هذه القصيده قالها شاعر مطيري في جزاع بن مقبل المراس
البارحه يوم المخاليق هجاع = هاضت على قلبي هواجيسه اسراب
عذلت قلبي لايهوجس ولا طاع = وافتر صندوق الحشاء فر دولاب
يا راكب اللي يامشى يطوي القاع = يطويه طية كغد بيدين كتاب
ما ركبو فوقه مواصير وشراع = ولا طببه راعيه للسوق جلاب
عليه قرم ٍ بأشهب اللال بتاع = لو طالت الفرجات ماهو بهياب
ملفاك عندي على بيت جزاع = حيث ان ابو مقبل يهلي بالاجناب
بيبان بيته للمسايير شراع = ما علّم الحرمه على صكت الباب
من اولاد راشد ممنت كل مرتاع = لا جاء نهار فيه تجديع الاسلاب
حريبهم عقب الصعب يجي مطواع = عاداتهم بالحرب تطويع الاصعاب
بشلف ٍ يخلن المعاليق مزاع = وحدب ٍ يقصن الجماهي والارقاب
كم واحد ٍ جاهم يبا المال طماع = واقفت جماقيله مع الخد هراب
من خطر اللي في لقى القوم قطاع = اقطع من المنشار في قطع الاخشاب
لصاح صياح الضحى جوك فزاع = تلقى زعيم القوم بالكون منصاب
الذيب يشبع في طرفهم ليا جاع = ما ياكل الا عظام دسمين الاشناب
ارجع واسند بالقصيده لجزاع = مكرم الضيفان حلال الانشاب
قل جزاع ياجزاع ياوافي الباع = دنياي حدتني على غير ماطاب
الواسطه ضاعت ومعها الامل ضاع = والوقت جار وصاحب الوقت غلاب
وذكرتكم ياشوق منقوش الاصباع = لا خاب ضني بالمعارف والاصحاب
ابي وظيفه بس ماني بطماع = ابذل لي المجهود مع طرح الاسباب
وصلاة ربي عد ما هب ذعذاع = وعداد نجوم الافق وعداد الاعشاب
على نبي ٍ لاهل الدين شفاع = بالماقف اللي به حسنات وعقاب
مشاركة: قصيدة في جزاع المراس 
العرض العادي
