من لا نشدني ما عطيتـه علومـي

من لا نشدني ما عطيتـه علومـي=لو جيت من بعض المطاريش بعلوم
اسكت ومن بعض الكلام مخدومـي=زود الكلام وناقصه فيـه مخـدوم
واجلس على رغبة هواية وقومـي=اسمع وخلي عايـل الهـرج وقـوم
أرفى لساني والضميـر مختومـي=يبقى على ما فيه مغلـق ومختـوم
والصمت حكمـة للبيـب الفهومـي=وكثر اللغـى يثـر مناقيـد وثلـوم
والصمت سترٍ للخطـى والثلومـي=خصلة وقار ويودع الرجل محشـوم
وعلمٍ ما هو مطلوب ما هو لزومـي=خله ويبقى داخل الجـوف مكتـوم
يمكن تقولـه والقبـول معدومـي=ويصير علمٍ ناقص الـذوق معـدوم
وإن نشـدوك الطيبيـن القرومـي=هات العلوم الطيبة واسمـع القـوم
خلـك لجـزلات المعانـي عزومـي=واعرف ترى بالهرج طيب ومذمـوم
وهايبٍ من عند منشـي الغيومـي=الطيب وهبة والردى حـظ مقسـوم
والحر عن هزل المعانـي يشومـي=الطيب نوه والردى عنـه مفطـوم
وإن شفت لقاف السوالـف يزومـي=هرجه كثير وفيه ذوقٍ مـن الثـوم
اعرض وخله في سبيلـه يعومـي=خله عساه بضيعتـه دايـم الـدوم
واصبر ليا لمـت عليـك الهمومـي=ساعة بدل ساعة ويوم عوض يـوم
واطلب من الرب الكريـم الرحومـي=اللي من الظالم نصـر كـل مظلـوم
وان شفت من بعض الرفاقة وهومي=لا تنطح الخـلات بالسـب واللـوم
اترك وسامح والردى مـا يدومـي=والطيب يبقا لك مع الحـي مرسـوم
إلا ليـا نـاش الكـلام الخشومـي=الصبر ما هو زين والخشم ملطـوم
صبرٍ على العوجا دليـل الرخومـي=والذل مـا هـو للمناعيـر للبـوم
والحق لا تخفيـه تحـت الكمومـي=عده ترى من يكتم الحـق محـروم
واترك سبيل مضيعيـن السلومـي=نقالة الهرجة علـى غيـر ملـزوم
اللي على الغافل تشـن الهجومـي=بياعة الذمة رخيصـة بـلا سـوم
دحامة المجلـس كبـار الجرومـي=جرمٍ كبيـر ولبـة العقـل مفـروم
هدايـد(ن) لمعورجـات الرقومـي=ضبع الرجـال وللغناديـر داهـوم
تمت وربي له صلاتـي وصومـي=على الرسول اللي عن العيب معصوم
...................
الشاعر / مقحم حمود الحربي

صح لسان الشاعر مقحم الحربي

قصيده جزله من البدايه الى النهايه حكم



صح لسان شاعرها مره ثانيه

وشكراً لك اخوي الحكيم على الاضافه

ولا تحرمنا من جديد هذ الشاعر مع إني اول مره اسمع له

لاكن واضح إن ورى هاالقصيده شاعر متمكن

دمت برعاية الله وحفظه

قصيدة رائعة
مشكور الحكيم

اخوي الحكيم
بيض الله وجهك على الانتقاء الجزل
صح لسان شاعرها وسلمت على الاضافه لاهنت

قصيدة تحتوي على التجارب والحكمه
صح السان الحربي
وصح بدن الناقل احسنتم الاختيار

كل الحضوووووور أشكركم علىمروركم...المعتاد ولاعدمنا تواجدكم ابدً .

صح لسان الشاعر

قصيده جزله تحمل في طياتها الأبداع والتميز

لاهنت أخوووي على النقل