الصدر ممحل غرام ومرتوي صدّه = والعيـن غصن السهر فيها ثنـى عوده

السلام عليكم ورحمة الله وبركاته
إليكم هذه القصيده للشاعر/ كريزي بن شويه
ارجو أن تنال إعجابكم

الصدر ممحــــل غرام ومرتـوي صـدّه
والعيـــن غصن السهر فيها ثنـى عـوده

لولاي رجــــــلٍ محـد وايـق علـى سـدّه
فضحني الشــــوق فـي باسـه ومجهـوده

أدلّـه البــــال بيـــن الضيـــق والـشــــدّه
الوقــــت دوّار والأعمـــــــار مـحـدوده

لـو كـل واحـــــد يجــــي ودّه علـى ودّه
ماطــال صبر العقيم لشـــــوف مولـوده

راعي القنــــاعه ليـــا مـن الزمـن حـدّه
يرضى بحـظٍ ذخـــر جــــوده وماجـوده

يابيــــض الأحـــلام لاتمسيــــن مسـودّه
بشـــايرك فـي نواصـي الخيــر معقـوده

حـــي الله اللـــي عليــه القلـب مـن مـدّه
كنّـه سحـــابٍ يمـد يديــــه للســـــــــوده

أبطـى وحِـس الضلـــــوع يقـــول لابـدّه
رِجله على الـدرب وعيونه على العوده

إيّ بالله أقبــــل جفـول الريـــم مـن قـدّه
يشيـــل روض الجمـــال بكـامل وروده

كنّه بيجـــــزم ولْـه وأنـــــــا علـى حـدّه
وأغضيت شوفــي يميــن شوي ياكــوده

إليـــا تمثنـى قفـص صـــــدري ولا ردّه
ما ياخـــذ القلب فــي رمحين من سـوده

اللي قلـوب أكثـــــر العشّــــاق فـي يـدّه
تسعـى لغايــــاتـه وتطّمـــــح لمقصـوده

لو كـان ماهيـــب ورث أبـوه عـن جـدّه
لكنّهـــــــا كســب حجــــــانـه وعنـقـوده

سلمتـــــه الـــروح وأغليتــه علـى البـدّه
يرعى مفالي حشـــاي ويـــــارد عـدوده

من كثـــر مـا أتـــوق لـه وأغليـه وأودّه
تنقص مقامات بعض النـاس مـن زوده

عليــــه الأشــــواق محتـــــرّه ومـبـردّه
ويلي على نفحة النسنــــــاس مـن نـوده

ما والله أقسى على العاشـق مـن الصـدّه
إلا أنّ كبــــده بحــــــــد الموس مقـدوده

لكنّـــــه العشــــق لامـن زاد عـن حــدّه
ياكثــــــر ماياخـــــــذ وياقـــــل مردوده

إن حطّـــك براســـه ونـــواك مـن جـدّه
مايحتــرم نفســـه ولايمســــك حــــدوده

فيه التنــاقض وجمـــع الضد مـع ضـدّه
حاجـــات معدومـه وحاجــات موجـوده

الله عطـــا الســـوده اللــي ماعطـا جـدّه
والله عطــا جـدّه اللــي ماعطــا السـوده

وسلامتكم