دام الامل له سلك لاتقطع السلك =ما دام ماحطّوا عليك النصيبه

عندما يبدع الشاعر رشيد الفريدي
اليكم هذه القصيدة من روائع الشاعر

ياللّي من الايام قلّت محايلك =وظاقت عليك فجوج نجد الرحيبه
ارفع يدينك بالدعاء لمالك الملك =يفرج همومك دون شك وريبه
اللّي يسوق الرزق ويدير للفلك =والنمل فوق الصخر يسمع دبيبه
مع فارج الكربات وثّق تواصلك =شدّ الرحال وزور مكة وطيبة
دنياك ما تسوى على شان تزعلك =حتى ولو خانتك ما هي غريبه
لا تستهين بسبع الاحزان ياكلك =يروح عمرك للحسايف ضريبه
دام الامل له سلك لاتقطع السلك =ما دام ماحطّوا عليك النصيبه
ولاتخاوي اللّي بالشدايد تجاهلك =واحذر خوي المصلحه لاتغزيبه
ولاهو لزوم تجامل انسان مزعلك =بالمجلس اللي به نميمه وغيبه
اللّي يودّك بالبشاشه يقابلك =واللّي مايرغب شوفتك وش تبي به
خلّك وسيع بطان.. راقي تعاملك =وعن الردى خلّك براس الجذيبه
فعلا صحيح اللّي مايعرفك يجهلك =وفعلا.. سكوتك بعض الاحيان هيبه
لكن تعيش بدار مالك بها ملك =هذي تراها المهزله والمصيبه
وليافعلت الطيب تبقى فعايلك =لو هو صعيب .. وله دروب صعيبه
ولا بد لك من يوم تقفي رحايلك =وتطول من بعد الرحيل المغيبه

قصيدة الشاعر والاعلامي القدير . رشيد محمد الفريدي