خلك على ربعك حصانٍ محصن (( حمود الفريدي))

بسم العظيم اللي بديعٍ خلقه=علاّم ما تخف الصدور بسديدها
سبحان من سبّح له الكون كله=حتى الطيور تسبحه بتغريدها
يا غافر الزلات تغفر ذنوبي=في ساعةٍ يشيب فيها وليدها
يقول من عذب المعاني يجيدها=ينقى جزايلها وياخذ فريدها
مثايلٍ يطرب لها سامع المثل=اللي يعشق من المثايل جويدها
ياخذ لبيب العقل منها فوايد=يبقى صداها بالخيال ويعيدها
ياسامعٍ ما اقول بالله تنتبه=جاهد هواء نفسك بشيٍ يفيدها
صخّر شهوة النفس في طاعة الله=قدّام صياد البرايا يصيدها
ترى حياة المرء لحظة وتنتهي=لاتخدعك دنيا الفنا في رغيدها
أد الصلاة الواجبه لاتهاون=باوقاتها بشروطها بتحديدها
ترى صلاة العبد هي راس ماله=اخير مما بالبنوك ورصيدها
واخرج زكاة المال من دون منّه=تدرى بها حر السعير ووقيدها
وصوم رمضان وحج للبيت واجتهد=ماتزرعه نفس الفتى هو حصيدها
والوالدين حقوقهم لاتزلها=تفوز بالفردوس ياللي تريدها
الله يقول اشكر لهم بعد شكره=افعالهم مايستوي لك جحيدها
وصل الرحم قطعه تراها قطيعه=يقطع ذرار المسلمين ويبيدها
والظلم لاتظلم ترى الظلم ظلمه=تفتح له ابواب السموات سيدها
وترى النفاق اليا بدى بالرفاقه=اخفاء محاسنها وشتت بديدها
خلك على ربعك حصانٍ محصن=والطيبه لاجتك بالطيب زيدها
يقوله اللي لابدى بالمثايل =يختارمن جزل الفريدات غيدها
اخذت روس اقلام مما بخاطري=والا القريحه ما يغلّق مديدها
ما هي مباباةٍ على قد اهلها=هتول الرجال اللي تنثر عصيدها
في زعمها ما احدٍ يسوي سواتها=وان جا حزم كلاّب يبرد حديدها
اشوف لي ناسٍ تبيّع ذممها=دايم على الهفوات يسعى بريدها
الله يعافيهم ولا يبتلينا=قومٍ مع الغرات حام ٍ رجيدها
هذا وصلى الله على سيّد البشر=شفيع حزبه يوم ياتي وعيدها
عليه اصلي كل ما حل ذكره=عداد ماتوم الهواء في جريدها

الشاعر حمود بن محمد الفريدي

أبيات رائعة بمعان ٍ أروع .

صح لسان الشاعر / حمود الفريدي .

وسلمت أبويارا على حسن النقل والتنسيق والاختيار .


ودام حضورك بجزالة أفكارك .

مشرفنا القدير
ما اقول الا صح لسان الشاعر الفذ
حمود بن محمد الفريدي وكتب الله له المثوبه على
هالنصيحه الغاليه والمعاني الفريده ولايفوتني شكرك على
نقلها ونشرها دمت ودام وجودكــ
تحيتي

تــرى حـيـاة الـمـرء لحـظـة وتنـتـهـي

لاتخـدعـك دنـيـا الفـنـا فــي رغيـدهـا

المصدر : خلك على ربعك حصانٍ محصن (( حمود الفريدي))
مشكور
ابا يارا
درووس في مجمل أبيات
تسلم على هذا الاختيار
وهذا النقل

ابو يارا تسلم على النقل الجميل . وصح لسان ابو ناصر . تحياتي

ابو يارا بيض الله وجهك
على الاضافه الرائعه
وصح لسان الشاعر الكبير حمود الفريدي
عاداته الجزله ..لاهنت

صح السان شاعرنا القدير والشاعر الكبير بشعرة وتواجدة بالقصائد الجميلة والرائعه
تسلم ابو يارا على الاضافة الجزلة
ولك منا كل التقدير والاحترام

ابو يارا
عودتنا على نقل الجميل الجزل لاهنت
وصح لسان ابو ناصر على هذه الرائعه ...
وشكرا

صح لسان الشاعر الكبير حمود الفريدي وبيض الله وجهه على هذه النصيحة الغير مستغربة منه
ولك جزيل الشكر اخوي ابو يارا على هذا الاختيار الجميل وتقبل تحياتي