مساجله الجديد وعيبد والحمود .....

هذه القصيده اسندها الشاعر الخلوق وعاشق البر والقنص عبد الله بن سمير الفريدي (ابو فايز)الى صديقه
علي بن محمد بن موسى الحمود في 24/8/1425هـ

هات القلم واكتب على روس الاصباع=سجل مع اهل الشعر بالشعر باعي
بالذات من يهوى القنص والتمتاع=بالطير والا الغير هذا امتناعي
كم شاعرٍ قبلي طرق عدة انواع=ومع الاسف شعره مع الناس ضاعي
يابو حمود سهيل شفناه لماع=عقب الغبى شوفه جنوبٍ لماعي
يوضي كما الليزر وضوحٍ وشعّاع=من شوفته للحر قلنا وداعي
وياما حلا اللكزز وجمسين وشراع=وياما حلا بالبر طق الشراعي
وشب الحطب والنجر صوته اليا انصاع=يجذب عليك من الفريقين داعي
ومبهرات الهيل من كل الانواع=ومسمارها محذور مافيه داعي
وكبشٍ معلق بين ناهي ورضاع=يومٍ بعض الناس شحه مطاعي
مجوّدٍ بالقرش من قل الاسناع=وكيل مال الورث يوم الوداعي
والسيل وقعه بالوطا قبل مايذاع=ومن الصباح بكل ديره اذاعي
ومعنا مثل شرواك يشرى ولا يباع=خسران من هو لبيض الوجه باعي
وطيرٍ مثل (سطّاح) راكد وطلاع=والا مثل (عزام) لاقيل فاعي
الخرب من حد السهل للوعر فاع=وتل السبوق وزم بالارتفاعي
كنه اوكس مراقبٍ كل الاوضاع=دايم عيون مراقب الجو واعي
وحوّل من اللجه على الراس للقاع=نجمٍ على روس الشياطين ماعي
مافاد كثر مراوغه والتلواع=طيرٍ على صيد الخريشات ساعي
ولا يهون نجمٍ بالسما له تلماع=(نجم السهاء) برقٍ سرا له شعاعي
له جايزة نوبل توقع بالاجماع=ويرعاه من رب السماوات راعي
يرشنا رش المطر لشهب القاع=بمفردات القاف عنده براعي

وعندما سمع بها صديقه الشاعر/عبيد بن نهار الفريدي زاد اشتياقه للبر والمطلاع فعارضه بهذه
الابيات الجميله

ياناظم القيفان في فن الابداع=اصغيت لبداعك بكل اقتناعي
قناعةٍ ماهزها شك زعزاع=عنها قطعت حبال شك النزاعي
قافٍ له السماع يصغي وينصاع=يصغي له السامع بزود استماعي
يعطيك صوره عن هوايات واطباع=ومسير رغبة مبعدين المساعي
او مالهم في صنع الابيات صناع=يقنب مع الهاجس قنيب السباعي
وتجاوبوا صوتٍ به تلج الاضلاع=ذيبٍ مجيـع وجاوبنه اجياعي
(نجم السها)اسم استعاره وبه شاع=عبر الجهاز وادي الرمز شاعي
رمزين والثالث سميّه بالاشماع=مشمّعٍ دايم جديد الصناعي
وانا جذبني يمهم كل مرماع=مرماع طيب بنازلين الرفاعي
انا مع اهل الطيب حرصٍ وطماع=احبهم لله حبٍّ جماعي
احب من حبه هوا كل ذعذاع=في بر نجد وشاسعات الوساعي
شمة ذعاذيعٍ يداون الاوجاع=ممشى خلا يبعد اعماس الصداعي
يالله بنوٍّ بارقه له تلمّاع=زلزال رعاده يثير ارتياعي
يضفي على ارض المملكه ضفوة شراع=خيرٍ بلا شرٍّ عميم النفاعي
من غبّ سيله كنه زروع زراع=خضار عشبه تقل محور زراعي
مشاجرٍكاسٍ جبلها مع القاع=ونفودها وسهولهاوالتلاعي
فيها ام سالم صوتها له تلعلاع=ترفع غوانيها بصوتٍ ايقاعي
وتشوف فيه لجامع الفقع جماع=وصيد الحباري له مع الكل داعي
هذا يقولون امس صاد اربع بساع=وهذاك هدّ اليوم طيره وضاعي
اقفى ورا جولٍ تمزع تمزاع=مثل الطخاف اللي به الريح زاعي
راعيه بدورته تلوع تلواع=ولقاه عقب ايّس منه عند راعي
وهذاك صاد وناوٍ اليوم مرجاع=يشيل تالي عزبته والمتاعي
عقب انه اشبع غاية الرغبه اشباع=رغبة شرف رغبة بياض النصاعي
ماهي برغبة من تهزع تهزاع=يرقص وله في كل بار انهزاعي
يشرب وفي مشيه وهرجه تنتاع=ماله على الممشى الصحيـح استطاعي
مما براسه ياطويلين الابواع=يحسب حساب الشبر مثل الذراعي
وصلاة ربي عد مالاح لماع=على النبي اللي للاسلام داعي

