واسم (العياضي) له مقام وحشيمه

الإهداء...الی سعادة العميد
محمد جزاء العياضي مع التحيه.

سلام..يامحمد حفيد الشغاميم=ياطيب السمعه...قوي العزيمه
ياتاج راس الطيب جزل المفاهيم=جسدت وصف الطيب معنی وقيمه
فيك افتخر ..واطاول براسي الغيم=واسم (العياضي) له مقام وحشيمه
يابن جزاء.. ماهو مجامل وترهيم=فعلك...تفاخر فيه حرب العظيمه
وان شيدوا لاجلك محافل وتكريم=تستاهل التكريم..وشداد ريمه
بالطيب قسمك من خيار المقاسيم=وجدك (سمي الذيب) جاب الغنيمه
لايابعد شوف الوجيه المكاضيم=اللي مناصبهم...(وبال).و (ظليمه)
اهل التغطرس والنوايا المجاهيم=وعند اللوازم يضربون الخريمه
والمرجله ماهي (بشوت) و(مرازيم)=ولاهي مسابق في حضور الوليمه
يابوفهد..(جوي) بدا فيه تكتيم=وصدري من الضيقه نشت فيه غيمه
عندي قضيه...مالها رقم تقديم=مع دورت الايام.. صارت( قديمه)
من دونها حالت (ظروف) و(تعاميم)=وبين (القضايا)...ماعليها (وسيمه)
عقالها.. كلمة (علي الملازيم)=واوراقها بيض النوايا السليمه
والوضع مايحتاج (لجنه) (وتحكيم)=ولاعندنا من شان ساهر قسيمه
واكيد..من ينخاك مايلحقه ضيم=ودروب راعين الوفاء مستقيمه
مسعاك مفتاح القفول المباهيم=(يسرني) و (يفيد) بدر العريمه
وختامها شكر وتحيه وتسليم=ينصاك...ياراع السجايا الكريمه
اعداد ماعل المطر روضة خريم=واعداد..مايبنون بالبر.. خيمه

الشاعر والإعلامي /رشيد الفريدي

صح لسان ابوعبد الاله ويستاهل العياضي،

تسلم يابن مطيع على النقل

صح لسان شاعرنا الكبير
رشيد محمد الفريدي مبدع دائماً
يستاهل ابو فهد بيض الله وجهه علمه غانم وذكره يشرف لاعدمناه
الف شكر ابو صالح على الاضافة الجزله لاهنت