ياهل الجموس

قصيدة قديمة لهلال بن عوض بن نومان (ابوي )<<<<<<ايام الشباب عندما كان في الحدود الشمالية في الدورة بالحرس الوطني وبعد مضي وقت طويل لم يحصل على اجازه ومروا به احد الفرده وتمنى السفر معهم ويناجي بها سبيل بن سميح الفريد كان معه بنفس الدورة والقصيده بعنوان
(ياهل الجموس) وبآخر القصيده بيت لغز

ياهل الجموس اللي مشن وقفولي=معكم على اللي يبعدن المصابيح
ماعندي الا فروتي والنعولي=وعلاقت اهدومٍ بليا مفاتيح
ولالي نظر في مجلسٍ عند ذولي=واخاف من بعض الليالي بترشيح
لاصار مسؤل الفصيل مهبولي=واللي على حضيرتي خامد الريح
ينفخ علي ونافذٍ مايقولي=لو كان خبلا غاربه ممتلي قيح
وابن سميح قال تسمعوا لي=حلفت انا لاعدي الرجم واصيح
تصيح ياسبيل وانا صك حولي=بين الصياح وبين ونه وتفحيح
الله على من شاف هاك النزولي=الظن قلبي يترك الهم ويريح
واشوف لطف الروح زين الدلولي=اللي زها لبس البهاء والمطاويح
وصفه من الذيدان وضحاً زعولي=ماترتع الا بالفياض الصحاصيح
وبه ذاربٍ عودة ليان وعدولي=والخد لو انه ورا الشيله يضيح
ياللي تجيها لازم انك تقولي=قله ترا هلال يقوم ويطيح
والحال تنقص كل يوم بنزولي=والبال ضايق طول الايام مايسيح
سميها تكثر عليه النزولي=ولايعرفه ياكود من يدهل السيح

صح لسان والدك الشاعر هلال بن عوض بن نومان
والله لايلومه بخت هل الجموس
قصيده جزله من شاعرٍ جزل
ولغز رائع بأنتظار الحل
مشكور اخوي نواف على الاضافه لاهنت

اخوى
نواف بن هلال
لاهان الوالد وصح لسانه
ولك كل الشكر على الاضافه الرائعه الجميله
تحيتي

صح لسان والد الجميع
قصيدة جزلة
هذا الشبل من ذاك الاسد
تقبل اجمل التحايا

صح لسان شاعرنا الكبير هلال بن نومان وعقبال مانسمع جديده واشكرك يااخوي نواف على النقل الجميل وتقبل تحياتي

تسلم بن هلال على المشاركه الرائعه ,