اصعب زمان يعيش فيه انسان هو ...

اصعب زمان يعيش فيه انسان هو هاذ الزمان
رغم جدي قال بأنه عاش في اصعب زمن

عز الله انه لو تراهنا يبي يخسر الرهان
الله يغفرله ويرحم كل من لبس الكفن

زمان جدي كان ياماكان في ماض الزمان
انسان عايش بالحياه ومزهبه تمر ولبن

زمان يوم ان المعارك حاميه لسيف شان
يوم الرمك تلحق مع الفريس وترد الهجن

الي معه ناقه وله عنزين ولا خمس ضان
يثني على الله لاحلب عنزه وغمس بالسمن

زمان يوم ان الردي يهزب ومقداره يهان
ويقدر الرجال بالمجلس وينهان العفن

زمان يوم الناس تفرح بالصلاه وبالاذان
يوم النفوس من التسامح كل ماضاقن عفن

زمان يوم ان الولد ياذيب ولاياحصان
يوم الولد و اخوه مثل العين في وسط الجفن

يوم الولد لاشاف شي يجنن يصيبه جنان
يوم البنات من الستر ومن الغطى مايعرفن

يوم الخوات فراشهن واحد ولو كانن ثمان
يتلحفن منهن ثلاث وخمس مايتلحفن

البرد يذبحهن وبين عيونهن ريح الجنان
والجوع طاويهن وهن لرضا امهن يتلهفن

عاشن على صعب الحياه وهمهن عرضن يصان
هن عزوه لرؤس الحمايل لانهن ماقد هفن

بناتهم مايفلتن لو كان مفلوت العنان
ستر الوجيه ابدى من رجول من الرمضه حفن

يبقى لنا ذكر الوفاوالطيب من طبعه يبان
مثل امهات المؤمين الي علينا ماخفن

واليوم انا مانيب قايل غير ياصعب الزمان
الغرفه الظلماء لن انوارها البيضاء طفن


زيـاد بن حجاب

سلمت اناملك علىهالقصيده الي اكثر من رائعه
صح لسان ابن نحيت
والله يعطيك العافيه على النقل
تقبل مروري .

مــــــرحبـا مليــــــــــوووون

يابــو نـــايف

اللــه يرضــى عليــكـ ويطــول بعمــركـ

صح لسان الشاعر
زياد بن حجاب بن نحيت ولاهنت يالغالي
على النشر الموفق وشكراً لك الاضافه الرائعه
تحيتي

صح لسان
الشاعر زياد بن نحيت
وسلمت يابن نومان على الاضافه لاهنت

يــــامـــرحبـا
اخــوانــي/

غــازي

ابو حمـد