قصيدتي في والدي اطال الله في عمره

اعزائي اعضاء ومراقبين ومشرفين وزوارمجالس الفردة كل عام وانتم بخير بمناسبة السنة الهجرية الجديدة اولا اعتذر عن قلة مشاركاتي لظروفي ثانيا احب اهديكم هذه القصيدة واللتي كتبتها في والدي حفظه الله وامد في عمره على طاعته الوالد الله يجزاه واياكم خير صاحب طاعة ومن صفاته مايحب يتكلم في احد غايب الابخير واناما امدحه كل ربعنا اللي يعرفونه يشهدون لي وذات يوم جاء عنده شخص لايعرفه حق المعرفة وبدا يحش بالاجواد ذا ناقص وذا زايد وقاطعه الوالد بكلمته المعهودة دع الناس, الله يهديك دع الناس الله يهديك ولم يستجب فنهره الوالد للمرة الثالثة قائلا فتش نفسك اولا ودع الناس عنك فرد الشخص وش فيها نفسي قال الوالد اذا انك ملزوم تفتش عيوب الناس ففتش نفسك اولافصمت الشخص وذهب وهجر مجلس الوالد وبعدها جتني اخبار انه يصرح في جلساته الخاصة عند بني جنسه, انه بيكتب قصيدة هجاء بالوالد فكتبت هذه القصيدة للوالد ووصلتها للشخص بطريقة غير مباشرة وفهمها الرجال وكف شره, والحمدلله واليكم القصيدة امل ان تنال اعجابكم طبعا القصيدة قديمة وليست من جديدي

يابويه آمر خدمتك قدر ماطيق = لجلك يصيرن الصعايب سهايل
عندك حرارن كلبونا مطاليق = نفرك عرام الضد لو جاك عايل
اضربنا النعسان لين انه يفيق = وادحم بنا جنب الزمن لاتمايل
رهن الاشارة في جميع الطواريق = بالبرد ولا حدر شمس القوايل
حقك علينا كبر ابانات وطويق = والنير وجبال المدينة وحايل
ياواحدن يازن جميع المخاليق = كل البلاد شعوبها والقبايل
ياليت والله من قفص صدري تويق = يامن تصدر للصفوف الاوايل
يامعلقن نصف الرياجيل تعليق = بالدين والدنيا وباقي الخصايل
يابهجة ضيوفن يجونك على الريق = جارن عليهم في سفرهم هوايل
راعي دلالن مثل لون الغرانيق = علاج من يشكي الخوا والغلايل
وصيانين ماتنحمل بالمعاليق = تزبر عليها الكوم مثل النثايل
وجنابن الين من رفا القطن ترقيق = وصدرن صفاته نادرات قلايل
رحابته تبعد عن الضايق الضيق = تزيح عن باله كئيب المسايل
في حال وإلا حال ماتنوهط ضيق = لا غلقن دون السلام الوسايل
وقت القشر بحلوق عدوانك عليق = تركي على كبد الخصيم الملايل
مدهال وافين الخصال العماليق = دايم محللك ماتجيه الهتايل
اهل النمايم جامعين التلافيق = اللي يبون المرجلة بالتحايل
وانته عليك الهون ياراعي زريق = مالك ومال اللي برز بالجمايل
من قاعة الدنيا تبي قمة طويق = كانك تطاول للسماء مانت طايل

صح إلسانك ع القصيده .. الله يطول بعمر والدك ويحفظه ويخليكم له ..
الهرج والحش بالناس صفات مذمومه .. الله يبعدنا عنها
تحياتي وتقديري ..

صح لسانك قصيدة رائعه
اطال الله بعمر الوالد على الطاعة
واكل لحوم البشر صفة قبيحة
حرمها الاسلام

صح بدنك وجزاك الله خير اخوي عطر الشوق اشكرك على المرور وتقبل تحياتي

صح بدنك اخت ريم الف شكر على الاشاده والمرور

صــح الســانك واللــه يطــول بعمـــر الــوالــد دمــت ودام تــواجــدك

اخي الشاعر علي اشهد بالله شهادة حق

اعرفه حق المعرفه
اطال الله بعمره ورزقكم الله بره

صح لسانك جزل وبدع بحر وقافيه
ومهما قلت او قلنا
قليل بحق ابو صالح
لك اجمل تحياتي ومودتي

صح بدنك اخوي عبدالعزيز وجمل الله حالك وشكرا على المرور

اخوي ابو وافي صح بدنك وجزاك الله خير وشكرا على المرور

صح السانك على القصيدة الجزلة

ويستاهل الوالد هذه القصيدة واكثر