وصاياالحكيم لإبنه ـ ومخالفته لوصايا والده

وصية الحكيم لولده
يقال أن هناك رجل حكيم له ولد وبنتان وعندما حضرته الوفاة أتاه ولده الوحيد وقال له أوصني يا والدي قال ( لا تزوج الرديان ، ولا تصاحب السلطان ، ولا تبدي سدك على النسوان [أي لا تفشي سرك لهن ] ) ثم مات ـ وإذا أحد البنات سبق تزويجها من قبل والدها من أحد جماعتهم رجل كريم وشهم ولكنه ميسور الحال . بدأ الولد يفكر بوصية والده ثم قال بنفسه لابد أن أجرب عكس وصية والدي و أشوف . وإذا أحد جماعتهم كثير المال ولكنه بخيل جداً على قولتهم
( جلده ) فقام بتزويجه من الأخت الصغرى [ وهذه أول مخالفة ] ثم قام بالتعرف على السلطان والتلصق به ويعزمه تارة ويخاويه تارة ويجالسه حتى صار من أعز جلسائه المقربين . وإذا السلطان عنده نعامة يداعبها ويستأنس برؤيتها .
[ وهذه المخالفة الثانية ] قام صاحبنا وسرق النعامة وأودعها أمانة عند أحد أصحابه ، ثم جاء بلحم خروف وأعطاه أمه منين لك هذا ياوليدي قال رزق جابه الله قالت وتخفي علي يامك قال يايمه كولي واحمدي ربك قالت والله ما يطق سني لين تعلمني قال وسري في بير قالت عسى الله يدفع البلا وأنا لي غيرك بعد الله ـ قال أنا سرقت نعامة السلطان وذبحتها وهذا لحمها ، قالت أبك ليه قال اشتهيت لحمها بس انتبهي لا أحد يدري [ وهذه المخالفة الثالثة ] .
طبخت العجوز اللحمه واكلتها هي وولدها وبقي منها شوي . وخوذيها طيرة شلوى وحققتها لجارتها ـ هذي منين لكم ياوخيه قالت ياختك كولي واسكتي قالت جارتها والله ما أذوقها لين تعلميني قالت هذا فلان الله يهديه سرق نعامة السلطان وذبحها بس يختك لا يطلع الخبر يذبحون وليدي . قالت سرك في بير .
ولا أصبح الصبح إلا الديرة كلها تهرج هالسالفه .
طرحوه الحكومه وحطوه بالحبس ، ليه يافلان تخون السلطان وانت من أعز الخلان . قال نزغة شيطان . على قولتهم ( فقعة مصطبح ) .
والجواهي والواسطات هذا يقوم وهذا يقعد يا طويل العمر ما لأمه غيره وصديقك الخاص طالبينك تاليها . وعمك أطرش وعقب حب وشفاعات قال والله يكود يجيب لي 40 وضحى يتنازن بعقلهن والا لاجدع راسه . والربع ما صدقوا خبر إنه يوافق وبهاك الكفالة الموثقة ـ ويطلقونه لمدة خمسة عشر ليله فقط . الآن ( بانت فقرتين من الوصيه ) .
قام الرجال على ناقته وطلاها على أنها جرباء واركب ولا له عن نسيبه التالي البخيل ويوم أقبل عليهم وشافه [ أبك أبك أبك يالعييل ألحقوا أقلعوا ما خوذة خالكم عنا بعيد لا تعدي حلالنا ويقول الراوي إن صدق عنده رعيتين من الإبل ومثلهن من الغنم . السلام عليكم ـ عليكم السلام ، عطينا لأخوك غبوق ما يمدينا نسوي عشى بهالليل ويوم أصبح وش عندك عسى مانت جايب لنا علم ماهو زين وجهك ما يبشر بالخير أنت وهالجربا ضيعت حلال أبوك يقال لك تبي تكرم الرجال يحفظ حلاله و..... وخذ ياشتايم قبل مايعرف وش الموضوع . قال يابو نسب الذيب بالقليب والأمر أكبر مما تتوقع أنا ............ الخ .
قال أماني قايل لك إنك مقرود ووووو.... وخذ ياشتايم مرة ثانية . قال قضينا أنت وش عندي منك الوقت داهمنا والدعوى فيها جدعة رأس . قال والله عندي [ها التيس ] الاسود أبو قرون يسومه أبو فلان بثلاث طعش وانا معي(ن) عليه غير بخمس لاكن الله يخلف خال العيال وحفلت علينا وش انسوي . قال تدري خله عندك وانا أبا أروح يم فلان ( يقصد نسيبه الأول ) وليا جيت أمر آخذه ـ قال أبك فلان فقير العالمين يطرد غداه بعشاه ولانت محصل عنده شي بس وط عن رحايلك . قال أنا ونصيبي ، قال نصيب الفلس . قام الرجال وركب رحوله ولاله عن نسيبه الأول الكريم الفقير . يوم أقبل عليه وهو ينوخ الذلول ويعقلها ويجي السلام عليكم .. عليكم السلام عسى ما شر وين رحولك قال جرباء الماخوذه وذالنها تعدي حلالكم ـ أنا اخو أبوي أبك قم يافلان جب ذلول خالك ونوخها بذرى البيت وحط عليها جلال عن البرد . يالله حيه وش لون الوالده والجماعه وش لون السلطان عسى صحبتكم دايمه ـ وهاك المفطح والليله الثانية عند جاره وهاذيك مثلها ويوم جاله ثلاث أيام قال يابو فلان العلم سلامتك أنا طمعت وطبعت القصة .................... الخ . قال بسيطه هانت وهونها الله الرجال كلهم من خلقة الدنيا وهم على الأخذ والماخوذ ومدام الدعوى بالحلال أبشر بسعدك ــ يام فلان لايصبح الصبح إلا وانتي مجهزتن40 عقال شوفيني واعلمك قالت أبشر غالي والطلب يرخص لك ويوم صلوا الفجر وهو يطلع براس الزباره ومعه العقل حقت البل ويقوم يصيح وينخى تكفون يالابتي ربعي ياربعي ـ والقطين كلهم يجون عسى ماشر وش العلم قال العلم كذا وكذا .... قالوا عسى الله يدفع البلاء بسيطه ويتلاقطون العقل وآخر عقال يتهاوشون عليه ثنين ويتقاطعونه بينهم وبساع وليا (41) وضحى محضرات عنده قال لعياله أركبوا مع خالكم لين توصلونه أهله وهو يركب رحوله ويمر نسيبه وياخذ التيس ويستاقه مع الوضح ويمر صحيبه راع الأمانه وياخذ النعامه ويستاقها مع تالي البل ولاله عن السلطان . ويوم دخلهن على السلطان وش هذا يافلان قال شوفة عينك ـ وش حدك على هذا ـ قال الوالد الله يرحمه وصاني بكذا وكذا .
وحبيت أخالف واشوف . قال سلمت وسلمك الله ـ قم يافلان وحملوا البل كلها من الآرزاق وأرسلوها لأهلها ويستاهل فلان . ( فلان بغيت تجدع راسه على طير مخولق ـ لاطير ولابعير [ خلق ربي حسن ] ) المهم الموضوع التيس وش يسوابه ما يشيل شي الماخوذ ـ قام ومر راعي هاك الدكان وليا هاك الغدفه وارد سعيد محيسن . ويلفها على قرون التيس ويوم مر نسيبه راع التيس وهو يطلقه ، ويواصل مسيره ـ وتعال ياشتايم شوفي أخوكي وشو جابن لك فلانه يحمل لها البعارين وانتي جايب لك غدفه / المسكينه تجبرت بالله وبلعتها عارفتن السالفة من أولها . لاكن حظ وعثر ..... وجيتك منهم ولا أدري وش الله سوابهم انتهت القصة بتصرف .
مع رجائي من الأخوة إبداء الملاحظات لنستفيد
ونعالج أخطائنا في المشاركات المستقبلية ..

