اللي يبينا يجينا ليه ننزله

قصيدة الشاعر / هجاج الوسوس

حنا رجال الوطن والحق والمله=سواعد القائد اللي لا أمر جينا
مأيدين الملك وموحدين الله=وموثقين العهود ف.. درب أهالينا
كم اعتبرنا بفرق الشمل والخله=بين الدول والله الوالي معافينا
ومختل خاين خرج بعقول مختله=أعمى عمى قلب لو هو مبصر العينا
ومنجومة الظهر جت شله ورى شله=كنه تحسبه صلاح ونصر حطينا
تتبع مضلٍ ضلال أفكاره مضله=وصاحين له شعب وجنود وسلاطينا
باكر تبيعه تعين له تعين له=حصيلته لعنه ونار وحصاتينا
من زل درب السنع يالتايه اندله=يا خاين الله وبيت الله والينا
يا ضايع العقل شوف القدس محتله=من وعد بلفور شغاله تعازينا
الدين ينبذك لو أنك تشكله=من مولك ليه ما مول فلسطينا
ما عاد فيها عسى وليته ولعله=العايبه تنقطع لونها أيدينا
وإلا وطنا ترى أمتنا تقبله=ودايم بحكم الشريعه حكم قاضينا
حنا أسود الوغى ما نعرف الذله=ناطى على الجمر ما نغير مبادينا
وأن زلزلت بالجيوش وجات منهله=تقصر أيدين العدى عن لمس أراضينا
من يوم كنا نشيل السيف ونسله=وحنا على القمة العليا مواطينا
اللي يبينا يجينا ليه ننزله=الله رفع شاننا منهو يوطينا
يشهد لنا الله وبعده كل خلق الله=أنا خليفة هل الهجرة ويكفينا
وحنا رجال الوطن والحق والمله=وسلمان للموت لو يشر لنا جينا

الشاعر/ هجاج بن جازي الوسوس