بيني وبين ابو علياء ...

اخي وحبيبي وزميلي الرائد / ياسر بن صالح السحيباني من اوفى الرجال وقد زاملته
عندما كنت في المنطقة الشرقيه وكان نعم الاخ والصديق وقبل فترة بدت لي حاجة
ملحة عنده فارسلت له هذه القصيدة فكان ردّه قولا وفعلا بيض الله وجهه ورده سالما
للوطن حيث انه حاليا بدورة في نيوزيلندا ...
رسالتي :

الظروف المحرجه نوبٍ تحدك=تحرج اللي غاليٍ تكره احراجه
خص لامنك عرفت انه يودك=ويعتبر حاجتك ماهي باي حاجه
لكن حبال الغلا يمه تشدك=وقومته لاقام مع ضحكة حجاجه
وانت ياريف الخوي دايم نعدك=السناد اللي لنا عند المواجه
يابو علياء بالوفا مافيه قدك=يوم بعض الناس طيبه من مزاجه
وانت طيبك من نقا خالك وجدك=وارثه ميراث من يفخر بتاجه
وحاجتي بيدينكم والمد مدك=وشايبٍ عندي قضاها هو علاجه
هدته دوراتها الله لايهدك=ويتحرى طلة (البدر) وبلاجه
ياعضيدي انتظر جودك وردك=حاجتي صعبه ولاهي باي حاجه

وكان هذا رده وقد اوفى ابو علياء لاعدمته:

مرحبا ترحيب في منتوج يدّك=شعر ابن عتاق دايم ذا نتاجه
حابك المطلوب بالقيفان سردك=ماتركت لصاحبك فرصه يواجه
تزببن وتقول وش قلت بمردك=الجواب اوضح من الكون وسراجه
ياهلا بك واعتبر ماعندي عندك=يالفريدي وانت فوق الراس تاجه
انت راع الاوله من فعل كدك=سيرتك عطره ولا فيها خماجه
لاتعزوى واسترح حنا نسدك=والغلا المكنوز ذي حزة خراجه
تقلط البيت وتنقى .. من يصدك!!=وتاخذ اللي توه مكمل خداجه
مانردك مانردك مانردك=وانت تدري خوتي ماهي زجاجه
لاتمنى وابشر بعزك وسعدك=هرجة الصامل ولا فيها عواجه
والبدر فردي وهو في حكم فردك=لو تبيه يروح يم مينا سفاجه
جاك مطلوبك ولا هو عند حدك=حيث حدك بالغلا زاد امتزاجه
مير تكفى خلها في خرج سدك=لاتفك ابواب مانلقى زلاجه

صح السانك والسانك ابوعلياء

مساجله عنوانها الوفاء

بين الأصدقاء والخوه الصادقه

تسلم ع الأضافه

الظروف المحرجه نـوبٍ تحـدك

تحرج اللي غاليٍ تكره احراجـه

خص لامنك عرفت انـه يـودك

ويعتبر حاجتك ماهي باي حاجـه

اقسم بالله قمة الابداع
والقصيده كلها رائعه وجزله وتستحق الاقتباس كامله ولاكن هاذين البيتين غييييييييير
من قدم الطيب يلقاه يابو عبدالعزيز وانت راع الاوله
صح لسانك مليون

ياهلا بك واعتبر ماعندي عنـدك

يالفريدي وانت فوق الراس تاجه

انت راع الاوله مـن فعـل كـدك

سيرتك عطره ولا فيهـا خماجـه

كفو ابوعبدالعزيز
بيض الله وجهك ووجهه انشهدنه نعم الصديق
صحت الالسن ودامت الموده

صح لسانك عندليب المجالس
وصح لسان ابو علياء
تقبل وافر التقدير

صح لسانك ابا عبدالعزيز
ولاهي غريبه عليك الجزاله يابعدي
وعز الله إنك أسندت على رجال كفو
تحيتي

اهل الوفاء والمحبه الصادقه ...
ابو عمر
ابو حمد
ابو يارا
ابو فيصل
وانا اشهد الله على محبتكم كما اقدر هذه الثقه الكبيره من هاماتكم العزيزه ...
مايعجبكم ويحوز على رضاكم ويجد في نفوسكم القبول هو ما اصبو اليه ...
شكرا لكم على هذه المشاعر الاخويه الصادقه
لاعدمتكم

ابو عبدالعزيز صح لسانك ولسان ابو عليا
عرفت من تسند عليه
تقبل مروري

ابو فايز
صح بدنك وسلمت لاخيك ....
اشكرك من الاعماق على هذا الفيض الاخوي
لاعدمتك

صح لسانك يابو عبد العزيز ولسانه ....وتحرون بالطيب اثنينكم ...تقبل مروري

صح لسا نك يابو عبدالعزيز ولسان ابو عليا وبيض الله وجهه على سد اللزوم و تقبل تحياتي