وعندما وصلت القصيده الى المسند اليه الشاعر /علي الحمود كانت هذه ردة فعله ...

يامرحبا وعداد ماينبت القاع=وعدا من بالبيت طايف وساعي
باللي له القيفان يمشن خضاع=اليا نوى له قاف جنه اسراعي
ماهوب مثلي لابغا القاف ماطاع=يضحك علي عند الكتابه يراعي
ذاك (الجديد) اللي للاصحاب فزاع=ذكره مع الاجواد بالطيب شاعي
من لابةٍ فعله تردد بالاسماع=فعلٍ يخلي ميت القلب ياعي
(حربٍ)لها في موقف العز ميقاع=للدين وسلوم القبايل تراعي
يامرحباً به عد ماهب ذعذاع=وعداد من وجّه الى الله داعي
لا يابو فايز صار بالقلب رماع=ذكّرتنا مشي الفضا والوساعي
وشوف الخضار اللي به الصيد رتاع=ماذيره راع الشياه الجياعي
ارضٍ قفر تلقى الحباري به انواع=وارضٍ قصص سيحانها والتلاعي
وياما حلا قص الاثاري على اسناع=وتطليعة القرناس بارضٍ رفاعي
ثم استذار اللي من القص ملتاع=وكفخ وعلق ناويٍ بارتفاعي
وتل السبوق اللي على الصيد بتاع=وكلٍّ توقف في محله يراعي
الاشقر اللي للمهاريب لواع=صيروم ماتخشى عليه الضياعي
رده وحول به من الجو للقاع=وزادت وناسة طيبين المساعي
وحلّ المضحّى والسعد بيننا شاع=في وسط روضٍ للنواظر متاعي
عشبه مع النسنوس جاله تمرياع=ريح النفل والشيـح بالجو ثاعي
بخوّة رجالٍ بالمكارم لهم باع=(نجم السها)و(عبيد)واف الذراعي
الكل منهم يجعل القاف مطواع=اليا سمعت البيت زدت استماعي
وباق الربوع اللي على البال كل ساع=عندي غلاهم بالذهب مايباعي
هذي حلاة البر مشتى ومرباع=وهد الحرار اللي بها الفكر ضاعي
ولا عاش من هو للدنانير جماع=يجمع وغيره يسبر الجمع واعي

صح الله السنت الجميع
إسناد وردود بمستوى الاسناد سلمت قلوبهم
وصحت السنتهم ولاهانو جميعاً
وانت لك كل الشكر على النقل والنشر
ابا عبدالعزيز
تحيتي

تعتبر هذه من افضل المساجلات الشعرية المميزة جداً ....لأنك مميز يا ابو عبد العزيز
صح السانك على الاضافة المشرفه
ونحن متذوقين الشعر لنا الشرف ان نجد مثل تلك القصائد بمجالسنا
ابو عبد العزيز تاج راسي على الاضافة ايها العندليب
تقبل مروري وختم التميز لهذا الموضوع

الاحبه ...
ابو فيصل
المشعل
اشكركم على طيب المرور وحسن الشعور ...
لاعدمتكم

عندليب المجالس ابو عبدالعزيز
صح لسانك واعتلا شانك
ومشكور على النشر
تقبل مروري

حياك الله ابو فايز
هذا حق وواجب انا نجمل المجالس بابداعك انت وربعك
وبانتظار الجديد لاهنت