ابوراشد

	تشرفت بزيارة بعض من ربعنا من أهل القوارة انا واخوي مقبل بن نمران في العيد الثاني وشربنا فنجال عند أحمد بن خلف بن عتاق الفريد في مجلس جده الشيخ عبدالله بن علي بن هديب رحمه الله بحضور والده اللي خاوانا ومشانا بديرة ربعنا وكان عريفنا هناك ونعمين والله بالخوي الذرب ابوعبد العزيز وقد كنا في ضيافة ابو محمد المقدم/ سعد بن محمد بن سدحان الفريدي و والده ابو راشد الشيخ/ محمد بن علي بن سدحان الفريدي وابناءه الكرام وقد قابلنا الاخ العزيز /عادل بن خمسان الفريدي و والده ووتشرفنا بزيارة محله العامر بالطيب والكرم، وكذلك قابلناالعديد من وجهاء ربعنا بالقواره وكان لنا شرف لقائهم والسلام عليهم وعبر هذا المنبر اتقدم اليهم بجزيل الشكر على تلك الحفاوة البالغة التي لقيناها من قبلهم أنا وأخوي مقبل بن نمران بن حماد . وبهذه المناسبة السعيده و بعد عودتي تمثلت بالابيات التالية وارجو ان تنال بعضاً من إستحسانكم وإستحسانهم وهذا غاية أملي ،وإن كان حق ربعنا علينا أكثر من ذلك ولا هن من قدرهم يشهد الله على طيب الملفى وحسن الاستقبال وكرم الضيافة اللي ماهو مستغرب من ربعنا السداحين وعلى راسهم ابو راشد حفظه الله وامد في عمره على الطاعة وغفرله ذنبه وماقول غير بيض الله وجهه هو وربعنا كلهم :-

من مهجتي كتبت أنا اليوم موال=فيه الفخر ماهو كلام الغشامه
والله يقدرني على كل ابو حال=بالجزل وارضي فيه أهل الفهامه
السبت ثاني العيد مضيت رحال=برفقة خوي ٍ قرم جوّد حزامه
ياخوة ٍ تشرى ولا تبدل بمال=لو زوّد السوّام فيها كلامه
مقبل بن نمران والحق ينقال=عز الرفيق الله يعلّي مقامه
خوّة شرف ماخالطتنا بها انذال=على علوم المرجله والكرامه
يـوم ٍ مشينا به نبا نـوسّـع الـبال=بالعـيد ونـعايد رجــال نـشامه
معنا خلف عشير من تضفي الشال=ذيب العرب صيّاد ذيب العدامه
نلفي على عود ٍ لنا طيّب اعمال=متفرد ٍ بالطيب كله شهامه
هذاك (ابوراشد) كما مزن همال=عز الدخيل ولو تعزْوى خْصامه
من مثل ابن سدحان للزاد بذال=صفر الصواني عامره من ايدامه
معه الكرم والطيب شدّاد نزال=غيث الفقير اللي شكى من سقامه
وعقبه هل الطولات رجّال رجّال=ما فيهم الِّلي قِيل هذا علامه
احبهم و الله كريمين الافعال=اهل الكرم والمرجله والقرامه
واسلم وسلم لي على طيّب الفال=يابو محمد يارسول السلامه

معلا

.

ابو بندر
تسلم اخي العزيز على هذه المقطوعة التي تسطر بماء الذهب..
وفيها من الجزالة والابداع مايفوق الوصف..
وما تدوينك لتلك الزيارة المباركة في الوقت المبارك الا دليل وفائك وطيب معدنك..
سوى ما افردته لاخوياك او لصاحب الدعوة وربعه وابنائه..
وللمعلوميه افيدك بانه قد تم ايصال القصيده لوالدك الشيخ/ محمد بن علي بن سدحان
وقرأ القصيدة ..وهو معجب بها حد الاعجاب..ويشكرك على هذا الاطراء والثناء..
ويرى بأن ما وجدتموه انت واخوياك هو اقل من حقكم..
ويرغب منكم تكرار الزيارة.. ولمن يرغب من اولاد راشد فالدعوة مفتوحة والله يحييكم(فاصله).
انتهى كلام الشيخ.
ابو بندر
لك مني جزيل الشكر والامتنان.. واقدر لك انت وابوياسر زيارتكم.
تقبل مروري.. وتقديري
فارس الحرف

صح لسانك ابوبندر
واللهيبيض وجهك على هذها لدرة العالية
والله ونعم الأخوياء ابن نمران وابو عبدالعزيز وليه ماتكتب موال وتفتخر !!!!
وبعيدعنك الغشامة يابو بندر !!
وعز الله انكم ليفيتم على رياجيل أهل كرم ووفاء ويشرحون البال
والله ونعم بالربع اللي لفيتم كلهم

النعم حالك يابن راكب
ماعليك زود يالغالي ولا بك قصور عن ماذكرت
هذا من طيب اصلك يالنشمي
تشرفت بمرورك وطيب حضورك

صح لسانك يابو بندر ,,,

وكنت اتنمى اني قابلتكم لكن واثق انكم راح تكررون الزياره

وحياكم الله في محلكم وبين ربعكم ..

واشكرك على المشاعر الجميله اللتي بحت فيها في قصيدتك العذبه

وتفتخر وحنا نفخر ومافي احلى من موالك

والعشامه بعيده عنك يابو بندر ..

والف شكر لك على بوحك العطر

أبو بندر

صح الله لسانك وبيض الله وجهك والربع يستاهلون كل خير وهم أهل الوفاء

ومهما قلنا فهو قليل بحقهم

نشدني أحد الأخوان وقال وش أخبار زيارة أهل القوارة :

وقلت لاتهرجني يومين أنا منبهر ومفتخر ولا تسعني الدنياء سعادة أنا وأبو بندر

وماهي غريبة عليهم أبد الإستقبال والحفاوة والكرم

والله إن تسجيل الزيارة بقصيدة حاطه في بالي وأنا في بيت أبو راشد ومانسيته وسبقتني يالذيب ياخوي الطيب

وماقصرت يابو بندر ويستاهلون السداحين وأهل القوارة جميع ويعلم الله إن كلهم لهم حق بيت بيت

انعم واكرم بالضيوف والمعازيب

احبتنا السداحين من خيار الجماعة وتواجدكم عند ابو راشد وهو علم من اعلام الفردة

الكرم والجود مايستغرب من اهله وانعم بفارس الحرف من فارس يستاهلون العنوة

ولولا ان الموعد كان خلال ترتيبنا لاجتماع ربعنا لكان لبينا الدعوة والعذر عند كرام

القوم مقبولُ

بيض الله وجهك يبوبندر عاداتك العلوم الطيبة والعلم الغانم ... عرفت تختار الخوياء

انعم بهم واكرم مقبل والفريد ...

فارس الحرف

مشكور يابومحمد على توصيل الرسالة لوالدنا ابوراشد
ومن فضل الله انها جازت له ونالت شيء من استحسانه

وهي ماكانت الا فيض من غيض طيبكم وكرمكم وحبابتكم.

الشامخ
صح بدنك وسلم راسك
ولنا الشرف بشوفك وزيارتك اخوي
وهذا مما يسرنا ويزيدنا شرف

ابو ياسر
ونعم والله بعز الرفيق يالغالي وانت بعد تستاهل الطيب
وانا ونت واحد والكل منا يسد بواجب الثاني
وانا اشهد ان النشامى يستاهلون وبيض الله وجيههم ماقصروا.