من يسب الهاف جعله فدوة له............

كان التهريب سابقا يعتبره فئة من رواده من افضل المغامرات التي كانو يمارسونها وكان لهم صولات وجولات من الطراد بين كر وفر ويوم منتصرين وايام منهزمين وكان لهم قصيده وادبهم ومن اشهر قصايدهم

من يسب الهاف جعله فدوة لـه
جعـل يفدنـه غناديـر البناتـي
لازهمت الهاف جاك الهاف كلـه
تقل يشرب من غراش المسكراتي

قيل انها لبندر بن سرور وقيل انها لسعيد بن ودمان ولهيب له لسبب ابذكره واكد لي احد الاخوة انها لمحمد بن مثعي العتيبي نقلا عن ابنه وهو الاقرب للصواب لان بن دومان كان يشتغل في الحد في نفس النقطة ابرق الكبريت

وقد قرات في احدالكثير المنتديات بعض القصائد والمراد بين المهربين ابوسعيد بن دومان ويقال انه رئيس مركز برق الشيوخ
المهم قبل أكثر من أربعين سنه تقريباً كان التتن ممنوع بيعه في السعوديه وكانوا يهربونه عبر النقاط الحدوديه على الفروت والهافات

أشهر نقطة ذيك الأيام ( أبرق الكبريت ) على الحدود بين السعودية والكويت .... تعيـّن في ذيك النقطة رجل يقال له إسمه (ابوسعيد بن ودمان ) وهو اللي وقف للمهربين وقدر يخفف من تهريب التتن للسعوديه حتى سمحت به الحكومه لكن الشي اللي حفظه التاريخ هو ( أدب التهريب ) جرت مساجلات شعريه كثيره وعديده بين ابن ودمان وبين المهربين ... وعلى اللي كان بينهم من رمي بالبنادق وهوايش لكن كانوا رجال يقدرون بعضهم ومثل ما قال ابن ودمان عنهم ( ونعم الله ربي وربهم ) وبأعطيكم القصايد اللي تم حفظها وجرت ذيك الأيام وكل الأسماء الموجودة حقيقية ومعروفة والقليل منهم لا زال حي مثل ابن ودمان حارس الحدود الشهير
المهم أول ما تعين ابن ودمان كتب قصيده وحطها بدرج مكتبه في مركز أبرق الكبريت لكنها تسربت ووصلت للمهربين وردوا عليه ... يقول ابن ودمان :

ياهل الهافات عنتـر نـاش جاكـم
وا عنا من صادفه بأرضـن خليّـه
لعنبوكـم هونـوا جاكـم عناكـم
جاكم الموت الحمر ماهـي زريّـه
هفوة ٍ زلّـت لكـم وإكلـوا (....)
بيعـوا الهافـات بأقيـام ٍ رديّــه
وإعلموا وإدروا ترانا فـي قفاكـم
ومن يقاوي له جبل مـا راح نيّـه
ياهـل الهافـات عابينـا عباكـم
الفـروت جـداد والعزبـه قويّـه
ياهـل الهافـات خيّبنـا رجـاكـم
نحمد اللي قدرتـه ماهـي خفيّـه
بيعوا الهافـات ردوا فـي سراكـم
خلّـوا السمـره وطّـوال الحنيّـه
الدهر ذعـذع لكـم ثمـن جفاكـم
وإفهموا وإدروا ترى في الجحر حيّه
خسرت الشركـة وخيّبنـا ثناكـم
وبعضكم بالقسط ما خلّـص وديّـه
ياهل الهافـات حنـا مـن وراكـم
والسعـد قدامنـا فـي كـل هيّـه
تحت حكم اللي عن المنكر نهاكـم
عن طريق الديـن تلقـون المنيّـه
عندنا اللي يمرجن باقـي شواكـم
خمسـه وستيـن ضـد الجندليّـه
والذي هيّض غرامي مـن خطاكـم
هرجة ٍ من واحد ٍ جتنـي خطيّـه

