من يزرع المعروف والخير يلقاه .......لابن نونان

هذه القصيدة للشاعر
الشاب : خالد بن فهد بن عبدالله بن نونان
ابدع فيها ايما ابداع ليحفظها له التاريخ كما
حفظ العلم الغانم عن اجداده ليتوراثون الطيب
اباً عن جد وليمزج ذلك مع واقع الحياة في هذا
العصر الذي قد لايحفظ البعض تلك القصص
وشوارد القصيد الذي يثبت الطيب والعالم الغانم
لأهله ولعل الشواهد كثيرة في هذا المجال لكم
واليكم ازف هذه المقطوعة الادبية الرائعة لشاعرنا
ابو فهد حيث يقول ...

ياقلب هوّن حسرتك واترك الأه=دنياك لو شانت تعود وتزينا
حتى ولو دارت على النّاس برحاه=لابد ماترجع عليك وتلينا
أحدٍ خذى الدنيا على حد شلفاه=وأحدٍ خذاها بحلم علمٍ ودينا
وأحدٍ قضى الدنيا عزيزٍ بدنياه=وأحدٍ قضاها بين همٍ ودينا
ومن يزرع المعروف والخير يلقاه=يلقى حصاده خوّة الغانمينا
اللي نبيه ليا بغيناه جيناه=واللي يبينا يابغانا يجينا
ومن صد ما والله نجيه نترجاه=حتى ولو قدره عزيزٍ علينا
تبقى المعزّه والكرامه لشرواه=ويبقى رفيع الشان منّا وفينا
حتى ولو يخطي نعذره ونمحاه=نمحى خطاه وعدّنا ما درينا
خويّنا دايم نصونه ونرعاه=في واجبه ما يوم قصرت يدينا
ندرى الخوي ياخوك بالحيل ندراه=ندرى الخوي ياخوك في كل حينا
يهمّنا كل ساع يضحك محياه=ولايستضيق ولاتجيه الغبينا
لجله نسوق المال والعزّ والجاه=ودونه ولو للموت حنّا مشينا
حقٍ علينا وقفةٍ عند يمناه=يلقى بنا العلم الصحيح اليقينا
سلمٍ لنا والنّاس كلٍ ومرباه=وحنّا على درب المراجل ربينا
دربٍ مشاه ( العود ) حنّا مشيناه=ما ننثني لو شان وجه السنينا
من دور (ابن حماد) وليومنا هاه=وعيال (راشد) للفخر كاسبينا
عاداتنا طول الدهر ما نسيناه=اليا زعلنا حيل والا رضينا
كم واحدٍ ضاقت عليه وعطيناه=يلقاء بنا المحتاج نعم العوينا
وياما زبنّا من حشيم وحشمناه=وياما تجملنا وياما عطينا
وحصيلة الرّجال فعله وذكراه=هي مكسبه ياقل ما باليدينا
واللي يبي ينشد عن العلم يلقاه=يلقى الجواب وما كتبنا قرينا
لاشك من يقفي بليّا مراعاه=مدري تجاهل عرفنا او نسينا
هذاك ما والله نجيه نترجاه=تبقى المعزّه وان بغى لايجينا

العود : الوالد : عبدالله بن فهد بن نونان
ابن حماد : شيخ شمل الفردة واحد فرسانها
عيال راشد : لقب يطلق على الفرده من قبيلة حرب

سلمٍ لنا والنّاس كلٍ ومرباه=وحنّا على درب المراجل ربينا
دربٍ مشاه ( العود ) حنّا مشيناه=ما ننثني لو شان وجه السنينا
من دور (ابن حماد) وليومنا هاه=وعيال (راشد) للفخر كاسبينا
عاداتنا طول الدهر ما نسيناه=اليا زعلنا حيل والا رضينا
كم واحدٍ ضاقت عليه وعطيناه=يلقاء بنا المحتاج نعم العوينا
وياما زبنّا من حشيم وحشمناه=وياما تجملنا وياما عطينا

العود : الوالد : عبدالله بن فهد بن نونان
ابن حماد : شيخ شمل الفردة واحد فرسانها
عيال راشد : لقب يطلق على الفرده من قبيلة حرب
=======================
الله العالي يحييك يا منصور الوسوس
على هذه المشاركه الرائعه
وهذه الابيات والكلمات القوية والمعبره
وصح مليون لسان الاخ الشاعر / خالد بن نونان الفريدي
وقد قال الصحيح والعلم الغانم

