صالح محلّه محلٍّلي واهلّي به ...

سمّيت باسم الولي خلّاق ماكاني =علّام ماكنّه الخافي ويدري به
سلام للمحتفل من كل وجداني=واللي حضر فيه من حشمة معازيبه
يامرحبا ياهلا من قلب ولساني=عند اهل الفعل والتقدير والهيبه
يامرحبا في محل ابن رويضاني=محل صالح محلٍّلي واهلّي به
ابو فهد طير شلوى فزعة العاني=لي الفخر وافتخر به يوم اغنّي به
شيخٍ على النعم والطولات متفاني=كان الكرم والمروّه عيب هو عيبه
لي الفخر يوم اجي يمّه ولا جاني=اعتز به واتعيزا فيه من طيبه
انشهد ان البشر مسلم ونصراني=يقدّمه للمعالي طيب اساليبه
بحضور عبدالعزيز بن قنيّاني=يامرحبا ياهلا مليون ترحيبه
عاش الفريدي بميقافه ولا هاني=يستاهل النعم يوم يقال ويجيبه
نومستنا في فعولك يابن ضيداني =ويعتز فيك الوطن شرقه وتغريبه
يعتز بك من تبوك لحد نجراني=وجميع حربي يقدم لك تراحيبه
يوم القذايف تفجّر تقل بركاني=ياحي عبدالعزيز ومن يسمّي به
الظن خدّاع والتجريب برهاني=كلٍٍّ بوقت المواقف ينكشف غيبه
اخذت نوط الشجاعه ياكحيلاني =بالماقف اللّي تميّز به وتافي به
حربي واسم حرب ماخذناه مجاني =اسمٍ ليا شبّة الهيجا نعيّي به
حنّا فدا للوطن شيبٍ وشبّاني=الموت في طاعة الوالي نحيّيبه
عاش الوطن واهله في ظل سلماني=العاهل اللي خدم مكّه معا طيبه
الحزم والعزم طبعه طير حوراني=اللّي كشف خطّة الحوثي والاعيبه
ومحمدين السعد لطّامة الجاني=الكل منهم على يمناه وينيبه
الله يعز الوطن ويسلّم الباني=يالله تمدّه بعونٍ منك وتثيبه
هذا وصلّو عدد هتّاف الامزاني=على محمد رسول الله واصاحيبه.
(حمود محمد الفريدي)