قصيدة خل الحكي وامشي معي نقطع البيد ,, للشاعره / ريوف الشمري ,,

خلّ الحكي و امشي معي نقطع البيـد= يمكن نلاقي في فضـا البيـد راحـه
الله مـن طـول العنـا و التناهيـد=و الله مـن ليـلٍ تأخـر صبـاحـه
ضجّ الرصاص و مَلّ سجن البواريد= متى على الباغين نطلـق سراحـه
نفس المواقف و الحكي نفسه انعيـد=عزّي لمن صار الحكي هو سلاحـه
شعبٍ جهل بالحرب رميٍ و تسديـد= يسْهل على المستعمريـن اجتياحـه
نـزداد ميـلٍ للكسـل و المقاعيـد= و عدونـا يـزداد ظلـم و وقاحـه
باسم (السلام) يذلنا كيف مـا يريـد= و باسم (العداله) صار يركز رماحـه
جَدّد طمعه بـ(سوريا) دانـة الغيـد= و صارت تحوف حدودها من رياحه
دايم كـذا فـي أول الأمـر تهديـد=ثمٍ علـى البلـدان يبسـط جناحـه
نبكي قهر أو نِتْبـع النـوح تنهيـد=في هالمواقـف مـا تفيـد النياحـه
عطني رصاص و قلب ثابت ولا يحيد= حقي أرد النـذل و أكبـح جماحـه
لا بـد ناقـف للعـدو كالجلامـيـد= نضرب على الهامه و نثخن جراحـه
لجل العَدِل صوت المدافـع زغاريـد= و السجن لجل عيون الأسلام واحـه
إمـا كـذا و إلا لفتنـا المواعـيـد=و أضحـت بلدنـا للعـدا مستباحـه
وشي حياة الحرّ لا صار لـه سِيـد=كافر سلب أرضـه بحجـة صلاحـه
امشي معي يا ضايق الصـدر للبيـد=يمكن نلاقي في فضـا البيـد راحـه
و امشي نشيّد مجدنا اليـوم تشييـد=خلـي بقلبـك للتحـدي مسـاحـه
عسى تـزول همومنـا و التناهيـد=و عسى طويل الليل يقبـل صباحـه

الشـــاعره : ريوف الشــمري

شكرا ع الاضافه أعجبتني


وصح لسان الشمريه يابعد حيي

اخوى
ذعذاع الشمال
شكراً لك الاضافه وصح لسان الشاعره
السنعوسيه ريوف
تحيتي

باهلا فيكم ,,

قصيده تحاكي واقع الامه

لاهنت ياذعذاع على النقل

تحيتي لك

ياهلا فيك ابو عبد الا له ياهلا ,,