قصيدة للافي الغيداني

بسم الله الرحمن الرحيم

هذه قصيدة ألقاها الشاعر لافي بن حمود الغيداني في مزاين قحطان والقصيدة قديمة للشاعر

مايبرد واهـج الشـوق وشعـور الهيـام=غير سرداً تطوي البعـد بالسرعـه طـوي
بديها من خلف ماهوب مثلـه مـن امـام=مستوي في حال .. وبحال ماهو مستـوي
خشمها عبرود طلقه .. وموخرهـا بهـام=رافعـه راعـيـه بـأشـارة ٍ ماتنـغـوي
لابدو دعاء السفر .. واعلنو ربط الحـزام=ورشادات الامن لـو ترتطـم والا تهـوي
واستلمها واحـد ٍ خبرتـه عشريـن عـام=كبتـن ٍ بالله وبكتابـه إيمـانـه قــوي
مسلـم ٍ عنـده خبـر بالحـلال وبالحـرام=جابله ربي على الديـن وسلوكـه سـوي
وصعدت مثل اشقر ٍ فوق جول الصيد حـام=لمراوحهـا مـع الجـو لجـه وحــدوي
مثل مايدوي صدى صـوت رعـاد الغمـام=صوتها صـداه عبـر الفضـا يـدوي دوي
صنعة اللي ماعرفـوا لاصـلاة ولاصيـام=شعب ٍ أكثرهم ماهو عـارف ٍ منهـو ذوي
بالنهـار لياتعلـت كبـر فـرخ الحـمـام=دونهـا الاف المسـافـات تزويـهـا زوي
وان تغطلس بينك وبيـن رؤيتهـا الظـلام=كن في روس اجنحتهـا مشاهيـب بـدوي
دوبهم دكـو عـن دلالـه الربـع الحشـام=تحتها من وقـدة السمـر جمـر ٍ مجثـوي
دايم وربعه علـى جلسـة ٍ عنـده حيـام=ابلـج ٍ ليـن جنابـه لربعـه وحـمـوي
مالي الا هي .. لياجـا للاشـواق أحتـدام=وقامت الذكرى على القلب تكوينـي كـوي
لي شهر وشوي عينـي محاربهـا المنـام=ودي احضـر جـوازي وادورلـي خـوي
بينـي وبينـه مسافـات وحـدود ونظـام=واحـد ٍ فرقـاه شاويتـن فـوادي شـوي
بس ابـا ازوره مثـل مايـزارون الكـرام=لين عيني مـن قبالـه وشوفـه ترتـوي
لو بغيت اصبر .. واكابر .. واقول اني تمام=ذيب حبه بيـن جـرد المحاديـب يعـوي
كان مالي في دروب الهوى شـف ومـرام=لين شفته .. واشهد انه هـواة المهتـوي
ياسـلام الله علـى السلهمـه والابتسـام=وياسلام الله على اللـي مابيلـه مطـروي
كن مالله حط في منطقـة خصـره عظـام=وكن غيره ماحتوى مثـل ماهـو محتـوي
لاقعـد مـاوده يقـوم .. ولياقـام قــام=تلوي اعناق البشـر قومتـه يمـه لـوي
تقل بين اعلا الجسم واسفل الجسم انقسـام=شي من جسمه مرتـب وشـي ٍ فوضـوي
استلمنـي فـي جبروتـه اشـر اسـتـلام=ليـن طيّـح معنويـات راس المعـنـوي
الغـرام ليابطـش فيـك ملعـون الرسـام=مايعرف هـذا قبيلـي .. وهـذاك خلـوي
يكبـر الرجـال امـام المهمـات الجسـام=ويصغر الرجـال امـام الجمـال الانثـوي
مايتحمل نظرة العيـن .. وارخـاي اللثـام=لو باسه باس رحمـة حيـاة بـن جلـوي