للشاعر الكبير والعلم / سهل بن نايف الكسر المرشدي العتيبي

للشاعر الكبير والعلم / سهل بن نايف الكسر المرشدي العتيبي

راكب اللي يوم يزجر وصوته له عويل =صوت ندراً خيلت بالمطر بأول نهار

لا اونس البنزين بالمشي سوّى المستحيل = وصلو شكمانه من النار يقدح له شرار

من وكالة جمس شد الجميح آخر موديل = ابيضٍ لونه كما لون غرنوق البحار

كن وجهه لا نطحته مثل وجه الاصيل = الحصان الاصفر اللي نجب روس المهار

وان قفيته تذكر الله وتذكر بتهليل = وان سنحته يلفت العين شواق النظار

كن لمباته على تندته تشعي شعيل = يوم ولع نورها من صفار ليا حمار

داخليه كله ادهم وطبلونه جميل = وترس قيره بالتماتيك وابوابه زرار

والمراتب فوقها جاعدٍ شكله قليل = وفوق راس القير برقع صواريم الحرار

والمكينه زيتها ما يغيّر بالموبيل = والاديتر خمس رصات ما جاء ماه حار

مايرهم فيه ترهيم من شد الوكيل = نيكل الصندوق مبروم واعصيّه كبار

ولا وقف عند الورش من عميل في عميل = ولا ركب فوقه سرابيت ولا عريب دار

مركب الربع النشاما منزحة القبيل = الرجال اللي تعز الرجال اهل الوقار

منوة اللي حده البعد عن شوف الخليل = منتولّه ديرتن دونها يزمي ديار

لا مزعته وانت عجلان والمسرا طويل = ينتهض مثل النداوي ليا انوى بالطيار

واليا عطاله حزمٍ اجرد يميل ويستميل = مشي غيدا ضايمن ساقها ثقل الفقار

تلتفت يم العشاشيق وتقض الجديل = ولا تعشق من الرياجيل الا كود الخيار

المصفّح يبرد الكبد ويزيل الغليل = لا عطاله مع حزومٍ مسايلها قرار

وان عطاله من شعيب على قشعه نثيل = كن مشيه لا عطى الدعب مشيه فوق قار

وان نتلته من وقوفه يشيل الصم شيل = مضرب المخباط لا ثار والديره عفار

وان عطاله مع نفودٍ خببها ما تسيل = ما يجنب عن صعافيق مزموم الزبار

من صناعة قوم ريقٍن هل العقل المهيل = كيفهم بالبير هم الولد ولا السكار

من يحط الجيب للجمس فالدنيا زميل = مار قالوا جكس ولا شاص ولا فكسار

الجويب مويترن زين وفالرمله حليل = مار عنه الجمس مثل الحصان عن الحمار

صح السانك والسان العتيبي..
مشكور على النقل
تقبل مروري

ذعذاعنا الغالي
طالما اعجبتك فهي تعجبنا ايضا لو ان العتيبي زعلنا كلنا اهل جيوب ههههههههههههه
لا وتستاهل التنسيق مني بعد ... وراك وراك
صح لسان ابو عتاب وسلمت على النقل الجميل
لاعدمتك

ابو عبد العزيز
دام تواجدك وتعليقاتك الطريفه والضريفه هي فاكهة المجلس
مشكور على المرور والتنسيق

من يحط الجيب للجمس فالدنيا زميل ** مار قالوا جكـس ولا شـاص ولا فـكـسـار
الجويب مويترن زين وفالرمله حليل ** مار عنه الجمس مثل الحصان عن الحمار

ذعذاع الشمال شكراً على النقل الجميل وصح لسان الشاعر
تقبل مروري ..

هلا ابو فـــايز مشكور على الإضــافه
أشكرمرورك العطر 0