ثلاثية ملتقى كبد القصيم

خلال الفتره من 26/2 الى 5/3/1429هـ قامت لجنة التنمية الاجتماعية الاهلية
في بلدة كبد ممثلة برئيسها الاستاذ / حديد بن محمد بن حديد الفريدي وبإشراف مركز
التنمية الاجتماعية بالقصيم بإقامة فعاليات :
( ملتقى الربيع في كبد القصيم _ تفاؤل وتواصل وترفيه وتثقيف وتكريم )
وكان لي شرف الحضور والمشاركه بدعوة كريمة من اخي حديد وقد شاركت بهذه
القصائد الثلاث ، الاولى وفاء لوالدنا الشيخ محمد بن حديد باني البلده ونجله اخي
وصديقي فالح بن محمد ساعد والده الايمن رحمهما الله رحمة واسعه
والثانيه في الافتتاح والاخيره في الختام راجياً ان اكون قد اديت بعض الواجب :
.........................
(( وفاء ))

مرحوم ياشيخ ٍ ولو غاب موجود=شيخ ٍ مناهج سيرته مستقيمه
الشيخ ابو فالح بالافعال محمود=اللي على فرقاه -كبده- سقيمه
شيخ ٍ بنى دار ٍ له اركان وحدود=بالصبر والاصرار واقوى عزيمه
ومرحوم يافالح فتى الطيب والجود=يمين ابوه ومستشاره ...نديمه
النادر اللي ما وطا درب منقود=دين ورجوله...والطبايع كريمه
عسى السحاب اليا اختلط برق ورعود=يمطر على القبرين..ويصير ديمه
ولا مات من عقّب صناديد وفهود= عقّب شغاميم ٍ تسد الثليمه

..............
(( صواري الحب ))

الكاف.. كلي جيتكم حب واشواق=الله يهوّن لهفتي ..واندفاعي
والباء.. بدعت القاف رايق ومشتاق=وعلى صواري الحب رفرف شراعي
والدّا...دليلي نابض ٍ جوف الاعماق=قلب ٍ يعبّر عنه.. نزف اليراعي
كبد...ومكانة كبد في وسط الاحداق=كبد القصيم.. اللي تمد الذراعي
لضيوفها الغالين والحب دفاق=حبّ ٍ اهلها ...يعلنونه جماعي
والليله الفرحه لها اشكال وارناق=واللي يزينها ..جميل المساعي
والملتقى ساسه على خير واشراق=فكره وتنفيذ ..ومكان اجتماعي
برنامج ٍ مدروس ..ولكل الاذواق=وبراعة التنظيم ...مابه نزاعي
فعاليات ٍ تحتوي كل ما لاق=وتعطي عن الاهداف احلى انطباعي
موايد ٍ للخير من كل الاطباق=الذ واحلى ...من حليب المراعي
وللخير عشاقه وللشر عشاق=عرفت هذا ..بخبرتي واطلاعي
حنّا بوقت ٍ فيه تكسير الاطواق=وتطلّ من جوّاه ..روس الافاعي
والحق عانا فيه من لوي الاعناق=واصبح مجاله للدعاوي مشاعي
والجو سيله يغرق اليابس اغراق=بالصوت والصوره وبثّ ٍ اذاعي
تخالطت اصوات واهداف وابواق=ولا بد من تحصين خط الدفاعي
وكل الشكر للي تحمّلْ عملْ شاق=واللي بذل مجهود ساعي وداعي
واللي تكبّد عنوة البعد وارهاق=واللي له المعروف داعم وراعي
والنفس ما طابت ولا خاطري ضاق=لكن حدود الوقت رهن اتباعي
وصلوا على المختار ما لاح براق=وعد النجوم اللي تبث الشعاعي

...................
(( مسك الختام ))

