قاف مروبع للمجاراه........نايف بن مياس

هذي قصيده جديده اخص فيها حصريا هذا المنتدى المتالق

يامنتدى ربعي لعلك بالوجود=ويدوم عزك تحت كنف القايمين
ابحث عن اللي فيه خير ومنفعه=حرب التفرق لاتدق اطبولها
حنا ترانا تحت ضباطك جنود=واقولها واطق باذن المشرفين
حكم ضميرك لا تخش المعمعه=والناس خاطبها بقدر اعقولها
لافرق بين اهل القرى واهل النفود=مادامهم تحت الكريم موحدين
وسدير تيتبقى بجنب المجمعه=والدار ماتعمر بغير ازحولها
ماعاد بالدعوى رسوم ولا حدود=كل السوالف مثل ما انتم شايفين
واللي يشوشر علمه لا تقمعه=القامه العليا يماري طولها
والذيب ما يقدر على نطح الاسود=لاكن ماهو هايب من ابا الحصين
والبس بالفاره يحصل مطمعه=ياليت كلِ يفتهم مدلولها
اخذت لي من دورة الدنيا بنود=ان الليالي كل ابوها ليلتين
يبي يجي لك ضيق من بعد السعه=لابد ماتسمع صهيل اخيولها
هذا الكلام اللي على قوله شهود=ويشهد عليه الله خير الشاهدين
ركز على فحواه ياللي تسمعه=وامش بتقاليد العرب واصولها
واللي يبي ينثر من الماسه عقود=نسمع كلام الفاهمين العارفين
اللي يوقع بالهدف ما يرمعه=له بندق ترمي وتجدع جولها
وانا سعوديِ تحت حكم السعود=اهل العداله حاضرين وسابقين
وضحت مقصودي بقيفان اربعه=واعلنتها يالنايمين اصحولها
نايف بن مياس الفريدي

صح لسانك بن مياس
مشكوووووور والله يعطيك الف عافيه
دمت بود

صح لسان يابن مياس

والله يوفق الجميع

تحفظ على رد الذي يقول دمة بود اخي كلمة دمت بود فيهاااا اثم عظيم بارك الله فيكم

صح لسانك يا بن مياس على هذه الابيات

تسجيل مرور واعجاب

اخي الشاعر القدير / نايف بن مياس .

دام البقا واهلا ً هلا مثل الورود=يسوقها هجسي ولاله نيتين
نثر الدرر بارض البشر من يجمعه=وسط البحر وهضابها وسهولها
كل ٍ بفاله لا بغى ينقص يزود=والمسأله متعادله خشم ٍ وعين
قلب الهوى سالت مجاري مدمعه=بغيت أبين رمعتي واقولها

ولكن المجال تسري به الرحال في عالم الخيال ,
ولا أملك إلا أن أقول :

صح لسانك ,
وأفكارك ,
ودامت قوافيك .

صح لسانك يابن مياس
ولاهنت يالبناخي
تحيتي

صح السانك اخوووووي نايف على القصيدة الرائعه والجزلة ....تستاهل المجاراة هذه القصيدة

للجميع صح الله ابدانكمم واسف على التاخير
نواف
صح لسانك بيض الله وجهك على المجاراه لك الشكر

صح لسانك يا نايف تواجدك له رونق اخر
فأنت من ينثر الورود مع بقية احبتنا وشعرائنا وستضل
المجالس منبر للفرده ولن يكون هناك مايثير الشكوك بإذن
الله فالجميع هنا يعمل من اجل ذلك الاسم ..
تقبل وافر التقدير