يا باغي العليا لها عشرة ابنود ** سجل و أنا بأمليك و أحفظ عددها..!!

فهد الطميشاء · 25-07-12, 08:16 PM

يا باغي العليا لها عشرة ابنود = سجل و أنا بأمليك و أحفظ عددها
من شأن ما يلحقك عيب(ن) و منقود = أحفظ وصاتي و الوصاه إعتمدها
أوصيك قبل الجسم يدبي به الدود = في حفرة(ن) لابد نسكن لحدها
دنيا العنا فيها مشاريب و عدود = و كم واحد(ن) له حاجة(ن) ما وجدها
عليك بالتقوى ترا العمر محدود = و أردع هوى النفس الدنية و قدها
و أحفظ صلاتك تكسب الرزق و الفود =تكسب مكاسيب الحياة و سعدها
و صوم رمضان و زك يالشامخ الطود = ترا البيوت النايفة من عمدها
و جالس هل التوحيد و العز و الجود = و أترك مقاريد العباد و قردها
اللي على التفريق ياتونك إحشود = فصيلة(ن) دب الجهل في جسدها
و أحسن جوار الجار لو كان مقرود = لو جار نفسك لا تبين نكدها
و الضيف عطه الطيب و الطيب مردود = أكسب جناب الطيبين و سندها
عقب الشحم و البن قدم له العود = خلك من اللي من لفاها حمدها
و بنت الردي لو هي زلالا(ن) وقرهود = حذراك تقربها و تمسك بيدها
خذ بنت قرم(ن) عند الأجواد محمود = لا جاء نهار الهوش بين ولدها
و زلة رفيقك لا إلتفت دون مقصود = لا تمسك الزله و هو ما قصدها
ثلاث مررها و لا شك بشهود = و الرابعة شب الحطب لا وردها
هذي عشر و إن كان تبغاني أزود = سجل على عشر الوصايا و زدها
الظلم شين و تالي الظلم مردود = و الغيظ شيطان القلوب و كبدها
و الصمت زينه و الحكي سيف محدود = و الحق غيمه و التباغظ بردها
فكر و ميز و أعرف البيض و السود = و أحذر قلوب الحاسدين و حسدها
يا أبوك بين الناس طارد و مطرود = ما تجهلك بعض الحرار و هددها
و إن ضامتك دنياك و أصبحت مضهود = فأطلب من المولى يحلل إعقدها
الواحد اللي كلنا لأجله إسجود = اللي جميع أعمال خلقه رصدها
هذي نصيحه و أنت معطيني أوعود = و أهل الوفى و العرف توفي وعدها
قدمتها بالمسك و الطيب و العود = زرعتها لك زرع و أنت إتحصدها
حميتها من دون ملح(ن) و بارود = خوف(ن) عليها المنتقد ينتقدها
و ختامها العليا لها أشروط و بنود = يا اللي تبا العليا تمعن و عدها

للشاعر مقيت القحطاني