بعد ما تسربت القصيده للمهربين رد عليه واحد منهم يقال له فهد الكحيلي ويقول :

ياهل الأبرق تبّين لـي خطاكـم
والخطا راعيه يقنـع بالخطيّـه
يا عوينـك وارد الستّـه لفاكـم
وعنترك خربان والخمسه رديّـه
كم ونيت ٍ لا كمل حمله وطاكـم
وقاعد ٍ بأرقابهن تثنـي الهديّـه
وإن لحقتم موتره عنـده دواكـم
أرنب ٍ حمرا عيـون مجادعيّـه
من قديم وسلمها تاكل (........)
فعلها في جدكـم لا رحـم حيّـه
إن بغيت الصلح جاكم ما كفاكـم
وإن بغيت الزود رد العلـم ليّـه

مضت أيام وطرح ابن ودمان وعسكره هاف موديل سته وستين لولد عم فهد الكحيلي جديد ... عندها إستغل ابن ودمان الفرصه ورد يقول :

يا سلاح الحـد يـوم الله عطاكـم
لا تهابـون الخطـر والمخطريّـه
خلوا الرشـاش مركـوز ٍ حداكـم
والمخازن وسطها النـار الصليّـه
يالكحيلي وارد الخمسـه خذاكـم
وستّتك مع حملته مـا راح نيّـه
ربعنا صادوه عانـه مـن وراكـم
ما مشى ياكود ألـف وخمسميّـه
والعناتر يالكحيلـي فـي حراكـم
والفروت الحمر وجنـود السريّـه
يالكحيلي ما مشينا فـي رضاكـم
إن زعلتوا أو رضيتـوا بالسويّـه
ياهل الهافات ما خذتـوا قضاكـم
ما بكم قاصـر ولكـن معجزيّـه
والكحيلي في قصيده مـا كفاكـم
دوروا غيره تـرى الدنيـا هبيّـه
ياهـل الهافـات تالـي منتهاكـم
والله إنه عنـد سلـك العسكريّـه
مثل ٍ ناس قد وطاهم مـا وطاكـم
فعلهـم كنّـه عملكـم بالسويّـه
أو نسفّركم ونسلـم مـن غثاكـم
والحكومـه دونكـم والله غنيّـه
إن مشيتوا بالسنع محـد ٍ شناكـم
ما يجازى واحـد ٍ مالـه قضيّـه
وإن عصيتوا الأمر معروف ٍ جزاكم
بأمر شيخ ٍ ما يبى راعي الخطيّـه
والحكومـه رتبّتنـا فـي نحاكـم
نمنع المنكر عـن أفـراد الرعيّـه

دارت الأيام ... ودخل ابن ودمان مكتبه ولقى فيه ظرف وفيه هالقصيده ومرسلها له واحد من المهربين إسمه صعفق بن عبيد ويقول :

الخوف لو ضد بالجزمات
ما نشركه مذهب شيوعي
أموات حنا عيال أمـوات
مضمون ما باقي الدوعي
وعبيد ورد لنا الهافـات
عنده ترى البيع ممنوعي
هافات خمسات والستات
يالعبد يا قاصر البوعـي
جميع يمشن وألا أفـوات
والرزق ماهوب مقطوعي
إبلا دفاتـر ولا لوحـات
والخط ماهوب مشروعي
مّرن على العبد بالساعات
ما فاختن شوفه أسبوعي
يالعبد مرن عليك افـوات
وكبوت عنترك مجدوعي
عنترك مخشوش بالغابات
مسبوع وأبوك مسبوعي
هافات ما تخاف العـادات
كم طنب للهاف مشلوعي

وفوراً رد عليه إبن ودمان بهالقصيده
:

