بديت باسم منزل الذكر تنزال
اللي خلق خلقه واحصا مللها
الواحد المعبود كبير ومتعال
عن النفس ذكره يبعد مللها
ياماحلا مع سجة البال فنجال
في دلة صفرا والجماعه اقبلها
في مجلس مافيه قيل ولاقال
فيه النشامى كاملين اخصلها
والروض سايل به مصارير وابهال
ترعى النبات اللي تمايل سبلها
عفر الخشوم مخالط لقاح واحيال
ترعى مطب الوسم غنمها وبلها
في ديرة جاها من الوسم همال
عشب اليهق فيها مخالط نفلها
يبني سنام كنه اطعوس وتلال
لاهيش وبرها راعيها نسلها
هذا سوات اهلها في وقت الأبدال
وديرة المرباع راعيها نزلها
لاسمعت الصايح تقل جاهن اجفال
تتبع بعضها اليا قود جملها
يسرح معاها حافي ونعَال
دايم معاها بمحجنه يوهش الها
لي نفس ماتقبل الشتم يعيال
ولايهمني قول الشتايم وهلها
احول عن الشر مع كل محوال
ازمالتي ماكدها عامهلها
ولاتابع الجاهل في كل ما قال
الكلمه الشينه ادور بدلها
وليا صحبت اصحب من الناس عقال
صحبة شرف رسولنا هو مثلها
الواحد منهم مع طيبة البال
يفداك بنفسه والمواقف لهلها
الكلمه الشينه لها عنده اعقال
والكمله الزينه على الكف يحملها
ولناس مايظلم ولا وزن مثقال
اما الرحم لو يقطعونه وصلها
يصوم ارمضان ويتبعه ست شوال
والنفس دايم يردها عن عيلها
لاباع سمح ولاشترى غير محتال
ياخذ القيمه ولا يلاحق هللها
الكذب مايقوله وللصدق قوال
وفالخير لاشاف فرصته يهتبلها
دمث الثفينه واسع الصدر والبال
ون قامت الهيجا يعتبر هو بطلها
وليا جلس في مجلس فيه جهال
استخدم الحكمه والنصيحه بذلها
خير العباد اللي على الخير دلال
ونفسه اليخطت حاسبها وسالها
ولا ستشهد اللي عن الحق ميال
لو تساله بالله الحقيقه غملها
وليا شربت اشرب من العد سيال
واكب الرسوس اللي تخالط طملها
عن الشوك البس على رجلي انعال
وعن الوعر امشي فيافي سهلها
وحمولي اشيلها اخفاف واثقال
تكلاي عالله والبقيه كفلها
نزهت نفسي عن القيل والقال
ولاسمح لها في شي طرلها
ويعجبني اللي لانطق طيب الفال
عنده عقيده صافيه ما جهلها
ولا ينسى ذكر الله في كل الاحوال
قرة عيونه فالصلاة وعملها
يسعى ورى المعروف ركض وذومال
اما رفيقه زلته يحتملها
ياناس الدنيا نازل ورحال
ناس تحط وناس يقفي رحلها
والعاصي يكثر مع البين ولوال
يوم توفى كل نفس عملها
ومن طالع ربه له ترى خير منزال
في جنة الفردوس صافي عسلها
والكافر لبسه من النار سربال
من سورة الحج الدلايل نقلها
يالله تحيينا على خير الاعمال
وتهدي نفوس تايهه في زللها
سبحان من نزل تبارك والانفال
وبرحمته كل الخلايق شملها
يحيي اجيال وبقدرته يفني اجيال
أيام بين الناس ربي دولها
هذا كلام مزود حكم وامثال
نصيحة للي النصيحه قبلها
وصلاة ربي عد ماهل وبال
وعداد مخضر روضها مع جبلها
وعداد ماخالوا مع البارق اخيال
على رسول الله مهدي اجيلها
منقول ممارق لي .. .
الحكيم 
قصيده رائعه بعنوان ( نزهت نفسي عن القيل والقال ) 
العرض الشجري