دربٍ مشاه ( العود ) حنّا مشيناه=ما ننثني لو شان وجه السنينا

عز الله ان جاب العلم الصحيح ,,
فكبيرنا الشيخ العود / عبد الله بن نونان ,,, هذي علومه ودروبه
وللمعلوميه اخي منصور ...
هو الشيخ / عبد الله بن فهد بن فهد بن نونان الفريدي
من العمرو من وسامة الرقبة من الفرده
وابنائه كلهم كاسبين النعم وكما قال اخي الشاعر فهد ...
وهم سائرون على دربه
وهـــم ... ربي يحفظهم...
فهد بن عبد الله ( رحمه الله ) ..واولاده صالح وخالــد 000
و (علي بن عبد الله ) وابنه فهد 000
و (ناصر بن عبدالله) وابنائه تركي واخوانه
و( محمد بن عبد الله )وابنائه عبد الله واخوانه
و (عادل) وابنه خالد 000

هو عبد الله بن فهد بن فهد بن نونان ... الاسم حقيقي هكذا وليس اسم فهد مكرربالكتابه ,,,

صح لسان الشاعر /خالد بن نونان

وسلمت يمينك أبو محمد

الاخ ذيبان
هرم المجالس وذروة سنام المعلومة الجميلة
تعجبني كثيرا عندما تاتي بتفاصيل الفردة
سلمت يمينك اباراكان على هذه المعلومة الثمينه
وهذه التفاصيل الغالية لرجال غالين على الفردة وهم النونان

صح بدنك وسلمت ودمت يبن راكب

سلمٍ لنا والنّاس كلٍ ومرباه=وحنّا على درب المراجل ربينا
دربٍ مشاه ( العود ) حنّا مشيناه=ما ننثني لو شان وجه السنينا

شاعرنا خالد بن نونان
ونعم السلم ونعم المربى يابن عمي
قول وفعل والشهادة فيكم وفي عودنا جميعا الله يطول بعمره
شهادة مجروحه ان جاز التعبير لانكم من الروح
وماقول غير صح لسانك وعلا شانك يالغالي
وعساه مايشين وجه السنين بوجهك ومن يسمع
ابيات جزله ونطمع في المزيد منها باذن الله
وكل الشكر للوافي ابو محمد على النقل والنشر للجزل

من دور (ابن حماد) وليومنا هاه=وعيال (راشد) للفخر كاسبينا

تسلم اخوي منصور الوسوس على هذا النقل الرائع
وصح لسان الشاعر ابن نونان ولقد ابدع في الوصف والفخر وهو اهل لذلك
...وبما ان الشيء بالشيء يذكر فلقد سمعت بأن هناك قصيدة قديمة لابن رشيد
يمدح بها ابن نونان الفريدي الا ان الذاكرة لاتسعفني في ذكر تلك القصيدة وقد يكون بمقدورك
اخي منصور او الاخ الفاضل ذيبان ايراد تلك القصيدة فيا حبذا.
تقبل مروري وتقديري

فارس الحرف

الله الله الله على الابداع والشموخ
قصيدة والله اعتبرها معلقة يجب كتابتها بماء الذهب ((ارجو تثبيتها لاهنتم )) هذه الملحمه العظيمه قرأتها مرات ومرات وكاني والله ارى صاحبها الشاعر خالد بن
نونان وهو يلقيها بين يدي اسلافه اولائك الرجال العظام وهم يبتسمون له
ولكي لايستغرب بعض الاخوه اللهجه في القصيده
لدي اضافة بسيطه لاهنتم:
اهلنا النونان اسرة كريمة عزيزه تقيم منذ القدم في مدينة حائل ولرجالاتها ذكر جميل
في عهد ابن رشيد ومواقف عظيمه في هذا العهد الزاهر
اما ما أشار اليه اخي فارس الحرف عن تلك القصيده:
فمن المعروف ان النونان من المقربين ذلك الوقت من حكام حائل ومن اشهر اهل الكرم
والجاه والنفوذ ولا يحضرني من قصيدة ابن رشيد الا البيت الاشهر:

اللي يحب الهرج حنا مقرّه =والا الشبب باغيه ينهج لنونان

هكذا احفظه وارجو من اخي منصور اخذ الاساس من شاعرنا خالد
صح لسان بن نونان قال فأبدع وننتظر المزيد من هذا الشموخ
اما انت ابا محمد (مغناطيس الجمال)
حقاً لقد فاجأتنا بالنص وصاحب النص وهذه عاداتك لاتلتقط الا الغالي والنفيس
وهذه المره اضفت اليها انك عرفتنا باهل لنا هم عناوين المجد
سلمت يمينك لاهنت لاهنت لاهنت لاهنت

ابو بندر اشكر لك مرورك وجمال تعليقك
لاهنت اخوي

هلابك اخوي فارس الحرف
نعم القصيدة مشهورة وسوف تراها قريبا باذن الله تعالى
لك وافر المحبة والتقدير