خاص

سولف بس يگلبي من الحجي البسكوت
سمعني احس سكتاتك اطويله
تعبني الصبر شترجه عود يصير
وشحصل (بدر) .. من هم شناشيله
صح لوله الصبر ما طاب جرح ايوب
بس صبر النبي من يگدر ايشيله .. ؟
صعبه الجان ظلك هسه يتعداك
وجبيره اليشتكيلك هسه تشكيله
وذله اليشتهي اترابك يشيخ اعليك
وهضيمه الما يجيلك انته تمشيله
يا صبر الشمس يسحگ عليهه الليل
وتموت العصر والفجر تحييله

ما تنشف الگصته من العرگ نهران
وما توگع النگطه اشما تهفيله
ثگيله النگطه من توگع ولا تنشال.!
بس ممكن جبل من يوگع اتشيله .!!
سولف يا گلب منك صبر ما اريد
سهران الخلگ خل يسمع أحجيله
اريدن شهرزادك ما تضوگ النوم
وليله اتصير اريدن من الف ليله
ليش اللي تحبه ايصير الك دفان
ينبش من وراك وانته تبنيله
علمني الزمن موت الدمع بالعيد
وعاشور اليمرني عيون ابديله
والليل اعله حگ لو تعبّه الناطور
والينوخذ حگه تلوگله الشيله
وجيله الما تجيس العتب عا الرماي .!
هوه اعمه اليذب العتب عالجيله
ولتهاب اليجيك وطبعه طبع الجام
بس هاب اليجي وحيل الزلم حيله
وليغرك العگرب اعمه من الراس ..!
ما يحمل بله .. بس البله بذيله ..!
وتتجه اعله جفك لو طحت وتگوم
بس لو طاح جفك من يتجيله ..؟
وبس هاي الزمن ما نصح بيهه وياي
ما عد الزلم لمن سرج خيله
حط اعنانهن بيد الردي يا حيف
والجربه اصهلت والسكتت اكحيله..!
أحب شگد أضحي ألصاحبي وبلــــروح
بس وين ألگه صـــــاحب حته أضحيله
وحگ من وسم حروف الـــــرسالة بلاء
وحگ من صفن الشـــــــام بزناجيله
وحگ تل العقيلة الخلــــــده التـاريخ

وحگ كــل دمعـة (أم) أنطبعــت بشيلة
طبع بسمار طبعي .. ومـــــيزه بلبسمار
يثبت بيه طبع لــــــــوزاد تنـزيله
الزمن علمني أضحك للضحـــــك وياي

واليبجيلي ترس أعيــــــــوني أبجيله
وبخــده .. أحطـن طينتـــــه الجذاب
طبعني وصـــــرت ســــن بمناجيله

ترف ويـه الـيودني وحــــاد ويه الحاد..
وأعيــل أويـــه اليعيــل وعيلتي شعيله

أمر مــرت (المـوس) بخشـم كـل جذاب
وأگـص حتـه الهــوه مــن يلعب بذيله
سولف يا گلب بلكي الجروح اتهيد
بلكن موته وحده انموت هالليله
سولف عالسواتر عن عمه الناطور
عن دم الشريف الما نشف سيله
عن ارض الحرام وحيرة اليمشون
عن صوت الرصاص وعن مواويله
عن صبر المواضع من خله الشاجور
عن گبرك البيدك فوگك اتهيله
دخيلك يا (علي) والخوف ينگط خوف
دخيلك يا ( علي ) ومن غيرك ادخيله
بجينه المگابر جي بعدنه ازغار
ونلعب بالمگابر گمنه ختيله.. !
ضحكنه اعله الجذب حد ما عله النيشان
وبجينه اعله الصدگ واحنه مجاتيله
ما يبقه الزمن مگلوب بينه يدور ...
لابد من تمل تنطق تماثيله.. !
كون الراح يرجع هسه حته ايشوف
بنسان اليذلنه شلون ندعيله
اللهم ربي اتحفظه بس بسكوت
نلفظهه دخيلك لا تعديله ..!

( الشعر كويتي )

مشكور على هذة القصيدة

شكرا على مرورك الرائع

بسم الله
الخيال
الله يعينك تعبت وان تكتب الا!!
الظاهر اخوي انها عراقيه، والا لا؟؟
قراتها كامله والحصيل زهيد ،اللهجه مشكله والا تراها قويه
لك حبي

ما ادري واللة لاكن اتوقع انه كويتية