وترا الشك ودى له رياجيـل يـم شهـار % % تربـع بليـس بروسهـم ليـن خربـهـا

قصيدة للشاعر / عبدالله بن زويبن

اتمنى ان تنال استحسانكم

قصيدة تستحق القراءة مرار وتكرار :

عسى الله ينجيني من المدفـع اللـي ثـار = بعيد المدى اللـي كـل الأهـداف يعطبهـا
يخـوف ويرعـب كـل ماثـار ياسـتـار = يهـد المبانـي والـرواسـي يشطبـهـا
حديث المديـل اللـي علـى كهربـا وزرار = عسى الله يعيـن القـوة اللـي يحاربهـا
رماني وجاني من سهومه مطـر وغبـار = ولغـات المدافـع بالصواريـخ أخاطبهـا
ألا ياهـلا يامرحبـا والكـبـار صـغـار = وتـرى النـاس تهديـد العـدا مايهيبهـا
عزمنا على عسـف النظـا نسـع الأزوار = وجزمنا على مس الكتـب فـي غواربهـا
وكربنا الأشدة فوقهن في حقـب وحضـار = ونسفنـا مواركهـا وشلـنـا مزاهبـهـا
ونوينـا علـى رد النقـا للعميـل جهـار = على شـان صعبـات المواقـف يجربهـا
تـدور المعـارك والجنايـز لهـا قـبـار = لهـا مـن يكفنهـا ويركـز نصايبـهـا
حصل ماحصل والمبتـدي ماعليـه حيـار = وترى اللي تقـدم لحيتـه عنـد شاربهـا
وترا الشك ودى له رياجيـل يـم شهـار = تربـع بليـس بروسهـم ليـن خربـهـا
مع الدرب الأيمن رح وخل الشكوك يسـار = تراهـا بعيـدة عنـك وأنـتـه تقربـهـا
عطيناك بشـتٍ ماتخالـف بهـا الأنظـار = نقينا المشالـح ليـن جبنـا لـك أطيبهـا
وقبلت الهدية ثم مدري وش اللـي صـار = لقينـاك يـوم تصلـي العـيـد قالبـهـا
وأنـا ياعلـي مانـي مـراوغ ولا غـدار = أقـدر خويـي والمحابيـل مـا أنصبهـا
وأجنب عن الشينة ونفسـي لهـا مقـدار = مع الطيب تمشـي والـردا مـا يناسبهـا
وأنا ماني اللـي يعتـرض سكـة المـرار = أنا لي طريـق وباقـي الطـرق أجنبهـا
أخل العرب وأسرارها ما أبحـث الأسـرار = أجنـب ولالـي فـي خطاهـا وصايبهـا
أعرف أن لو أنه يطـق الحجـار حجـار = تقـوم السبـاع إلهـا سبـاعٍ تجاوبـهـا
وتصير القضية مسألة بحـث واستفسـار = وعلـى راس منشيهـا تعـود عواقبـهـا
وتراك انت راع الرمية اللي بـدون عيـار = طريقـة خطـا مـدري عليـه مصوبهـا
تبجح وتنظـر لـي بتصغيـر واستهتـار = كبيرة عليك ولا أعـرف ويـش واجبهـا
وتقول أنك انت الشاعر الماهـر البيطـار = جميـع المثايـل مفـردٍ فـي غرايبـهـا
وأنا خابر انك لـك بضايـع مـع التجـار = على كل سـوقٍ يشـري الزيـن تجلبهـا
وبالأسهم تساهـم بالجنيهـات والـدولار = مع أرقى البنوك اللي تضاعـف مكاسبهـا
وترى كل ديرة غيـر ديـرة بهـا خبـار = أهـل معرفـة بسباعهـا مـن ثعالبـهـا
وترى كل ديرة غيـر ديـرة بهـا صقـار = يعرف الصقور الرقش ويعـرف أرانبهـا
وأنا يوم سويت القصيـدة خبـر وانـذار = وأنا ما أحسب انك تشتبـه فـي مآربهـا
