<<<<<قصة وقصيده لأبو دباس ودباس>>>>>

بسم الله الرحمن الرحيم

أرجو من المشرفين أذا كان هنالك غلط أونقص تعديله



اعجبتني القصة لم قدمه الابن للاب وطلب الاب للابن . فهل يفعل الابناء بالوقت الحالي لابائهم ........؟؟؟؟؟؟؟؟ لا أطيل أترككم مع القصه

قصـــــة ابو دبــــاس
هذة القصة لايعرف متى وقعت ولكن بعض من الرواة قالوا انها وقعت في القرن الثالث عشر والله أعلم وبطل القصة محمد وهو من أهل بلدة عودة سـدير الواقعة في شمال غرب الرياض عاصمة المملكة العربية السعودية بحوالي 100كم يعيش في مزرعتة ومتزوج وله أبنا وأسمه دباس وبنتان فشب دباس على أحترام الناس وحب الخير وكذلك الكرم والشجاعة وكان والده يكنى له الحب بسبب هذه الصفات التي يتحلا بها أبنه دباس وعندما شب دباس وبلغ العشرون من العمر سافر في طلب الرزق ويقال انه ذهب الى العراق ومنهم من قال انه سافر الى عمان وفي خلال مغيب دباس عن والده تزوج الوالد بأمرة وكان لها أخوه فأرادوا ان يتزوجوا من أبنتا محمد فرفض محمد ذلك فقام أخوة زوجتة بعمل الدسائس ضده ونشر الأشاعات في البلدة وتعرضوا الى أبنتا محمد ولم ينتهي الأمر الى ذلك بل قاموا بقطع الماء عن مزرعتة مما أدا ذلك الى هلك مزروعاته فتضايق محمد من أخوة زوجته ومما أصابه من الأهانات فأشر علية صديق بان يرسل في طلب أبنه دباس لعل في حضورة ينجلي هذا المصاب فأرسل محمد مع ركب متجه الى تلك الديار قصيدة طويلة وفي مضمونها يخبر أبنه بماحصل له فقال محمد أبو دباس

