مايفيد النصح في عشق الصقاره

ايها الاخوه أعجبتني هذه القصيده وأحببت نقلها لكم

مات طيري مير كيف القى بديله =صافي(ن) لونه ومغتر في حَماره
اشهد ان حلاه نادرة(ن) قليله =القطوع الطيبه غير السطاره
جوهر(ن) عايز وممسوح(ن) شليله =ومن مجسه ما يغطي الكف زاره
والقحوف تقول غيران(ن) ظليله =غير بوز(ن) ضمته فيها جباره
والمناخر بيت نمل(ن) له نثيله =لو تعرض للهواء ما خلف طياره
والله إني مبطي(ن) عن هالفصيله =يختلف بالزين وشوية نزاره
ما يهاب الخرب لو كوش يشيله =صامل(ن) فعله ومع فعله شطاره
يلحق اللي تختفي يم المخيله =لو تروح مع الفضا كبر الشراره
زين طلعه لن بدا راس الطويله =صادق(ن) بالطلع لو هو فالغماره
من يقول الطير كبه لا تشيله =ماوراه الا التعب هو والخساره
ولو يفيد النصح بقلوب(ن) هبيله =مايفيد النصح في عشق الصقاره
والختم صلوا على راعي الفضيله =الرسول اللي شرع دين الطهاره

مسند مازن الميزاني

صح لسان مسند الميزاني
ولاهنت يابوفيصل

على النقل الجزل

تحيتي لك

صح لسان الشاعر مسند الميزاني
وسلمت ابو فيصل على الاختيار الجزل لاهنت

لاااهنت يابو فيصل على النقل