وتعبت وتعبنا والنتيجة مـا غيـر أصفـار = والأصفـار بالأصفـار وشلـون نضربهـا
وأنا مسهمي ماهو بناقـص مـع الشعـار = أروض صعيـبـات المثـايـل وأرتبـهـا
وأسوق القوافي لين تمشي مـع المعبـار = كما سـوق هجـنٍ حنـوة العـود تدبهـا
على درب شيـخٍ كـل يـومٍ يصبـح دار = يسج النشيـط مـن النظـا ليـن يتعبهـا
وأجيب البيوت المفـردة وأتـرك التكـرار = نقيـض الفـوا رغ بندقـي ماتزهبـهـا
وأطب الفياض المخضرة واقطـف النـوار = اقـص الزهـور الناعمـة مـن ذوايبهـا
واطب المـزارع واتنقـى مـن الأثمـار = أنقـي نبـات اثمارهـا مـن شوايبـهـا
وأغوص البحور اللي بها الحص والمحـار = وأخلـص عميلـي دينتـه قبـل يطلبهـا
وأعرف البضايع واعرف السوق والأسعار = واثمـن واقـدر سلعتـي قبـل أطببـهـا
وترى اللي سواك نشيمه شيمـة الخطـار = وفـاء والنفـوس الطيبـة ليـه نغضبهـا
لاكنا على اللـي فيـه زودة لغانـا حـار = مشاهيـب نـارٍ مـن زمهريـر نجذبهـا
تواهج توهج شقر الأسياخ وسـط النـار = لـوانـا نمثنيـهـا صـفـاتٍ تذوبـهـا
وترى الشعر فتل ونقض ماهو بخبط أشجار = وترى الفرق بعقـول الرجـال ومواهبهـا
وترى الحكمة البلغة وباق الكـلام بخـار = يمـر الحلـوق الناشفـة مـا يرطبـهـا
والايـام والدنيـا تـرى مالهـا استقـرار = علـى نجومهـا تطلـع نجـومٍ تغيبـهـا
الأيـام تخفـي غيبـهـا والـزمـن دوار = بطش بالملـوك وحالهـا عـن مناصبهـا
على عروشها مثل النوادر علـى الأوكـار = وتصـف العساكـر بالطريـق لمواكبهـا
تلاشوا مثل نبتٍ بـروض وطـاه عصـار = عواصـف ريـاحٍ طيـرت بـه هبايبهـا
نواعم غصونه طار فيهـا الهـوى التيـار = وبقايـا عروقـة جـارح السيـل سالبهـا
تعيـش الأوادم بالأمـل والعمـار قصـار = وراهـا محاسـب والله اللـي يحاسبـهـا
رجانـا وملجانـا هـو الواحـد القـهـار = ولـي العبـاد اللـي يحقـق مطالبـهـا
قرينـاه بالغنـة والأخـفـا وبالأظـهـار = وبالإدغـام واللـي بالحركـات نعربـهـا
وتبعنا طريق اللي كسر شكوكـة الكفـار = ونقيـم الصـلاة الواجبـة مـع رواتبهـا
وتركت المجال لصاحبـي لجـل مايحتـار = تقصـرت ولـى لـو تقصيـت أشيبـهـا
وأنا خابر انـه صقـر ماياكـل االاسـوار = وطعام الصقور الجارحـة مـن مخالبهـا
وتقبـل تحياتـي وهـذا اخـر المشـوار = قصيـدة جديـدة بـأزرق الحبـر كاتبهـا
قصيدة تشـره مابهـا شجـب واستنكـار = نظيفـه عفيفـة مابهـا مــا يعيبـهـا
على مبتداها من نسيـج الحريـر شعـار = وعلـى منتهاهـا العـود الأزرق يطيبهـا
وصلاة الله البـاري علـى سيـد الأبـرار = شفيـع الخلايـق يـوم تكشـف حقايبهـا
نبيٍ أوحي لـه بالرسالـة وهـو بالغـار = بها خصه الله مـن عبـاده وفـاز ابهـا