دنياك هذي كلها هَزِّ قاووق =ما تعرف الصاحب من اللي معاديك
واكثر كلام الناس بالمكر والبوق=يهرج معك واليا تِقَفَّيت يرميك
المال دايم صاحبه مرتفع فوق=والقل خايب لو تَرَفَّعْت يرْخِيك
عزِّي لمن دَوَّرْ لها عند مخلوق=إما بخل ولاّ مَنَن يوم يعطيك
أوصيك بالطيِّب إذا كان لك ذوق=إرمه وراك ولازمٍ إنه يلاقيك
يا العبد هوِّن كل مطرُود ملحُوق=لا تِشْتَحِن لك رَب ما هُو مخليك
اللي جعل لك رُوح جاعلك مرزُوق=كما تَكفَّل بك من الخلق كافيك
يعطي وباب الرِّزق ما هُو بمغلوق=واليا طلبته وانت محتاج يعطيك
الرِّزق له حبسه وله وقت مطلُوق=وإن مت ظل عند قبرك يناديك
والموت جايك لو تقع جوف صندُوق=دع عنك ما بك من حذر لا يعنيك
لا تشتغل بالمال ترى المال ممحُوق=ما مالك إلاّ ما تمده أياديك
إن كان مالك يا فتى ضيق السوق=تراه عند الموت ما هو منجيك
الجار والعاني لهُم شرط وحقُوق=والضيف واجب تكرمه يوم يلاقيك
وان كان تبي تأخذ المدح مطبُوق=خلك مشمر دُون ضيفك وعانيك
صُون الأمانه واظهر الهرج بصدُوق =ولا تعاشر صاحب البوق يعديك
لا تصحب الخاين ولا تامن النُّوق=وان لاح براق الحيا عَذَّرَت فيك
والدرب لا تامنه لو كنت مرفُوق=إلا بِحدٍّ في يمينك يباريك
أترك طريقة كل عاشِق ومعشُوق=ترمي برُوحك في الشرك ثُم يرميك
والكلب ما يتبعك لو تلبسه طوق=ولا خلاخيل الذهب ما يراعيك
وبالصبر تغلب صاحب العزم يا شوق=والعزم طيب مَيْر حزات يرميك
وافرح ليا منك عن الشر مدروق=واحذر صديقك واحذار اللي يُواليك
هذا كلام الصدق ما هُو بمسروق=وابيات يا قلبي بِناَهَا يسَلِّيك
من هاجسٍ يطمي كما بحر صافوق=احذر على القلب الشقي يوم يِطْريِك
يا رَبِّ تجعلني من النار معتوق=واجعل ختامي طيباً يوم الاقيك
يآعبد هون كل مطرود ملحوق 
العرض العادي
