مساجلة شعرية بين شاعرين مبدعين

الأخ وابن العم / علي بن عبدالله الطهيمي من الشعراء الذين قفزوا للصدارة في وقت وجيز وقبل ايام اتصلت به وطلبت منه بعض القصيد وواعدني خيراً ويوم امس في حفل زواج الأخ / محمد بن عليان الطهيمي طلبت منه قصيدة واحدة فأعطاني هذه القصيدة وهي "

مساجلة بينه وبين العقيد / عبدالله بن محسن المشيعلي الحربي

يقول في قصيدته

مني لبو ياسر بيوتن هدية = ولفعول عبدالله براهين وشهود
سلام ياحظرة عقيد السرية = اليا حظرت اتصير ضباطها جنود
تقضى علوم مدورين التحيه = تقل هيبتهم الليا صرت موجود
ونكانها بالمرجلة والحمية = تاخذ يابن محسن على غيرك الزود
لقيت ذودك بايمن الجندليه = ياحي هالك الذود واللي جنا الذود
وضحاً عليهن ياسمون الحنيه = ياحماهن الله من نظر كل مقرود
تقطف زماليق الفياض العذيه = وتقبل على مقهورها شمخ القود

فرد عليه العقيد / عبدالله بن محسن المشيعلي الحربي

حيا الله المهدي وحي الهديه=قافن عليه بالتماثيل مسنود
قاف الطهيمي يرفع المعنويه=ماهو غريب الجود من منبع الجود
من لابتن بالدين والجاهليه=عدوهم منهم على طول ملهود
وقفاتهم لضد ماهي خفيه=اولاد راشد لاعتزوا عزوة العود
تفخر بهم مسروح والسالميه=لاقام كلن بالجبر يطلب الزود
ربعي ونا منهم على كل هيه=وقفاتنا معهم مواريث وجدود
مريت ذودي يازبون الونيه =ياليتني عنده هاك اليوم موجود
انتم هل اللبل وانتم الاهليه=حلالكم مابه مشاريه ونقود
مادام وسمي من يمين محنيه=مالي عن الحربي مداريق وصدود
وكل الطراقي من جميع اللفيه=اللبل ترحب بالطراقي بلاحدود
طلبتكم ياحروب عودوا عليه=نبا وعد رسمي موثق وموكود
سجه لها بقلوبنا قابليه=تكفا قصدتك يابيض الوجه مقصود
قل تم ابا الميعاد ميه بميه=وازكى التحيه كل ماذعذع النود

================================

وتقبلوا تحياتي

بأذن الله سأعرض لكم قصائده تباعاً عن قريب

تقبلوا تحياتي

اسمح لي يالفريدي ان اكمل مساجلاتين على ماذكرت حيث شارك

الشاعر الكبير عبيد بن نهار والشاعر البدراني وهذه قصيدة

عبيد ابن نهار حيث جارا القصيدتين فقال :

جريت باعلى الصوت لي سامريـه=باعلى لحن صوتي ولاعندي قيـود
مانـي مقيـد والعلـوم النقـيـه=مادونها عن ذكرها حجز وسـدود
بين الطهيمي وابو ياسـر خويـه=عبدالله المحسن ذرا كـل مضهـود
الطيب والفزعـه بنفسـه سجيـه=ويمناه عن شح العطاء تعطي الجود
قلته ولو مـا مدعـي مـع دعيـه=ماينتجازا راعي البيـض بالسـود
حصل المجـال براعـي الشاذليـه=راع الوفاء والجود عن كل منقـود
خمسة عشر عام وانـا عسكريـه=راحت وكن سنينها شهـر معـدود
فعول ابـو ياسـر جـزال وجليـه=فعلٍ عليه شهود ومزكـي شهـود
من صلب من يارد حياض المنيـه=ربعٍ تقـود انفوسهـا للفنـا قـود
لاثارت الهيجاء صيـاح ضحويـه=يروون بالدم الحمـر كـل جالـود
والا هجـادٍ مـع ظـلام العشيـه=الله من جيبٍ هكـا الليـل مقـدود
غـفٍّ غفاغيـفٍ تطيـح مغشيـه=يبكن بكـا دمٍ علـى كـل مفقـود
يبكـن فرّيسـن وراحـم ضحيـه=واللي سلم منهم هكا اليوم مولـود
من فعـل منهـم لابتـه واهنيـه=بني عمر ومثبـت العلـم بوكـود

مجارات الشاعرالشاب/ مانع البدراني

مني لابـو مشعـل سـلام وتحيـه=يفوح من مضمونهـا أزرق العـود
واللي مدح شخـصٍ عزيـزٍ عليـه=المدح في راعيـه مايلـزم شهـود
عبـدالله اللـي يستحـق التحـيـه=نعمين فيـه وفيـك يامنبـع الجـود
مشاعلـه يـوم النقـاء والحمـيـه=افعالهـم تعـرف ليـا ثـار بـارود
أهـل الشجاعـه والعـزوم القويـه=متوارثين الطيب جـدٍ عـن جـدود
أعيال محسن أهل النفوس الرضيـه=زبن الضعيف اللي من الوقت مضهود
وابـوي وصانـي ولــزّم علـيـه=يقول رفقتهم تـرى مالهـا اقصـود
أهل الغلاء واهـل القلـوب النقيـه=اللي لهم علمٍ مـع النـاس محمـود
وصلوا على المختار خيـر البريـه=عداد ماهل المطـر واخضـر العـود

يوسف الطهيمي

منصور الوسوس



سلمت ايديكم على هالعلوم الطيبه....

بسم الله

ابو مالك
ابو محمد

مبدعين دائما في الذوق والاختيار

لاهنتما علمين شامخين

ويهولني قلة المارين من هنا!!!!!!!!!!!!!!!!!!!!!!!!!!!!!!!!!

لهذا مارأي اخوي بان يكون طرح المساجلات القويه في الخاص وبعد المرور عليها
انقلها انا الى المساجلات لانها اذا وضعت مباشرة هنا ظلم لجمالها
مارأيكما؟؟؟؟؟؟؟؟؟

الفريدي

سلمت يمينك وصح الله لسان الشاعرين علي الطهيمي وعبدالله المشيعلي

صدق ونقاوه ووفاء وشموخ

بيض الله وجهك ودمت على الخير والمحبه