الشاعرين الكبيرين بندر فلاح الديري ومحمد حمد ابن شعيبان :مساجله:

قصيده مهداه من الشاعر الكبير / بندر فلاح الديري القصيري
الى الشاعر الكبير محمد حمد ابن شعيبان الفريدي

سلام يا عذب القصيد اللي مثل عمق البحر=وأحلا والذ من القراح اللي يسمى سلسبيل
واشد من شلفا ذياب اللي توقع بالنحر=واطيب ثمر سوقن يجي فيه المسوّق للعميل
وجهة نظر لو اختلاف الراي من طبع البشر=والكامل الله والكمال لغير وجهه مستحيل
تبغا الصراحه يالفريدي والكلام المعتبر=شاعر واديب ومحترم واثقل من الوزن الثقيل
حنا لحقنا مثل مالحق الرجال من الكبر=واللي يعرف العلم ياخذ من هل الخبره دليل
شعر النبط كسره على قول الزلامي مانجبر=رجله بها خله ومشواره على الدنياء طويل
ولياء وصله منك يا محمد ومن مثلك خبر=ينسى الجروح اللي سببها صاحب الفكر العليل
**
الشاعر بندر فلاح الديري
**
رد الشاعر محمد ابن شعيبان الفريدي
**
حييت ياجزل الكلام اللي مثل نقش الحجر=من مصنع الحكمه وصلنا مفردات اخر موديل
يابو فهد منك الشهاده تعتبر مصدر فخر=الله يبارك فيك يابندر راع المعنى الجزيل
مافيه شك ان التباعد بين وجهات النظر=للمجتمع به مصلحه في كل عصر وكل جيل
والغث واجد في حياة المجتمع شعر ونثر=الله يجملنا مع العقيّل بالمعنى الجميل
والشعر حاله مستقره ما على حاله خطر=مادام يلقى واحداً مثلك حريباً للهزيل
لو إن وضعه مثل وضع المسلمين بهالعصر= ماقول غير لكل صاحب معرفه صبراً جميل
والمسلم المومن بحول الله ماعودٍ بالنصر=والمشتكاء لله عظيم الشان هو نعم الوكيل

**
محمد حمد ابن شعيبان

*