ابن مخيمر

اعلومك طيبه

ولكن نبي باقي القصه((الحجاه))


اسلوبك جميل جداًً ورائع ولااروئع منه الا انت

أخوي ابن جدعاء أشكر مرورك وأشكرك على الملاحظه
وتم استدراك الناقص

وش هالوسوس ذا 0000

سالفه جميله واسلوب السرد اجمل 000

وما راحت الا على راعي التيس بعيد منك وبعيد من الرجال والدلال000

زيدنا يا ولد ابوي بها السوالف الحلوه

والله رائعة وقد جملها زيادة اسلوبك الجميل يبو عبدالله

الردي ماينفع مثل الهياااااااار لاترتكي عليه


لاهنت يبن العم ابدع واتحفنا بالجديد وواصل ابداعك

اسلوبك جميل يبو عبدالله

أتحفتنا بمصطلحات قد أندثرت من عشرات السنين

عندي أقتراح وهو أن تألف قاموس يحمل المصطلحات هذي

بسم الله
ابو عبد الله
قصة رائعة كروعة راويها
واضم صوتي لصوت ذيبان
شكرا لك فقد اسعدتنا وامتعتنا واتعبتنا

لم أستطع إكمال القصة بسبب شدة الغبار الذي ثار أثناء قراءة القصة :

قالت أبك ليه ؟!

