ياشاعري عن مطلبي للبشر قل=صيته تبي معطف هنادي ويارا

20-09-11, 09:21 AM

الصيف راح وزمهرير الشتاء حل=وانا فقيرة حال واهلي فقارا
ياشاعري عن مطلبي للبشر قل=صيته تبي معطف هنادي ويارا
لو يوم واحد ادفن الفقر وافل=هذا الحجاج اللي كساه الغبارا
وادوس بقدامي على فرشت الزل=لو نص يوم اهجر حياة الطفارا
هذا الفقر ماكل منا ولا مل=وله سطوتآ جباره ماتجارا
بيديه سل الحال ياشاعري سل=ولبس عيوني ليل ماله نهارا
كم قلت له دخيل رب السماء حل=عنا وكم صيحت فيها جهارا
وكم قلت له فارق عن ارواحنا ول=ويقبل عدوآ من عدوه تثارا
ياشاعره من تلة اوجاعنا طل=ومد البصر داخل عيون الحيارا
تلقى بنا اعمى واطرم ومنشل=وتلقى الأسى يسكن عيون الصغارا
وتلقى هياكل ناحله مالها ضل=عنها يطيح من النحول الوزارا
تشرب قهر والقوت بحلوقها ذل=ورغم الفقر تلبس عباة الوقارا
ومع كل طلعة شمس تنداس تنذل=والدين وصى لاضرر لاضرارا
مامرهم ديم الرفاهيه وبل=ضمى الكبود ان كان بل الصحارا
حنا وطن والفقر غازي ومحتل=والعرض عن عين الرذيله توارا
نعرف طريق المال ونشوف وندل=بس الثمن خزي وفضيحه وعارا
ونخاف ثوب الطهر في يوم يبتل=الفقر كافر والمصايب كبارا
تتلنا يمنا الخطاء للفقر تل=بالنفس كسر وبالعيون انكسارا
لو تصفع العابد يدين الفقر ضل=وصارت له قبور الخطايا مزارا
ياشاعري سولفت لك جزء عن كل=عن فقر عذراء كم وراها عذاراء
وذولا يبيعون المزايين والبل=سكرة زمن ولا الاوادم سكارا
ناظر عيوني مابها ماطرآ هل=جفت سحايبها بليل السهارا
وتبقى قضية فقرنا مالها حل=ياشاعري ماتت قلوب الغيارا
وراحت وانا اقول الفقر شخص منحل=ابغي اداريها وهي ماتدارا
أخاف اصرح ثم على راسي تهل=سحب المصايب من يمين ويسارا
بسكت وببلعها مثل كاتم الغل=واقول ياربي تعين الفقارا
وسلام يانرجس وكادي ويافل=وسلام ياكذبة غنى وازدهارا