذلك بقلة
أخطائه في الطباعة رغم صعوبة اللهجة عليه ولكن تدرب
حتى حصل على رضاء أبو ناصر مما جعله يسند عليه بهذه
القصيدة الرائعة جعل مقدمتها ثناءً على الكاتب واسترسل لينظم
لنا درراً في مشكلة اجتماعيه لا يكاد يخلوا منها مجتمعاً في هذا
العصر أترككم مع رائعة شاعرنا / حمود العويني .

يابو( هبه ) وضّح حروف الطباعه=خل المعاني تستقيم بسنعها
لعل قلبك ماتجيه الاشاعه=وعسى عيونك ماتشكّى وجعها
تراك عندي من خيار الجماعه=لو أنت من ناسٍ بعيد نجعها
لاتنتقدني يوم أجي كل ساعه=النفس ماتصبر بليا ولعها
خلك وديع اليا عطيت الوداعه=الناس كشف أسرارها ما رفعها
عز الله انك حر ما أنت برعاعه=واميزٍ نفسك حلاوة ورعها
أمّجدٍ ( مجدي ) فعايل ذراعه=يقطع رجالٍ فعلها ما نفعها
عنده تفوق بالذكاء والبراعه=ذربٍ حميدات المزايا جمعها
يامجدي اكتب لي بيوتٍ مذاعه=عجّل ترا نفسي سريعٍ جزعها
الله من غيضٍ سريع اندفاعه=من غلطةٍ هراجها مامنعها
ان جيت ابينها طويلٍ نزاعه=وان جيت ابخفيها خبيثٍ وجعها
ولو اعتزي ماهي بقد الشجاعه=وينقد علي العارفه لاسمعها
مع النشاما ناقصٍ وزن صاعه=همه عروض الغافلين ابتلعها
عساه بالدنيا سريع امزاعه=سود الليالي تبتليه بشنعها
وبالاخره ياعل ماله شفاعه=ساعة حضور الخلق في مجتمعها
ياناصر المظلوم وانته دفاعه=يا راعي الفزعات عجّل فزعها
كثير ناس اليوم عدوان قاعه=الحسحسه والكذب هاذي سلعها
تبلش بهم لو انت راعي وقاعه=ترمي على ريح النميمه ذرعها
ومن صار به خوفٍ من الله وطاعه=طبيعته ماتجتمع مع طبعها
والعبد بالدنيا حياته زراعه=وكلٍ يحصد الحبه اللي زرعها