وخوذيها طيرة شلوى وحققتها لجارتها

أسئلة الاختبار :

السؤال الأول : اشرح الكلمات التي تحتها خط في النص السابق ( وأتحداك )

السؤال الثاني : ترجم الكلمات التالية إلى لغة معروفة :

طرحوه الحكومه وحطوه بالحبس ، ليه يافلان

( فقعة مصطبح ) .

والجواهي والواسطات هذا يقوم وهذا يقعد.( قيام جلوس كأنهم في فصل )

طالبينك تاليها.

وعمك أطرش وعقب حب وشفاعات قال والله يكود يجيب لي 40 وضحى يتنازن بعقلهن والا لاجدع راسه .

والربع ما صدقوا خبر إنه يوافق وبهاك الكفالة الموثقة

السؤال الثالث : اذكر مرادف للكلمات التالية ( التي كتبت بالأزرق ):

واركب ولا له عن نسيبه .

أبك أبك أبك يالعييل ألحقوا أقلعوا ما خوذة خالكم عنا بعيد لا تعدي حلالنا.

السؤال الرابع : لماذ كرر كلمة أبك ثلاث مرات في الجملة السابقة .

ويقول الراوي ـ إن صدق ـ عنده رعيتين من البل ـ

السؤال الخامس : ماصحة الجملة الإعتراضية السابقة التي وضعت بين شرطتين ؟.

غبوق ما يمدينا نسوي عشى بهالليل

السؤال السادس : فسر معنى الكلمات السابقة كل على حدة .

السؤال السابع : اشرح الجملة التالية شرحاً إجمالياً .

قال أماني قايل لك إنك مقرود ووووو....
---------
السؤال الثامن : اذكر صفات التيس في الجملة التالية ، واكتب ثمنه باللغة العربية الفصحى ؟.

قال والله عندي [ها التيس ] الاسود أبو قرون يسومه أبو فلان بثلاث طعش وانا معي(ن) عليه غير بخمس .

السؤال التاسع : مامعنى يطرد غداه بعشاه ) في الجملة التالية ؟
أبك فلان فقير العالمين يطرد غداه بعشاه ولانت محصل عنده شي بس وط عن رحايلك


نكتفي بهذه الأسئلة بسبب الغبار الكثيف ....
-----------------------------------
ضع أسئلة على المقاطع التالية :

وركب رحوله ولاله عن نسيبه الأول

يوم أقبل عليه وهو ينوخ الذلول ويعقلها

وين رحولك قال جرباء الماخوذه وذالنها تعدي حلالكم

ونوخها بذرى البيت وحط عليها جلال عن البرد

وهاك المفطح والليله الثانية عند جاره وهاذيك مثلها

بسيطه هانت وهونها الله

شوفيني واعلمك

يطلع براس الزباره ومعه العقل حقت البل ويقوم يصيح وينخى تكفون يالابتي ربعي ياربعي ـ والقطين كلهم يجون

ويتلاقطون العقل وآخر عقال يتهاوشون عليه ثنين ويتقاطعونه بينهم وبساع وليا (41) وضحى محضرات عنده
وياخذ التيس ويستاقه مع الوضح ويمر صحيبه
ويستاقها مع تالي البل ولاله عن السلطان
شوفة عينك ـ وش حدك على هذا ـ

قال سلمت وسلمك الله

( فلان بغيت تجدع راسه على طير مخولق ـ لاطير ولابعير [ خلق ربي حسن ] )

التيس وش يسوابه ما يشيل شي الماخوذ ـ قام ومر راعي هاك الدكان وليا هاك الغدفه وارد سعيد محيسن

المسكينه تجبرت بالله وبلعتها عارفتن السالفة من أولها . لاكن حظ وعثر

وجيتك منهم ولا أدري وش الله سوابهم
( وعند الصبح سكتت شهرزاد عن الكلام المباح ) روحوا ناموا.
-----
جزاك الله خيراً أخي بن مخيمر

ومازلنا في عطاس من الغبار وضحك من الأسلوب الرائع حتى بدأ الواحد يضحك وهو وحده.( لحاله )

أسلوب أكثر من رائع.

تذكرت رحمة جد ولد ولد أخوي الأقصى .

أخوي أبو عبدالملك : أسعدني مرورك وتعليقك على قصتي المتواضعة ـ وأسئلتك صعبة .
( تسمح يغمى علي ) ؟. على قولة الطالب لإستاذه .
لك تحيه بعدد الإبل التي ساقها الرجل الكريم لرحيمه وبعدد أحمالها التي عادت بها من عند السلطان وبعدد ريش النعامة التي سرقها [ مقرود النصيب ] .


أشكر لك تعليقاتك الجميلة وسأحول الإجابة عليها مستقبلاً أن شاء الله ..

الله يعطيك العافيه