إحدى روائع الشاعر/ نـايـف ابن فـيـصل بـن عـرويـل الـعـتـيـبـي

يالله يالـي فـوق سبـع السمـاوات=تفرج لحـال الـي عصتـه الليالـي
سايرتها بسكـات بسكـات بسكـات=واقـول بكـره يصلـح الله حـالـي
ماودي اشكي عنـد عـاذل وشمـات=ولابي علـي النـاس تلقـى مجالـي
اقضي طـوال الليـل نـوح ٍوونـات=والناس ماتدري عـن الـي جرالـي
صبـرت واستبدلـت قولـي تنهـات=وتسابقـن دمعـات عينـي تـوالـي
عليـك ياحلـم ٍاشوفـه ولا مــات=رغم الحضـوض النـادرات القلالـي
لك الذي مـا تختلـف فيـه هقـوات=ماتختلـف هقـوة رفيـق ٍعنـالـي
لا والله اثبت والحق القـول باثبـات=والقول ما يثبـت عـزوم الرجالـي
لا والله الى الفعـل والفعـل بالـذات=محـد ٍيقـول المـر يانـاس حالـي
للطيـب درب وللرخامـه متـاهـات=ويالي بغيت الطيـب اسمـع مقالـي
صـل الصـلاة واد كـل العـبـادات=واسجد لوجـه الله عزيـز الجلالـي
وللوالدين حقـوق ذكـرت بالايـات=ياجب عليك اصغـاااء ثـم امتثالـي
ثم عقبهـا لاتلحـق النـاس نمـات=اوزن كلامـك يرفعـك فـوق عالـي
ترى لسان الشخص للشخص مرئـاة=ان اعتدل عدلـت وان ملـت مالـي
واحرص على وقتك ترى الوقت لافات=تنـدم علـى فوتـه ليـال ٍطـوالـي
لاصـار مـا شيـد شبابـك بنايـات=لاصرت شايب مـا بنيـت العوالـي
شيدلك من الطيب قصـر وعمـارات=تذكربهـا لاصـرت تحـت الرمالـي
اسمع كلام الناس وانضـر للامـوات=واختر لنفسـك مـا تريـده يقالـي
واحذر ترى للنفس رغبه وشهـوات=ان طعتهـا راحـت عليـك المعالـي
طرد الهـوى ذلـه ولافيـه شكـات=يامـا تنـزل مـن (سبايبَه)عـالـي
ولا تلحقك من قلـة الحـال ضيقـات=خلك على ماقـال( صـدرك شمالـي)
اضربهـا واحـذر تطيـح بمغبـات=ولاتنفتـن نفسـك بطـرد الريالـي
واعرف ترى غال الكنوز القناعـات=من فاز فيهـا فـاز والفـوز غالـي
ولا تخـوَف مـن نهايـة بـدايـات=خلك علـى كـل الامـور ارتجالـي
الخوف يرمـي صاحبـه فالهزيـلات=ويثنيه عن كسب الامـور الجزالـي
الموت مره لاكـن ان خفـت مـرات=والله مـا تمشـي حياتـك عـدالـي
خالط جميع النـاس كـون علاقـات=لا تجلـس لحالـك تصيـر انعزالـي
لاكن بنفس الوقت ياصـاح هيهـات=تمشي بهواك الناس في كـل حالـي
فالناس طيب واكثـر النـاس عيَـات=رافق هـل الطـولات خـل الثعالـي
والجـار كثـر جيتـه والـزيـارات=سيَر ترى الدنيـى سريعـة زوالـي
فنجال بن وعـود ٍ ازرق وضحكـات=تشيـل هـم الـي همومـه ثقـالـي
مافـات فـات وماهـو اتــي ٍ آت=اسمـع كلامـي وافهمـه للتـوالـي
رتـب حياتـك حـط الـك اولويـات=وخطوط حمرى واضحـات ٍ جلالـي
الدين لا ترضى على الديـن خمـلات=هـاك الكـلام الـي يهـز الجبالـي
والله ما ترضى عليـك الولايـااااات=اليـن تتبـع درب ذيـك المـلالـي
جاهد عـدو الله فـي كـل الاوقـات=بالحـال ولا الـمـال ولا العيـالـي
ثـم الوطـن احيـان تاتيـه حـزات=تبـي رجال(ن)يحملـون الحمـالـي
وقـف بعـزة نفـس قلـه سلامـات=يالمعتدي فالعقـل جـاك اختلالـي؟؟
ثم اقطع الرجعه وقـل جيـت مـوات=والله مـا تفـرح بيـوم احتـلالـي
هاذي لأهل الطيـب مثـل العلامـات=نضمـت فيهـا كـل كـار ٍ طرالـي
وللطيـب درب وللرخامـه متاهـات=ويللي بغيـت الطيـب طبـق مقالـي

مشكور على النقل والذووووووووووووووووق

وصح لسان الشاعر

ضيف الله بن علي


شكراً لك

ودمت بود

مشكور اخوي ناصر على نقل هذه الرائعة

وشهادتي بالشاعر القدير ( الصارم ) مجروحة

شاعر جدير متمكن

شكراً جزيلاً لك أخوي ناصر وصح لسان الشاعر وأتمنى له من صميم الفؤاد مزيداً من التقدم والنجاح

أبوعزام

شكراً لمرورك العطر

لاهنت