محمد بن محيا الفهيدي.....نايف بن مياس

بالصديق الاخ
محمد بن محيا الفهيدي الحربي

لابان نص الشمس والنص غارب
تجددت لو عات قلبي ولاطاب
مار ابتعد عن جملة الناس هارب
عديت من روس المراقيب مرقاب
مثل الشموع اشوف نور الكهارب
واعود مع نجم الثريا ليا غاب
ركبت مع موج التفاكير قارب
ومالذ جبت من القصايد وماطاب
عن ضيقة بالبال راحة محارب
افتح كتاب وتنطوي صفحة كتاب
اخذت من دنياي بعض التجارب
طراد لقمة عيش بديار الاجناب
رحلة عمر واليوم بين الاقارب
بنيت لي بيت مثبت بالاطناب
اشكال كل الناس فيها تقارب
كل البشر مخلوق من طين وتراب
بين الرجال الفرق شارب وشارب
اليا وطاك من الزمن حزم كلاب
وقامت علوم المفلسين اتضارب
واللي خلاف الباب مايفتح الباب
صديقي اللي يودع البال طارب
ماهو ردي عزوم وقريب احضاب
لابينو جمع الرجال الغوارب
حطو لهم في حزة الضيق مجناب
ابو تميم الذرب عن كل ذارب
راع الفعول متعبت كل حساب
يدوس بالرجلين ذيل العقارب
ياطاء على الحيه وياطاء على الداب
عليه من هداج عذب المشارب
قلبان تيما مروية كل شراب
عد الفهيدي ماتجيه الغثارب
له قاعده عند الرياجيل واعجاب
لو كان جنبه سد عن سد مارب
يبفى محمد للزمن سد وحجاب
ولو كان حاتم باقي له مضارب
عن الكرم لو عاش في وقتنا تاب
لو ان طبع الناس هالوقت خارب
تهاب صلفات الليالي ولاهاب
لو معهد التدريب حطه تدارب
تخرجو من معهد الطيب طلاب
تشوف صف الناس وقت التكارب
المسلمين اخوان واصحاب واقراب
قول الرسول وكل قوله م آرب
صلو على المختار يا اصحاب الالباب
اللي صدح بالحق بعد التسارب
الهادي المرسول من رب الارباب
ومنزهينه من جميع العذارب
ومسليمه في كل ماقال كذاب
نايف بن مياس الفريدي