ما ينفـع الـدس والحيـلات
والكذب راعيـه مصروعـي
ومن زيّف الكذب مالـه ذات
حتى ولـو هـو ّ مطيوعـي
مانيب مـن يتبـع الغـرات
والوجه مـا فيـه داموعـي
أدرى قصيري عـن الـزلات
ولا نيـب خايـن ودانوعـي
عبـد ٍ ولا يتبـع الغفـلات
وراسي مع الناس مرفوعـي
وألا أنت عندي عليك إثبـات
في (.........)جعلـك الروعـي
فعلك (.......)ٍ بوقـت ٍ فـات
واليـوم مثنـي ومربوعـي
ياعبيد يا امجمّـع الخـردات
من كل هيس ٍ وصعصعوعي
تراك مـن سالـف الأوقـات
دلال مـا نلـت مشروعـي
فعلك تشيّـك علىالحمـلات
في كـل منكـر وممنوعـي
حذفكـم المهـدي بنشبـات
حطـك منشّـه ومشنوعـي
حتى إبن شرهان يا حسرات
يلعـب بكـم دون منفوعـي
وأخوك بالحبـس والحـرات
حّول مـن الجـو للقوعـي
لعب به الوقت لعـب الـزات
ما نيب شامت ومفضوعـي
ولا نيب أحب أكشف العورات
ألا ليـا صـرت منيـوعـي
لا شك دونك هـل العـادات
شربوا من الجـم قرطوعـي
مثل الصبي قاضي الحاجـات
طيبه مع النـاس مرزوعـي
عليه شرهه ولـه شرهـات
أيضا ولا هـوب سعسوعـي
نجزي هل السـو ّ بالسيـات
ولا نيب في النذل مخدوعـي
ونجزي هل الطيب بالحشمات
وكل ٍ له القـدر مصنوعـي
وهديتك يـا عميلـي جـات
ودرب الحيا صار منزوعـي
ياعبيد قل لصعفـق هيهـات
مـاراح ماهـوب مرجوعـي
ومسكين يا ناظـم الأبيـات
قوالهّـن مالـه ضلـوعـي
ينبـح وينخـش بالمنحـات
خبل ٍ من العقـل منزوعـي
كلمة عقـل مابهـا حوفـات
لا شك من راس مصدوعـي
وكثر التحوص مـع اللفـات
ما تعتمـد كـل رعروعـي
والمعركـه وسطهـا قـوات
يدخـل بهـا كـل مقلوعـي
كانك تبى الحرب هاك وهات
ولا تجعل القـاف مدبوعـي
وبأنصحك عن ضايع الهقوات
تصبح على الخشم مقموعـي
ولا تنطح المـوت والغبـات
لا تحسـب الغـب ناقوعـي
يا عبيد ما صار لك نوهـات
مـا غيـر للتـن جاموعـي
وخسران لو كان لك هافـات
قلبك مـن الغبـن منقوعـي
هذا الجزا كان لـك رغبـات
وترى الزعل دوم مرفوعـي
والله لـو طالـت الـمـدات
ما أزعل ولا نيب جازوعـي
أيضا ولا أحتـاج للفزعـات
وإسمي على الجين مطبوعي
إن كان عدتوا لنـا عـودات
والـدار ماهـوب مقطوعـي
وصلوا على سيـد السـادات
اللي علىالخلـق مرفوعـي

ومضت الأيام وخف التهريب ... لكن تجمعوا المهربين ومروا مع المركز وحذفوا لهم ورقة فيها هالقصيده كتبها واحد منهم يقال له ( ناجي ) ويقول :

ياهل الهافات زيـدوا سعرهنّـه
إشتروهن نقـد وألا بالقصـودي
ما حـلا مرواحهـن بحمولهنّـه
جاوزوهن غيبة الشمس الحدودي
أبرق الكبريـت لا زم يسهجنّـه
مركزك يالعبد بيّـاع الجلـودي
ما بغنّـه لازم إنهـن ياصلنّـه
فوق والهافات عجلات الـردودي
كل ما سكّـر طريـق ٍ يفتحنّـه
يقطعن ّ الطنب ويطيح العمـودي
والدريسن حملهن من سامهنّـه
وارد الهافات ما ينقص يـزودي
عنتـرك بدروبهـنّـه حملـنّـه
أصبحن يالعبد عن حد النفـودي
وكم صبي ٍ بالمساري زاد فنّـه
ما ينام الليـل والعالـم رقـودي

