قصيدة فيها لغز موجهه من الشاعر سعد هذيل

هذه قصيدة للشاعر / سعد بن هذيل

يسندها للشاعر / محمد بن شعيبان

والقصيده فيها لغز رائع جدا طبعا كماهي عادة ابا فهد سعد بن هذيل

والرد موجود بقصيدة مماثلة ردا من الشاعر / محمد بن شعيبان ولكن

قبل لا انزل الرد اريد ان يحاول من لديه محبه للاغاز وبعد ان يتم الحل

سوف اعيد القصيدة لقسم المساجلات الشعريه .

اليكم القصيدة كاملة ............

يا كاتب المكتوب وده لعراف=الشاعر اللي بالتماثيل راوي
محمد حمد لاصار للشعر ميقاف=شاعر وبالميدان باعه رهاوي
ياجد جزيل القول لو شيّب القاف=لاضاقة الافكار باهل الحداوي
تشهد لك الشعار في راس مشراف=ياوافي الكلمه بعيد الهقاوي
انشدك عن بنتٍ على الحب مهياف=تحب كل الناس حتى الشواوي
مبرومة السرجوف والجسم شفاف=تاخذ صميم القلب هو والعراوي
انعم من الديباج في لمس الاطراف=شرٍ على قلب المولع سماوي
عشيرها بغيابها صابه ارجاف=كنه هبيل القلب والراس خاوي
في عصرنا وايضا على وقت الاحقاف=محبوبةٍ مكروهةٍ بالتساوي
جمهورها مشروك من عدة اصناف=عقّال والجهال منها رواوي
والشايب اليا حبها يسرف اسراف=في مجلس العقّال كنه خلاوي
لو يصدر التعميم من دار الاوقاف=يصعب يفرق بينها والهواوي
في ماضي الازمان تكره وتنعاف=يعرف عداوتها مقام الشكاوي
واليوم بالاسواق تدحم بالاكتاف=وتجلس مفرّع ماعليها غطاوي
وسط العرب صارت على شكل ميلاف=وتعلّم الجهال كيف الهقاوي
متلبسه بلباسهم ستر وضفاف=وتعيش بحماية رجال العزاوي
وتحارب اهل الدين ورجال الاسلاف=وان حبها السلطان يصبح حياوي
وسط الحرم ممنوع ماقيل وتطاف=وعلى حرم طيبه عليها نهاوي
في كورة العالم لها اصحاب واحلاف=واول صباها دار عيسى الحساوي
تسرق رصيد المهتوي دون صراف=سوٍ على الطفران وايضا الغناوي
كم واحدٍ من حبها صدر اعياف=وصار يتحمدل بالسلامه شفاوي
بدياركم يابوفهد قيل تنشاف=مدري صحيح العلم والا هقاوي
تم الكلام وغطونا بير غراف=عساك تاجد حلها والدعاوي
واقبل تحياتي على اوراقٍ اخفاف=تحمل ثقيل العلم ماهي حجاوي
وصلاة ربي عد من حج واطاف=على شفيع الخلق خير المناوي

وهذا رد الشاعر / محمد بن شعيبان

الهاجس الصادق للاحساس عساف=قدامه اطوع من ذلول اللحاوي
بين الخيال وواقعٍ مابه انصاف=وتحري الغايب وهمٍ مخاوي
اخذت لي مع وارد الهم محراف=يابو فهد سجيت سجت جلاوي
عن ما ذكرت بعدة ابياتٍ نضاف=آسف على التاخير ماكنت ناوي
وكان القصيده ردها موعده طاف=ماطاف قدرك بالضمير النقاوي
قدر الرفاقه فوق تقدير الاهداف=على النقى المكشوف ماهي نجاوي
ترى الصريح بكلمة الحق مزهاف=غالي ولاني بالحقيقه مراوي
والشعر ديوان العرب عند الاشراف=وانته من اللي ياصلون الحراوي
في ايرادة الله كم منع سيف سياف=اعتق رقاب وحل وضعٍ قساوي
وياما على الماء وردن اقلوبٍ نشاف=وكم هم غير الشعر ماله مداوي
ايام ماللمختلف دور واصداف=البن بالمحماس والنجر ماوي
واليا شهدو لي به رياجيل عرّاف=ورضيت مثلك ما احسب للعماوي
لغزك عساك مجار من سو الاصداف=شرحه لكل شروط الالغاز حاوي
اتعبت فكري فيه من كثر الاوصاف=وصفك لبنتٍ من عشقها شقاوي
يكفي لو انك قلت مطعومها حاف=ومعلقاتٍ برقبتها مطاوي
ولاهي غريبه بالعواصم والارياف=لوتنشد اللي عايشٍ بالصداوي
ولياصار مايلحقك من يمها خلاف=لاينتحي بك سيل وادي نحاوي
الا ان حصلك من سبب حبها اجحاف=تلقى لها عند المشايخ فتاوي
وان كان مقصدك اثمها منه لاتخاف=الموت اثم من ياكلون الرشاوي
حلت مصايب بالعرب مالها الفاف=ماشفت كم بالمجتمع من بلاوي
لكن على اللي بالمخاليق رواف=ماخاب مخلوقٍ لعفوه رجاوي

مشكور يا ابو محمد على النقل

العفو يامرسمي الصغير

حياك ربي

ابو محمد متميز في كل شي نقل رائع كروعتك

اتعبت فكري فيه من كثر الاوصـاف
وصفك لبنتٍ من عشقهـا شقـاوي

لا اقول الا مثل ما قال ابن شعيبان

لكني اعتقد انه يقصد ( الربابه )

وش رأيك ؟؟؟؟؟؟

بسم الله

اعتقد يابو مالك ،هه؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟

الله يقلعها!!

ابو محمد مشكوووووووووووووووووووووو ووووووووووووور على نقل هاتين الرائعتين

بيوت جزله من علمين كبيرين

والهدف الاطلاع على قدرة الشاعرين الكبيره على تطويع الكلمات للمقصود وبلغة بليغه

لكم حبي جميعاً

صح لسان

الشاعر / سعد بن هذيل



الشاعر / محمد بن شعيبان

وشكرا

ابو محمد على النقل

وين ابومحمد

كان ماهي الربابه هي البلوى الثانية _ _ الشيشه --

ياليت تحط القصيدة كاملة يابومحمد وتقبل تحياتي

ابو محمد الله يعطيك العافيه

وصح لسان الشاعرين
سعد ابن هذيل
ومحمد ابن شعيبان

الفريدي
خلف الفريد
مشعل الجضعان
ابن جدعاء
شكرا لمروركم وتعليقاتكم الجميلة

أخوى
منصور الوسوس
يوم الفريد ماحلها والله ماحاولت أصلاً لكن قصايد شعار إكبار وعقال وجزلين
صحة السنتهم وأبدانهم و تسلم على النقل
تقبل مرورى وتحياتي
تحياتي للجميع