سالم السامود يرثي الشيخ المرحوم مفلح ويسند على الشاعر الاستاذ رشيد الفريدي

هذه القصيدة رثاء في المرحوم الشيخ / مفلح بن ناصر الفريدي
وهي مسندة على الشاعر الأستاذ / رشيد الفريدي

افتر هاجوسي على الشعر يا رشيد = من بعد اخذ له بالضمير اجتلاده
الهاجس اللي زود الجرح تزويد = جرح ٍ قديم وهاجس اليوم زاده
حرك شجون اسكون عوب ٍ معانيد = ولع فتيله من شرارة زناده
يا رشيد عمر الوضع ما فيه تمديد = الصبر ماهو قابلن للزياده
لا صار عندي موهبت شعر واجيد = تصخيرة المعنا بعرف وركاده
والشعر له ميقاف عند القواصيد = وكل ٍ على ما قيل حسب اجتهاده
ورد الثنا يا رشيد طبع الأواليد = اللي بهم للطيب صبر وجلاده
مرحوم ياللي شيد الطيب تشييد = وله في سما العليا مطامع وراده
مرحوم ياللي ما قرب للمناقيد = بعيد عن درب الردا والنقاده
بينه وبين الطيب عرف ومواعيد = لين اعتلا بالمجد ذروة شداده
بالطيب له روس القبايل شواهيد = والمرجله عنده عليها شهاده
شيخاً له ارقاب المراجل مسانيد = الطيب طبعه والمعزه مراده
شيخاً حبا له للجزاله مواريد = قرماً معاشقها وهو في مهاده
مفلح ولد ناصر عشير الصناديد = اللي فعوله تستحق الاشاده
ابي امدحه وكرر القول واعيد = ولا قول لي قول ٍ ضعيف استناده
مديح مفلح ما يبيله تواكيد = له في سما العليا حصانت سياده
يا رشيد ليت الموت ما صفط القيد = لين استشرنا لجل نعطيه افاده
ونعلمه في عالم ٍ ما بهم فيد = ونقول فيهم شن حرب الاباده
وياخذ بدل مفلح على غير تحديد = من الوجيه اللي عليها رماده

الشاعر / سالم بن ضعيان السامود المخلفي الحربي

صح لسان الشاعر
سالم بن ضعيان السامود المخلفي
ورحم الله مفلح بن ناصر رحمة واسعه
ولاهنت اخوي فهد سالم المخلفي على النشر
لك جزيل الشكر والتقدير
تحيتي

رحم الله الشيخ مفلح واسكنه فسيح جناته
ووالدينا والمسلمين
صح لسان الشاعر
سالم السامود مرثيه رائعه
وسلمت اخوي فهد سالم المخلفي على الاضافه لاهنت