قاصد خير يحل ضيفا عليكم

اخواني واحبابي واعزائي وعزوتي

كنت كاشت ذاك اليوم على طويرات وكان ابو سعود الله يذكره بالخير يطبخ الغدا ويسولف

وكان توه طاق له جوال جديد وفرحان فيه ماخلا واحد ماخلاه يشوفه المهم انا استغليت الفرصة

قلت مدام هو يطبخ الغدا خلني اتفرج على جواله واكلم منه وارسل رسائل حلوة

مالكم بالطويلة قعدت اقلب بالرسائل والا القى عنده رساله جاية من ابو ............ يقول فيها

الله يحييك بمنتدى ربعك وحاط رابط المنتدى . انا والله العظيم اني فرحت قلت بيصر لنا مكان نعرف فيه

ربعنا اللي في الشمال واللي في الجنوب واللى رايح واللي جاي وبعدين اهم شي حسيت اني

استفدت من ابو سعود لانه دايما ياخذ ولا يعطي وتكفى اني اخذت منه هالرسالة اكبر فايدة لي

المهم دخلت الانترنت من اقرب كوفييييييييييييييي وقلت بشوف وش عند هالربع

ويعلم الله ماشفت الا كل علم غانم الربع كلهم متجمعين على علوم رياجيل وعلى وضح النقا

وتشوف شي والله يخلي الواحد يفتخر فيه ناس تكتب شعر وناس تنقل شعر وناس تكتب مقالات

وناس ترسم وناس وناس.........

والله انكم واجهة مشرفة للقبيلة كلها

واعذروني على التطويل لكن من ماب صدري من غلا ومحبة وشوق

فارجوا ان توافقوا على منحي اجازة معليه يالربع واحد متعود على طلب اجازات

ارجوا ان تقبلوني اخو صغير بينكم ان اخطيت او زليت فانا بين عيال عمي ( خملتي مدمومة ) وان طبت وزانت

علومي فانا بين عيال عمي وعزوتي وعلمي غانم وعلى الاقل اساهم لو بالجهد ونكون انشاء الله واجهة مشرفة

لانه يالربع هالحين الدنيا تغيرت إي واجد يشوف له رجال ويبي يعرف عنه والا يسمع عن قبيلة اول مرة يسمع فيها

مايروح ينشد يطق على طير شلوى ( قوقل) وتجيه العلوم والا جته هالمتدى وشافكم رياجيل يهمكم اسم ربعكم

وشاف العالم فاهمة وواعية وش بيقول . بيقول والله يهالفردة انهم ماهم بسيطين وبيمدح وبتصير ياهالي مسجل

بالمنتدى وعضو فيه رايتك بيضا قدام ربعك وقدام الاجناب . وعسى الله يجعل القلوب دايما صافية ونقية

مدري احس اني كثرة عليكم لكن والله من المعزة

وانا حلفت عليكم محد يتكلف منكم المعزة يالربع بالصدر يعني باختصار مافيه داعي للمفاطيح

يكفى صور لها والا صورة بوكية ورد صاير رومنسي الولد

ووفروا المفاطيح اذا اعرست اللي هو انا طبعا

واتمنى اكون مثل مازولا خفيف على القلب

أهلاً هلا

بقاصد الخير جعل الله لك من اسمك نصيبك

حللت أهلاً

ووطئت سهلاً

وعلى الرحب والسعة

وتستأهل الاستقبال الطيب والعلم الغانم

مقدمة رائعة وافتتاحية طيبة

والكتاب واضح من عنوانه( رجل طيب يحب الطيبين وناصيهم ....

وتستأهل ماطلبت واكثر:

(قاصد خير)

هلا وغلا وحياك الله انت وبوسعود

المشاركة الأصلية كتبت بواسطة بدر الفريدي

(قاصد خير)

حياك الله بين ربعك وأبناء عمك

والله يجعلك وجه خير على هالمجلس

وياهلا والله ومرحبا

حللت أهلاً ووطأت سهلاً

قاصد خير



أهلا بك أخي .. والمنتدى وأهله تشرفوا بوجودك بينهم..

فأهلا بك يا من تجمل مجالس الفرده بمقدمه...

وانتشرت رائحة العود في أرجائه ..


ويالربع الرجال حالف وأنتم طبيتوا به مفاطيح وقعدان صدق مافيكم حيله

حياك ياقاصد خير واللي هذا كلامه وفرحته بربعه مايجي منه خطاء

وربعك يفتخرون بأمثالك طيبك طيب لهم وطيبهم طيب لك

بس لاتطوووول علينا

حياك الله وبياك

هلا وغلا

وحياك

يا قاصد خير


الا على طاري ابوسعود وينه ماجاء معك

شكله طايح بهالقميري ماينلام

حياك ومرحبابك


وننتظر ابوسعود

يا هلابك ياقاصد الخير اخ عزيز.......

هلا بكم وغلا

ويا اخوان هذه الصور لاتدل على كرم تدل على اسراف وتباهي وتبذير بلاشك

والا الكرم واجب يقوم كل مسلم كريم

حييت اخي العزيز وننتظر ابداعك