قصيدة( الشاعر عوض ناصر الفريدي ) في حفل*ابو خيف الفريدي

هذه القصيده كتبها شاعرها عوض ناصر الفريدي بمناسبة حفل زواج الاخ/عوض ابن محيميد ابو خيف الفريدي
الذي حضره عددا كبير من شيوخ القبايل والاعيان عددا من شعراء النبط والمحاوره
المعروفين بتاريخ 26 / 1 /1433

بسم ربعي وانا شاعر وامثل قبيله =مرحبا يالنشاما من جميع القبايل
مرحبا عد ماهلت مزون المخيله =وارتوى القاع منها وادرجن المسايل
التراحيب سلمن للرجال الاصيله =مرحبا والسرور يزود والشك زايل
ليلتن جمعتكم تعتبر خير ليله =مالها بالليالي سابقتها مثايل
قدركم بنن اشقر يقعد الراس هيله =وزرقن قيمته ماطالها كل طايل
باالمطايب وتحته جمر نارن شعيله =يتصاعد دخونه كنه جبال حايل
عند ربعن لهم باالطيب ساس وفصيله =عزوة اولاد راشد مذربين الفعايل
اليماني كريمه والفعايل جزيله =مانقول الكلام الا عليه الدلايل
يكسبون الوفا والمرجله والفضيله=في جديد الليال وبالليال الاوايل
الفريدي فخرنا عز من ينتميله =عزوتن باللزوم تهون معها الثقايل
قالها شاعرن قبلي من اطراف قيله =الفراوي شهد لهل الوفا باالجمايل
مقدم القوم ابن حماد حام الدبيله =يوم قدح الزنود ويوم شب الفتايل
يوم كلن من التاريخ ياخذ حصيله =قسمنا من سنامه في نهار الصمايل
اصلنا حرب مروين السيوف الصقيله=يوم نجد العذيه بين منكف وصايل
من ينوش الحمى والجار مانرتخيله = ماله إلا المهند فوق قب الاصايل
الدخيل نحشم له والعدو نعتديله =والخوي كم ذبحنا فيه يابس بلايل
زبدة الهرج يكفي عن كثيره قليله =والوفا والمراجل من طبوع الحمايل
ياعوض جيت ابارك لك بليله جميله =الف مبروك ياواف النسب والخصايل
كل طيب نقدر دعوته ونعني له =ناصله وانتشرف يوم الرسايل
والمراجل على الطيب ماهي مستحيله =وانت طيب وطيبك وارثه من سلايل
انت مثلك يشرف والمدح يستويله=واتشرف واقول اني بشرواك قايل
شاعرن ماخذيت الشعر قصد ووسيله =مطلب إلا الكريم اللي يسوق المخايل
الرفيع ارتفع له والتحت مانحي له =والمدايح بهلها من كبار الفضايل
الشاعر عوض ناصر الفريدي * ابو ماجد*

حفل رائع ..
تمنياتنا لأهله التوفيق والسداد .

وألف ألف مبروك .. ودامت أفراح الجميع .

صحت معاني الشاعر / عوض بن ناصر .

وسلمت مبدعنا / أبوصالح .

على روعة الاختيار .

تحيتي وتقديري .

من اجمل ما قرأت
صح لسان ابو ماجد على هذا البوح الصادق
مدح رجل يستحق المدح
كنت من الحضور وقد شدنا ابا ماجد بقوة القصيدة وجزالة معناها
زاد من ذلك جمال القائه
شكرا لك ابا صالح وكل الشكر والتقدير لشاعرنا القدير عوض بن ناصر

تسلم اخي الغالي
وصح لسان الشاعر ابو ماجد والله يوفق العريس
وحفلة بمصداقيه شرف للقبيله وجملونا قدااام الاجنااااب الله يوفقهم ولاهي غريبه على ربعي اولاد راااااشد

تحيااااتي وتقديري للكل

بيض الله وجه ابو ماجدقصيده رايعه القاها في حفل زواج اخي عوض نشكره عليها كما نشكره على حضوره المشرف والشكر موصول لك اخي ابوصالح النقل لك اجمل تحياتي

اخوى بن مطيع لاهنت
على النقل وصح لسان ابو ماجد والله
يوفق اهل الحفل ونقول لهم زواج مبارك
بإذن الله تعالى وعقبال البكاري
تحيتي

صح لسانه وشاعر مافيه حيله دائمآ متميز في قصائده

ونبارك لرجل الأعمال :عوض ابن محيميد أبو خيف الفريدي

ألف ألف ألف مبروووووك

فكان حفل ناجح من حسن الضيافه والأستقبال وكرمهم المعتاد ليس بالغريب عليهم

يعطيك ألف عافيه على النقل الرائع

صح لسان ابو ماجد
هذه عوايده اذا حضر شرّف واذا قال اعجب
حضوره مهيب ووفاءه قريب
،،،
ابيات لاشك اسعدت الحاضرين وانصفت القائمين
وبيض الله وجه ابو ماجد على تمجيد قبيلته وربعه
ومن كان حفيد فارس فهو اليوم في مجاله فارس ولمجده حارس
،،،
صح لسان ابو ماجد
والتهنئة لال ابو خيف على حفلهم الطيب
والشكر لمشعل المجالس على الاضافة الجميله
لاهنتم
.......

صح لسانك ابوماجد على هالابداع

شكرا ابو صالح