قصيدة للشاعر : مليح بن نافع القسومي

	ياللي تريد اسمي على شان ترتاح = عن منسبي بعطيك وصف وعلامه انا من اللي يتبع البرق لا لاح = لا لاح براقه وخيّل غمامه وانساق صوب الشرق وهمالها ساح = على الفياض وما وطا السيل رامه انا بدويٍّ اتبعه وين ماراح = عطري شذى نبته وريحة اخزامه انا بدويٍّ راس مالي والارباح = حجي وصلاتي والزكاة وصيامه اركع واطيع الرب وادعوه بلحاح = انه يجنبنا الفتن والملامه والدين بوجيه الرجاجيل مصباح = نور يقدّي صاحبه في ظلامه والعز بوجيه المفاليح ماطاح = يبقى مع اللي يلبسون العمامه عرفتني والا بعلّمك يا صاح = غير البدواه جاك زبدة كلامه انا الفريدي من شماليّ الاسياح = امن الرجال اهل الوفا والشهامه امن الرجال اللي لهم الطيب ينزاح = ذروة سنام المجد تاج الزعامه ربع ٍ لهم في طيب الاذكار مداح = مجد ٍ من الماضي رقوا في سنامه يوم السنين سنين لاكنها اشحاح = قادوا بها جود الكرم للكرامه يذبح بها قعدان مع كبش مصلاح = والضيف لاجاهم رفيع ٍ مقامه اخوان للشيمه وفا واهل اصلاح = اعصاة لاشان اللغى بزدحامه لاقامت الفتنه وصيّاحها صاح = صاحوا عليهم بالقشر والندامه سلايل الفرسان كان العزاء باح = والخصم عند القوم قل احترامه عزوة عيال العود في بيع الارواح = عند اللقا ما يعرفون الرخامه أعيال راشد بالوغى درع وسناح = درع يذري من شكى الجور ضامه من لاذ فيهم خوف عنه القشر راح = قوم سعيد الحظ صاروا احزامه صغيرهم لكل المواجيب نطاح = وبالموقف الغصّاب صعب انهزامه ياقف مواقيف الوغى لين تنزاح = عنه الجموع اللي تحاول اعدامه في عصرهم نالوا مكاسيب وامداح = وجالوا وصالوا والعدو في اخطامه ربعي سلايل مروية عطش الارماح = حرب الحرايب كان طيّر عسامه هذا وانا ماني للفعال شراح = والناس تعرف محتمين الجهامه هرج عليه اشهود ماكود وصحاح = ماهي سواليف الردي والهلامه وكل القبايل بالظفر تلبس اوشاح = وتارد مواريد الخطر والتحامه ولا ذم غيري من عزيزين يابداح = ماخطي وذم الناس زور وبهامه والظلم عيب الهرج لو هو بالامزاح = ومن يقبله يكره ويكره سلامه وصلاة ربي عد ما بارق لاح = على النبي اعداد وبل الغمامه

الشاعر : مليح بن نافع القسومي .


الناقل : صالح القسومي

صالح القسومي

مشكور على نقل هذه الرائعه الجميله

والنعم بالشاعر مليح بن بتال القسومي

ويستاهلون عيال راشد المدح والفخر اهل المجد والمواقف المشرفه

قصيدة جزله تستاهل التثبيت والتعديل والتنسيق

وشكراً


ملاحظه:
لازلت اقول ياصالح لاتستعجل بانزال المشاركه حتى تنسق معي وتنتبه للاخطاء الاملائيه

لانك بها تفسد قصيدة الشاعر وتظلمه ، رجاءً رجاءً

صالح القسومي

مشكورعلى نقل هذه القصيدة الجزله من شاعر جزل ومدح في منهم أهل لذلك


وصح الله لسان (((( أبو رايد)))))


ودمت بود

القسومي

صح الله لسانك و لسان أبو رائد

مدح فيمن يستحقون المدح وتعريف وافي وجزل

دمت على الخير والمحبه

صح لسان الشاعرمليح القسومي

وعيال راشد يستحقون المدح

الله يعطيك العافيه صالح القسومي

صحت ابدانكم يا عيال راشد
نيابة عن ابو رايد
مشكورين على الردود الجزلة

القسومي بيض الله وجهك على هذا الاختيار الذي

جاء كماهي عادتك مبدع حتى في الاختيار وهذا

ليس غريب على شاعر قدير مثلك فاختيارك جزل ...

صح لسان الشاعر الرائع مليح فقد اجاد في مدح ربعه

لك اجمل التحايا اخوي القسومي ودمت بود

البارق
مشكور على ردك الجميل
ولاهي غريبة من ربعي هذه الردود
فردودكم تجعلنا تختار لكم اجزل القصائد والمشاركات

بيض الله وجهك ياالبارق

ولك مني اطيب التحية

مشكور ياصالح على الاختيار وصح لسان الشاعر ابو رايد

الله يعطيك العافيه يا صالح على نقل القصيده





وصح لسان الشاعر مليح القسومي
وبيض الله وجهه



ومدح ربعا يستاهلون المدح وغنين عن التعريف



تقبل مروري