وكالعاده تصدى لهم ابن ودمان .... ورد عليهم بهالقصيده وتعتبر أفضل قصايد التهريب :

مل قلـب ٍ هيّضـه ناجـي بفنّـه
شاعـر ٍ قـام ايتعلـم للـردودي
لو تغبـى لازمـن نظهـر مغنّـه
عارفينه لـو تـذرى بالحـدودي
وكل قولـك عارفينـه لـو تكنّـه
مير ما نبغيك جعلك مـا تعـودي
والعلـوم الخايبـه مالـك وهنّـه
والمرد الشين عندي مـا يكـودي
مثل بعض الناس عندي له محنّـه
حشمة ٍ لشعيب خذها لك سنـودي
والحنش الاسود أنا بأنصحك منّه
لا تحسب إنه من العالم شـرودي
ومن بغى التهريب هافه لا يحنّـه
والخطر قدمه على حد الحـدودي
إن نوى الله فكتّه مـا فيـه منّـه
كل دربه لا مشى لينـه سهـودي
أو يصادف لا نـوى ربـي يعنّـه
ياخذون الهاف وعيونه شهـودي
والعوض من عقبها يخشر بسنّـه
والنصيفه من حلالـه للجنـودي
مير وين أهل القلـوب المرجهنّـه
كانكم توفـون للقـول العهـودي
مروا الأبـرق وهـن بحمولهنّـه
عارضوا قـدام بابـه يالفهـودي
خلوا العنتـر يشـوف أزوالهنّـه
والخطوط طوال والدرب امحمودي
وما حلا شوف البكم يرثع بشنّـه
في عفاش القاع مع جدع الطرودي
وما حلا صفق الفشق بجنوبهنّـه
والبرن ّ يعدهـن عـد النقـودي
وكل هاف ٍ فيـه جنـدي ٍ يقنّـه
والمهرب طايح ٍ مـا فـاد فـودي
والسنافي فـي عهـوده سمهنّـه
ياصل الحروات لو دون الحـدودي
إضربوا درب الخطر والموت سنّه
والفتى عمره على اللوح امحدودي
والذي يوعـد ولا يوفـي بهنّـه
ودك إن ايحط في صدره نهـودي

ويعتبر هذا الادب او الشعر مشابها لأدب الصعاليك
والان نحمد الله ونشكره اختفت ظاهرة التهريب تماما بجهود رجال منحو الوقت والجهد وسهرو اليالي
مثل ماسو سعيد بن ودمان في مركز ابرق الكبريت

وسلامتكم

مشكـــــور يعطيـــــك الــف عافيـــه ننتظر جديــدك

تسلم ع النقل وبدايه موفقه

وحياك ربي بأنتظار الجديد المفيد

هلابك على الرحب والسعه تفيد

وتستفيد

طرح جداً رائع ،،
واستمتعنا بهذه القصائد

موضوع جميل واشعار رائعه ...
نقل جميل وممتع ...
لاهنت

اخوى يعطيك العافيه
والنقيب أعتقد إسمه سعد بن ودمان
وأذكر قصيده قديمه منها هذا الأبيات
وجودي وجود اللي قمز وإشترى ستين
دفع كل ماله فيه مايبي الديان
طلع من قراش النمر وتوه على التمرين
ويوم الله نواه بقدرته حمله دخان
مشى من شرى خيطان في حروة الثنتين
والساعه ثلاث محققه عند بن ودمان
ننتظر القادم
تحيتي

قصيد ممتع وردود ممتعه ايضاَ يعطيك الف عافيه على الطرح الجميل

مشكور ع النقل والحمد لله على النعمه والامن والامااان

تسلم ع النقل وبدايه موفقه