رجيتك ياهنى عينن تمنت شوفتك ساعه

رجيتك ياهنى روحن تمنت شوفتك ساعه=ولا ذاقت بدرب العشق لامكسب ولا مربوح
انا قلبي على دربك شكى من لايعن لاعه=طبوعك ياهوى بالي طواريها تغث الروح
اخبر اللي يبي غاليه لاقال اسقني طاعه=وانا غادرتكم ضامي بقلبن ضايقن مجروح
رحلت بمركب احلامي تلوح الريح بشراعه=وموجات البحر تلطم على اللي يدخله ذابوح
هزيم رعودها يرجف وبرقه يركز اشعاعه=واذا ناظرت تبي سهيل ماهو بالنظر ملموح
غطاه اللي غطى قومن خدعها زين مرباعه=وتاليهم بقايا قوم ركبوا في سفينة نوح
اشوح الشوف بعيونن تحاول شوف مطلاعه=اراجي شوفة الشاطي او اريام الفلاة سروح
خفوقي ضاع بامواجه سبايب صاحبن باعه=ولايقدر يشوف الدرب لو برقه غدى له ضوح
عقب ماكنت والغالي بروضن فاح نعناعه=اشوف الموت يدعيني ولو شحت النواظر شوح
طرى لي وسط موجاته خدود الزين لاراعه=شعاع البرق ذكرني بمبسم وجهها المملوح
عيون اللي ورى الصيده رماح الموت باصباعه=يشيل الموت باصباعه اليا لاح الحبارى لوح
مراميع العرب كله قصارن دون مرماعه=واذا شاف الحباري راح تلقى خربهن مسدوح
عشيري من جميع البيض شال الزين بانواعه=طلبتك ترحمين اللي غرامه مايريد شروح
الا يامنوة الخافق وراس المال واطماعه=وسلوة عاشقن دمعه على خد العناء مسفوح
انا جيت الطبيب وحط فوق الصدر سماعه=وجاب الفحص والناتج خفوقن بالغلا مشفوح
وقال ان الظماير فات سبع شهور مرتاعه=وصدره كاتمن نارن من الضيقه غدى له فوح
تقول انه نهش حاله ذياب الجال وسباعه=او انه عاشقن غنجاء ولاكنه يخاف البوح
وقال ان الدواء رشفة ثنايا خفرتن ضاعه=عنودن مثل عين الريم حطتكم على الجابوح
وقلت اعلن خبر موتي على العالم بمذياعه=وقل موته سبب خشفن(( تروه بذبحنا مسموح))

منقوووووووول لكم من شعر البقعاوي

لاهنت بن مطيع على النقل والنشر.
وصح لسان البقعاوى
تحيتي

ابو فيصل شرفني مرورك الرائع والجميل