اجمل ختام ..وصفّقت كبد ...للكلْ=لضيوفها ...ورجالها المخلصيني
تضحك غنج ..يزها بها الزين والدّلْ=ويحق لك يا كبد ..هاذي يميني
ما دام رجالك ..للثقايل تحمّلْ=وعند اللوازم ...كلهم جاهزيني
عجزت اميّز!!!بين مخطي ومدّلْ=هذا وهذا !!....كلهم طيبيني
عشرة ايام ٍ نشرب الحب ونعلّ=بضيافة رجال الوفاء ..الغانميني
في ملتقى كبد القصيم ..المكمّل=اللي مثل هدّاج ...له وارديني
وجات النقاط الخمس بالوجه الاكمل=بجهود ربع ٍ .. للبلد وافييني
تفاؤل وترفيه وايضا تواصل=وتثقيف ...والتثقيف دنيا وديني
واليوم للتكريم صوت ٍ مجلجل=صوت ٍ صداه يدوم ..عدة سنيني
ويا شاعر المليون مهما تجمّل=لك شاطي الراحه... ولي راحتيني
لو كنت تطلب بيرق العز صامل=رفعت راية كبد ...بالساعديني
دار الوفاء والحب للطّيب مدهل=لو نبتعد عنها ...يزيد الحنيني
ونبي ندوّن كلمةْ اعجابْ بسْجلْ=وسجلّكم ياضيوفْ... صفحة جبيني
قولوا لبو راكان ...شكراً مجمّل=والشكر موصول ٍ ... بعقد ٍ ثميني
لكل الحديد ..اللي كرمهم كما الطّل=وايضا الشباب اللي معه قايميني
وحان الوداع ..ولوّح القلب للكلْ=مع السلامه ....علّكم سالميني

..............
وسلامتكم

صح لسانك يا الفريد
والله يرحم العم محمد بن حديد
وابن العم فالح بن حديد
وربي القدير يوفق عياله اللي رافعين راسنا
بوسط الاهل والاجناب

عمـــــــــــــــــار يا كبــــــــــــــــد

عندليب المجالس ابو عبدالعزيز
صح لسانك ودامت ايامك عامرة بالطاعة
محمد بن حديد وابنائه يستاهلون المدح
نعم انهم رجال الكرم والجود وعنوان الابداع
فعندما تتشاهد حماسهم لبلدتهم ترى ان هذا الحماس
هو السبب الرئيسي لكل ما وصلت اليه وماتم انجازه فيها

اخوي الكريمين
..........
ذيبان
صح بدنك لاهنت
.............
الخال منصور
صح بدنك واشرقت ايامك على العز والطاعه والمحبه
لاهنت لاهنت
..................................

ابو عبد العزيز

صح لسانك ودامت أيامك عطرهـ كالربيع

ثلاثية رائعة في كبد القصيم

ومحفل وفاء وموقف أجمل للشعر

دمت بخير

ابو ياسر
صح بدنك ودمت لاخيك
راقٍ في مرورك صادق في شعورك
كلمات هطلت على متصفحي كهطول الغيث هذه الايام
اشكرك على هذا السمو الاخوي والاخلاقي
لاهنت لاهنت

ثلاثية شعرية تحمل احلى المعاني الزكيه


ابو عبدالعزيز شاعر /ما فيك حيلة وفالك المليون

اخي شقى الحيران
اشكرك على هذا المرور الجميل
واسلم لك الرخصه والاستماره هههههههههههههههههههه
شعور الاخ المحب
لاهنت لاهنت

صح لسانك أبو عبد العزيز

ويا شاعر المليـون مهمـا تجمّـل **لك شاطي الراحه... ولي راحتينـي
لو كنت تطلب بيرق العـز صامـل **رفعت رايـة كبـد ...بالساعدينـي

ابو عبيد
مرورك واختيارك دليل الذائقة الادبية الراقيه
دائماً تعطر متصفحي بمرورك البهي
اشكرك من الاعماق على تواجدك ووفائك
لاهنت لاهنت
................