ياونــة ونيتهـــا من خـــوا الــــراس = من لاهــب بالكبـــد مثــل الســــعيره
ونيــن من رجلـه غــدت تقــل مقــواس = يــون تالي الليــل يشـكي الجبيـــره
ياحمس قلبي حمـس بنن بمحماس = وياهشــم قلبي هشـــمها بالنجيـره
وياوجد حالي ياملا وجــد غـراس= يـوم اثمـرة غرســـه صفــة عنه بيــره
على ثمر قلبي سرى هجعة الناس = متنحـر درب عسـى فيـــه خيـره
الله يفكه من بلا سوء الأتعاس= ومن شـر عبثــات اللياليي يجيـره
في ديــرة تقطعـت عنــه الأرمـاس = سـبعين يـوم للركـايب مسـيره
لاوالله الا حال مـن دونـه اليــاس = حـط البحر والبـر دون الجــزيـره
يالله ياللي رد مـن عقـب ما يـاس = يوسف على يعقـوب وابصـر نظيـره
تــرد علي دبـاس يامحصي الناس= ياعالم ما بالخفــــا والســـريره
يادباس انا بوصيك عن درب الأدناس= ترى الـذي مثلك يناظر مسـيره
عليك بالتقوى تـرى العــز يادبـاس = في طاعـة الله ما ينجيك غيـره
هـذي ثمن سنين من رحت يادبـاس = لا رسالة جتني ولا مــن بريـره
يادباس من عقبك ترى البال محتاس = وعليك دمع العين حرق نظيره
وعليك كني في دجا الليل حراس = اصبح على حيلي وعيني سهيره
اصبــح وانا ما بين طاري وهوجاس = وطــواري تطري علينا كثيره
مثـل الوحش قلبي على كف حـباس = يكفخ كما طير سبوقه قصيره
متحيّــر من عيلـــة البيـت يادباس= ارجي ثواب الله واخشى المعيـره
اخاف من حكي العـدا ثم الأنجــاس = اهـل الحكايا الطايله والقصيره
ويقال خـلا عيلة عنّـر الـــراس = اقفــى وخــلا عيلــة لــه صغيـــره
والا فانا يابوك قطاع الأرماس = ماني بمثبـور ورجلـه كســـيره
اصلك لو دونك نبا حمر الأطعاس =الصلب والصمّان ما هي عسـيره
مهـالك مـدارك مابـه اونـــاس = الا الثعـل والبـوم تســمع صفيـــره
ياراكب وجننا من الهجن عرماس = فجا النحر يادباس حمرا ظهيـره
متروس الفخذين مزبورة الراس = كـن الخــلاص عيونهــا مســـتديره
تسرح من العوده على نور الأنفاس= عنـد الفجـر والليل مقفي مريره
والعصر بالصمّان تسمع لها اضراس= حبل الرسن خطر تبتـر جريـره
نهار ثالث بين حمـا والأرواس = واره يمينـك جعلهـــا لك ســــفيره
ثم على ساجيه تقلـب الـراس =تمشي باهلها في البحـور الغـزيره
فيهاالطبيخ وراهي الخبز يادبـاس= يقعـد خـوا الراس خنـة خميـره
هي ديرة اللي باغي كيفة الـراس = ولا له حد همه من الناس غيـره
هيـس ولد هيس للمواعين لحــاس = يفـرح ليا نيـدي لذبـح النحيـره
ما قفك ذا يادباس ما فيه نوماس = يصلح لقيّن مهنتـه طـق زيـــره
ترى الفداوي دون وانشد الناس = راعيه ما يذكـر بمدح وغيــره
ما له سوى طق الحنك منه والياس =واليا انقطع خرجه فلا له ذخيره
طلب المعيشه بالحراثه والأجناس =المشترى والبيع يوصف وغيـره
قم انهض العيرات مع كـل فراس = يادبـاس دور خيّـر تسـتشـــيره
جـدّك وعمانك هـل العز والباس = هـل الموجـب مكمليـن القصيـره
يادباس ما يصبر على البق والحاس = الا الذي ماله بنجد عشــيره
واليوم ما مروي شبا كل عباس =انت الرجى ياكعام وجه المغيره
عشرين عام كلها ارجيك يادباس =مثل الغريـر اللي تولع بطيــره
عدل المناكب هيلع فرخ قرناس = يمناه في لطم الحباري شطيره
عانق خلوج روحت عقب مرواس = عند العصير لبيضها مستذيره
الليل جاها وحال من دونها الياس=روحها على فرقاه فرت فريره
يادبس انا يابوك ما نيـب بـلاس= ميـر ان عيـلات الرفاقـه كثيـره
جنبت وسط السوق وامشي مع الساس=واخــذ شوي الحـق واترك كثيره
يادباس لو جبت من دحب الأكيـاس = مختلفــة ما بيــــن رز ونيـــره
ما لي بهــا ياجعلها بالف قبـاس = او جعلها تذهـب ولو هي كثيره
يادباس قلبي كل ما هـب نسـناس = شرقية هبة بقلبي ســعيره
والحال يافرز الوغى مسـها الباس=عليـك ياناطـح وجيه المغيره
وغصون قلبي يافتى الجـود يبّاس=غاد انا يابوك كني هشيره
من شافني يقول ذا فيه لساس =واللي براء حالي الآهي خبيـره
لا وعلى من قبل غوال الأنفاس =ومفارق الدنيا يجينـا بشــــيره
عسى يطـق الباب والناس غطاس = ياوالي القدره عليك تعبيـره
وصلاة ربي عـد ما هـب نسناس =على النبي عدة حقوق المطيره

وقد أشاع أخوة زوجته بان أبنه دباس يشرب التنباك وانه يحضر مجالس الطرب وغيرها من الأشاعات التي أدت الى ان محمد ابو دباس يعيش في هم وغم من هذه الأشاعات التي راجت في البلدة وبعد ان تسلم دباس رسالت والده بعث اليه بقصيدة يخبره فيها بانه لايسمع الى تلك الشائعات وبأنه محافظا على المرجلة التي عوده عليه والدة وكذلك يبشره بانه قادم لمساعدته في محنته :
فقال دباس هذه القصيده ردا على قصيدة والده

