مجراة الشاعر عايد بن ضواي الفريدي لقصيدة الشاعر فيحان بن ناحل الحربي

مساء الخير للجميع
هذه القصيدة للشاعر فيحان بن ناحل الحربي رد عللى شخص يقول وين شعار حرب عن شاعر المليون
بتاريخ 12/1428هــ

اللي يبي المليون ينصى الأمارات =واللي يبي ما عند ربه يصلي
وأظن والله ما عليه ملامات =شي يعل الكبد ياناس علي
وشلون شاعر تنتخبه المسنجات =والشاعر الموهوب خله يولي
في شاطي الراحه صراخ وهتافات =وتنطحك روضة كالغزال المطلي
والمسألة فيها رسوم وحسابات= ومليونهم تل الملايين تلي
واللجنه اللي شكلت خمس دولات= مبرمجة في شفرتن ماتحلي
واحد يجيز واحدن فيه فزعات=بيرفع عقاله لابن عمه يهلي
وللشعرناس وللشواعير وقفات=واللي يغالطني يجي في محلي
سبيل مات وماقفه حي ما مات=وقفة شرف ماهي مزوح وتسلي
وحرب العريبه حاربت قبل دولات=وتاريخهم مسطر بالسجلي
وان كان تبغى الحق اقرا السجلات =وبعده تراك من الغلط بألف حلي
ترى سجود السهو مشروع بالذات=للي سها اثنا ركوعه يصلي

وهذه القصيدة مساندة لقصيدة فيحان للشاعر ابوطلال عايد بن ضواي بن حماد

يسلم لسانك وأنت قد المهمات=رديت شعرن يابن ناحل يسلي
سكت من ينبح ولابه مروات=اللي علومه بالمجالس تعلي
تسلم وتسلم حرب في كل الاوقات= حربن كعام اللي عليهم مغلي
حربن هلا المعروف وأهل المروات=أشعارهم مزنن نشاء مستهلي
أشعارهم عبر العصور القديمات=وفي وقتنا الحاضر علينا تطلي
والشعر مع كل القبائل له أصوات=وخص بقبيلة حرب صوته معلي
ماهم بحاجه روحتن للأمارات= شعارنا كلن بهم يستدلي
قله يفتش بين كل الملفات= ويبحث سجلات الزمان المولي
ماهي علوم مدونين المسنجات =اللي قصايدهم تغيض المصلي
هذا ولك مني بيوتن جزيلات =أهديك يافيحان قولي وأهلي
تم الجواب اللي نظمته بالأبيات= تعبير عن ما دار فكري وكلي
من شاعرن ما روجتله مجلات = أفخر بحرب وكل حرب هللي

وسلامتكم

الاخ فارس الخيال
اضفت مشاركتين رائعتين من شاعرين قديرين ...
ومضمونها رأي شخصي لكل منهما ولا يلزم احد
،،،
كل برنامج وكل جهد له ايجابياته وله سلبياته !!!
المهم تجديد الافكار والرؤى
،،،
وبرنامج شاعر المليون بالاجماع كان انجح برامج الشعر النبطي
وقد انتج شعراء واظهر للعلن آخرين ...
اما قضية المادة فمن الذي لايسعى لها هذه الايام !!!
فلا تنسى برامج تلفزيوننا العزيز في رمضان
،،،
اخي يجب ان لا نكيل بميزانين !!!
وحرب شاركوا بالبرنامج وكان شاعرنا الشيخ زياد بن نحيت اول
من فاز من شعراء السعوديه عن حرب وعن كل القبائل والعوائل ...
،،،
شكرا لك وللشاعرين الفاضلين
لاهنت