بيني وبين اخي مبارك بن حديد

اهداء خاص واعتذار لاخي الحبيب / مبارك بن ناصر بن حديد بعد تأخري عن زيارته
اثناء الازمه التي مر بها وتجاوزها ولله الحمد والمنه
جعلها الله عافية وصحة دائمه على ابو ناصر
........

سلام يا راس ٍ على الطيب ما لنت=علك يابو ناصر من الشر ماجور
طهور وتمحيص ٍ من الذنب لاهنت=وسلامة ٍ تبقى بها سنين ودهور
يا ثابت ٍ على الوفاء ما تلونت=ورثت مجدك من رجال ٍ لهم دور
ابا اعتذر يومي بحقك تهاونت=وكانك قبلت العذر تقدر ومشكور
باسباب تقصيري بركت وتوهنت=وان ما انقبل عذري متى كنت معذور
ومهما حصل تبقى لنا انت هو انت=قلب ٍ كبير وياسع قلوب وصدور
ويا مسندي والله مهما تمعنت=الكامل الله والمخاليق بقصور

وهذا رد اخي ابو ناصر :
اخي ابو عبد العزيزارسل اليك هذه الابيات رداً على ابياتك التي عبرت بها
لنا عن شعورك النبيل الوفي حينما حصل لي العارض الصحي ، عافاك الله من
كل مكروه ولك تقديري واحترامي والسلام
..............

بديت باسم اللي به ايقنت وآمنت=علاّم مايخفى وما كان منشور
وفيه استعنت ومومن ٍ فيه وايقنت=في قدرة الخالق منجّي هل الغور
ومن بعد ذا ياللي بالاعذار عنونت=رسالة ٍ كملتها ما بها قصور
معذور ياللي بالمعاني تمكنت=وعسى حياتك كلها افراح وسرور
وانا مقدّر وانت وافي وثمّنت=لك ياخلف عذرك وماضيك مخبور
انته هو انته ماتغيّر وبرهنت=وافي مع الوافي وبالطيب مذكور
وختامها بازكى تحياتي اعلنت=شكري وتقديري لك بعدة سطور

.............................
وسلامتكم

صح لسان الشاعرين العلمين من شعراء عيال راشد
وهكذا الوفاء واريحية النفس وقبول العذر برضاء تام
وحفظ تاريخ الماضي من علوم طيبه وتستاهل الثناء
يبو عبدالعزيز لاعدمنك شاعر وافي ومواقفك رائعة
دائما مع الجميع ...
وابو ناصر مبارك بن حديد علم من اعلام القبيلة
نسال الله تعالى ان يمد بعمره على الطاعة
ويبارك لنا في وجوده
لاهنت ياعندليب المجالس على هذا النقل الجميل ............

حصان المجالس
مشيك عدْواً وعدوَك تحليقاً وحروفك درراً
تتبعت خطاك في هذا اليوم الماطر المبارك فوجدت غيثاً إثر غيث !!
سَبْقُك وكلماتك دائماً هي اضافة وافية لمواضيعي
اشكرك من الاعماق على هذا البوح الاخوي
ودمت لاخيك نبعا لاينضب ونجماً لايُطلب
لاهنت لاهنت

الفريد كل ماسمعت قصيده ولاهي أجمل من اللي قبلها شاعر اسميك

مهندس القافيه لله درك على مشاعرك وصادق أحساسك الاخويه

الصادقه اتجاه رجل يستاهل مثل مبارك بن حديد غني عن التعريف

الله يتم عليه عافيته ويلبسه ثوب العافيه ولاهو غريب هذا الرد من شخصه

الكريم شاعرعذب المشاعرسلس المعنى

ابو عمر
مع مانعانيه وتعانيه من قحط هنا ، سواء في المشاركات او الردود ،
الا ان الصبر يوصل الى القدْر !!!!!!!!
اشكرك على مرورك وهذه الكلمات الاخويه العذبه
وحفظ الله ابو ناصر ، فهو كما ذكرت وتفضلت به
دمت لاخيك سنداً
---------

صح لسان الشاعرين وبيض الله وجيهكم

نواف الفريدي
وانت صح بدنك وبيض الله وجهك
اشكرك لاهنت

الفريد وبن حديد
أو الله الجزاله بالشعر او الله حكر المعنى او الله التفرد الجميع كفو بغير قصور بعيال راشد لكن أبو عبد العزيز وأبو ناصر شعرهم وافى تستمتع بقراءته وبسماعه
اخوى ابو عبد العزيز تقبل مرورى وتحياتي
تحياتي للجميع

المشاركة الأصلية كتبت بواسطة غازى بن عجاب أبوزوايد

الفريد وبن حديد
أو الله الجزاله بالشعر او الله حكر المعنى او الله التفرد الجميع كفو بغير قصور بعيال راشد لكن أبو عبد العزيز وأبو ناصر شعرهم وافى تستمتع بقراءته وبسماعه
اخوى ابو عبد العزيز تقبل مرورى وتحياتي
تحياتي للجميع

ماعليك زود ياكحيلان
وشهادة من قامة عاليه في فنون الشعر كابي فيصل لاشك انها وسام على الصدر
لك مني ومن اخي ابو ناصر كل تحية وتقدير على هذه الكلمات الاخوية الكريمه
لاهنت لاهنت
.....................

ترفع ترحيبا بالشاعر مبارك بن حديد