أشقر العين لاتخاويه

أشقر العين لا تخاويه

بسم الله الرحمن الرحيم


هذه قصة حدثت في الزمان الماضي


كان رجل متزوج وعنده عيال والحال ضايق به ولا درا وش يسوي راح يدور شغل بين العربان ومن عرب ليا عرب حتى شاف بيت وحلال من بعيد
راح على البيت ولقى فيه رجل كبير بالعمر وما عنده أحد فقال له قصته والحال الي هو فيها فقرر الشايب انه يشتغل عنده الرجل ويعطيه مال .
جلس الرجل عند الشايب مدة 5 سنين وهو يشتغل ويرسل لأهل من غير ما يشوفهم وقرر انه يرجع لأهله. قال الشايب اقعد معي وخذ المعز والنعاج وانا آخذ الجديان والخرفان ( الذكور للشايب و الإناث للرجل ) فقال الرجل انا موافق وقعد عنده 5 سنين وبالحاله هذي صار غايب عن اهله 10 سنين وقرر انه يروح لاهله وقال الشايب اعطيك نص حلالي وخلك معي انا رجل كبير وما عاد لي حمل على الشغل وافق الرجل وقعد 5 سنين وفي الحاله هذي صار الرجل غايب عن هله 15 سنة .
بعدين قال الرجل ما عاد فيها خلاص ودي ارحل لـهلي فقال الشايب اقعد ... قال الرجل خلاص انا راحل قال الشايب طيب انا أبعطيك نصيحة وتعطيني ثلث حلالك وافق الرجل وقال الشايب ...
(( أشقر العين لا تخاويه ))
اقفى الرجل بعد ما اعطى الشايب ثلث حلاله وقبل ما يغيب الرجل عن عين الشايب نادى الرجل وقال يا فلان يا فلان ارجع ...

رجع الرجل وقال الشايب : اعطيك نصيحة وتعطيني الثلث الثاني من حلالك ؟
وافق الرجل وقال الشايب : (( لا تنام في بطن الوادي)).
تكدر الرجل وضاق صدره واقفى بعد ما اعطى الشايب الثلث الثاني من حلاله
وقال الشايب ارجع واقول لك نصيحة ثالثة وتعطيني الثلث اللي بقى من حلالك

ما وافق الرجل واقفى ومشى بالطريق مسيرة يوم .
وعند المغرب قال الرجل في نفسه انا كل هالحلال اللي معي من خير الله ثم من خيره
والله لأرجع له وخله يقول لي النصيحة الثالثة.

رجع الرجل للشايب وقال الشايب عرفت انك رح ترجع .
وقال النصيحة الثالثه : وهي
((( بيّت غضبك )))
اعطى الرجل الحلال الباقي ومشى في طريقه ما معه غير فرسه والنصايح اللي من الشايب.
ولقى في طريقه فارس وسأله عن طريقه وطلع طريقهم واحد
قعدوا وشبّو النار وتعشوا وشاف الرجل عين الفارس وطلعت شقره
تذكر الرجل نصيحة الشايب وقال للفارس أنا ارتاح إذا نمت بروحي
خذا فراشه الرجل وابعد وحط مكانه حجار وغطاهن وابعد يراقب الفارس
وفي وقت السحر قام الفارس وفتح قوسه وحط السهم بنص القوس ورمى فراش الرجل.
شاف الرجل هاللي شافه وانهزم وقال الحمد لله ثلث الحلال بنصيحة الشايب انقذت روحي.
ومشى حتى شاف قافله ورافقهم بالطريق وصلو عند وادي وقت العشاء خذو حلالهم وعبيدهم وناموا الحلال والعبيد على الجبل واهل القافله نامو في بطن الوادي .
تذكر الرجل وصية الرجل وقال ودي اعمل بها فنام مع العبيد .
وقاموا الصبح وما لقوا اهل القافلة السيل شالهم وقال الرجل الحمد لله الثلث الثاني من حلالي انقذ حياتي من الموت .
ومشو حتى وصل اهله في وقت متأخر من الليل واخذ في مقولة (( صابح القوم ولا تماسيهم ))
وقرب من بيته والا هذاك الفارس يقرب من البيت ترجل عن الفرس والرجل يناظر الفارس وهو يدخل على زوجته وقام الفارس وحب زوجت الرجل ونام قربها .
شاف الرجل المنظر هذا وطار عقله وقال لازم إني اذبحه .
وتذكر نصيحة الرجل الثالثة وقال الصياح رباح.
والصبح دخل على زوجته وقال يا خاينة ياللي ما صنتي عرضي قالت زوجته علامك يا فلان قال انا شفت اللي حصل أمس قالت يا فلان هذا ولدك العـود صار لك 15 سنة غايب عنا .

فضحك الرجل وقال 15 سنة خذيت بهن نصايح 3 من أفضل النصايح.


والنصايح الثلاث تعلمناها من هالقصة الجميلة.....


وسلامتكم ....

القديره
ميس الريم
هذا قديم الزمان النصائح تشترى اما الآن
للأسف حتى ببلاش ماتنبغى عاش قلمك ومانقل
ودمتى مبدعه كما عودتينا لله دركـ ميس الريم
تحيتي

مشكوره اختنا الفاضله القديره

اقتباس:
المشاركة الأصلية كتبت بواسطة غازى بن عجاب أبوزوايد
القديره
ميس الريم
هذا قديم الزمان النصائح تشترى اما الآن
للأسف حتى ببلاش ماتنبغى عاش قلمك ومانقل
ودمتى مبدعه كما عودتينا لله دركـ ميس الريم
تحيتي



كلام سليم في
هذا الزمان النصيحة مالها وكر ولا مقر في نفوس الناس
ولكن من أجدى جادت معه
أشكرك أخي غازي على المرور العطر
تقديري لك

اقتباس:
المشاركة الأصلية كتبت بواسطة ذعذاع الشمال
مشكوره اختنا الفاضله القديره


مشكور أخوي مرورك وتواجدك يسرني
تقديري لك

يعطيك العافيه اختي ميس
قصه رائعه كاروعة ناقلها
دمتي بخير

اقتباس:
المشاركة الأصلية كتبت بواسطة النمر الارقط
يعطيك العافيه اختي ميس
قصه رائعه كاروعة ناقلها
دمتي بخير



دمت أخي النمر مرورك يسرني
لك جل تقديري

الف شكر على الأضافه الرائعه

والقصه تنم عن الحكمه والصبر

ولكن لي صديق وعينه حمراء

ولكن الرجل طيب ماشفت منه الأ كل

خير !!

وين الي اليوم ينصح من قلب
مشكوره اختي ميس الريم

اقتباس:
المشاركة الأصلية كتبت بواسطة علي الجضعان
الف شكر على الأضافه الرائعه

والقصه تنم عن الحكمه والصبر

ولكن لي صديق وعينه حمراء

ولكن الرجل طيب ماشفت منه الأ كل

خير !!



مرورك أخي علي الجضعان
يدعونا نرد عليك بالمثل
انتبه لصديقك اللي عينه حمراء
يبدو ان تكون اشارة قف
لك جل تقديري على هذا المرور المرح
شكري الجزيل لك