حي الجواب اللي لفانا من الرأس =جابه غلام ما توانا مسيره
أهلا هلا به عد ما حبك قرطاس =او ما كتب فوقه بيوت شطيره
جواب من هو لي مود من الناس =ابوي ما يوصف حلي لغيره
فرزا الوغى كنه على الوكر قرناس =قروم ربعه كلها تستشيره
دليل عيرات لياهب نسناس =ثم ادلهم الجو ومابه ذخيره
مهفي الغنم لأهل الركايب والأفراس= لا روحوا له لا عليهم قصيره
راعي معاميل بها العبد جلاس= للبن يشري بالسنين العسيره
هاذي بمركاها وهاذي بمحماس =وهاذي يصبه للوجيه السفيره
وخلاف ذا يا راكب فوق عرماس =مأمونة من نقوة الهجن عيره
حمرا وهي في سنها وقم الأسداس= متوسط لا فاطر ولا هي صغيره
ماهي لحوج راكبه بالعصا قاس= حرم عليها غير شيل النقيره
والخرج هو وبيوت قيل بقرطاس =مع مزهب الأيام ما هي كثيره
وفوقه غلام منوته قطع الأرماس= لو هو بليل ما تغير نظيره
وليا لفيت الدار فا جهر با لأحساس =وبلغ سلامي كل ذيك العشيره
واختص أبوي اللي نفل جملة الناس =وخصه بعلم وقل تراني بشيره
لا يا نجي العرض يا بوي لاباس= كان تشتكي الضيم فأنا أسيره
وان سايلك عني تراني بنوماس =وانا أحمد اللي ما توسلت غيره
المدح لو يشرى شريناه بأكياس =بأموالنا نرخص ندور الستيره
مطرق افرنجي مضاريبه الراس =ومصلبخ جبته عساني ذخيره
من صنع نصراني مشروبه الكأس= يذكر ورى جاوه بعيد مسيره
أبغيه للي حادينك على الساس =أهل النمايم والحكايا الكثيره
ربع نووا فيك الردا والتخساس= مهبول يا اللي قال غايب عشيره
علي دين لودع الجمع ينحاس = لطين العشير يقوم يلعن عشيره
ان ما سكنا الدار من غير هوجاس =والا نعاف الدار ونور غيره
كله لعينا كلمة قلت يا دباس= تشكي وانا دوني بحور غزيره
خذلك يمين الشرع قطاع الأنفاس =انه فلا جتني علوم بصيره
لا نيب جاني منك حبر بقرطاس= لأيضا ولا جتني علوم سفيره
وان كان تشكي الضيق يا بوي لاباس =جاك الفرج يا بوي هو والبريره
يا بوي أنا مارحت لكيفة الرأس =مع ذا ولاني في سفاه او غيره
يا مسندي يا بوي شوف اوكد الناس =ثم انشد قل ويش هو في مسيره
ان كان ما يفرح صديقك بنوماس =تحرم علينا اللي نهوده صغيره
مدلول مجهول زها زين الألباس= بنت الذي يثني ليا جت كسيره
طار يقول اظهر وطار بجلاس =قمت أشرب التنباك واثره نكيره
أبغي عسى الله يبرد القلب يا ناس =من لا هب شبت بقلبي سعيره
و الا فانا يابوي قطاع الأرماس= أصبر على الشده لو هي عسيره
ومن كان له غايب فلا يقطع الياس =ان قدر الله جاب علمه بشيره

وفي احد الأيام خرجت أبنة محمد أبو دباس الى ساقي لتجلب الماء الى البيت فشاهدة الماء يجري ولونه أحمر فذهبت الى والدها فأخبرته بما شاهدت فقال ان هذا أبني دباس قد عاد و هذا الاحمرار هو دم من قاموا باهانتي وفرح الأب بعودة ابنه دباس وأصبح يمشي في البلده مرفوع الراس والكل يقدر شجاعة أبنه دباس وهذه من القصص التي تناقلتها الرواه في جزيرة العرب الصفحة الرئيسية قصـــــة و أبيـــات
آسف على طول القصة



أرجو أن تعجبكم القصه مع الشكر

عبدالله الطهيمي

قصه وقصيدة فيها من الدروس والعبر والفوائد الكثيرة

يعطيك العافيه وإلى الأمام دائماً

الله يعافيك ومشكور على المرور

مشكور أخي عبدالله

قصة رائعة

يعطيك العافيه

على النقل