ديوان الشاعر نواف فارع الفريدي ( قصائد )

السلام عليكم ورحمة الله وبركاته

انه لشرف لي ان اضع بين ايديكم ديوان الشاعر الكبير

شاعر له نكهة بشعره شاعر متمرس بالشعر ويعتبرمن فحول الشعراء

له وجود بجميع المناسبات وله بصمات في كل موقف

وافي لجميع ربعه بكل مايملك

ولنا الفخر به وبشعره

انه الشاعر نواف بن فارع بن صنت بن طليحان الفريدي

ونبدا بهذه القصيدة وهي عبارة عن ابتهال

(ياالله على بابك يافتــّاح الابواب)=ياواحدٍ كلٍ وقف عند بابه
عبدك ولد عبدك معنــّى ومنصاب=أنت الكريم اللي رجينا جنابه
يــاالله يـاالمعبود يارب الارباب=عبدك ضعيف ويرتجي منك اجابه
تغفر وترحم واتهديني للاسباب=ماهمــّني جرحٍ تجدّد صوابه
يفهمني العاقل مع أصحاب الالباب=وإلا البشر فيها وفيها غرابه
(يالله يااللي من ترجاك ماخاب)=تشفي عليلٍ دنيته هي عذابه
مع العقارب هالني جــرّت الــدّاب=داب وعقارب ماتفيد العصابه
دنياً دنيه نجمها له زمن غاب=الوقت واحد والليالي تشابه
يــاحسام ابوك بدنيته عارضه شاب=راضي ... وماجاب القدر ياهلابه
مــاهي سوالف بــدّل احباب باحباب=لا بدّ مــاوقتك تحســّب حســابه
ياكم وكم يــاحسام ودّى ولاجاب=مكتوب والمكتوب مخفي كتابه
إفهم وانا ياابوك راضي بالاسباب=عبدٍ , ضعيفٍ , طامعٍ في ثوابه

ونتواصل معكم ومع شاعرنا بهذه القصيدة عندما ترشح محمد بن عبدالهادي الطميشا في الانخابات وكانت نتيجته الأول :

انتخابات البـلد نور وتكــاتف وش بعد=خير مع تطوير زد تطوير وافراح وسداد
ماشكينا من خلقنـا الله مـن هـم ونكـد=ننعم بخير وسعد من ربنـا رب العبـاد
ثم مساعي من على خير البلد جد ورصد=الحكومه حققت بامر الولي كـل المـراد
ياعسى المولى يحفظ المملكه عز ورغـد=كلنا اخوان بالمجلـس ويجمعنـا عيـاد
والجماعه كل ابوهم عندنـا فيهـم مسـد=لكن الترشيح سامي واحسن الجد اجتهـاد
مانفكر غيـر بالرفعـه وتطويـر البلـد=شامخين الروس والديره على كل البـلاد
نالت المقصود والمامول والحاسـد ركـد=وانبهر مما يشوف ولا لقـى أي انتقـاد
عاش ابومتعب كريم وعاش عمك يافهـد=وياعسى فاله من اللجنه تغاريـد الشـداد
من بعد مايكتمل تصويتنـا باكبـر عـدد=وانتفاخر بازدهار ٍ علمه العلـم الوكـاد
والصلاة اعداد من صلى وصام ومن زهد=للنبي الهاشمي خير البشـر دايـم مـداد

وهنا نواصل مع شاعرنا بهذه المناسبة حيث يقول

مناسبة هذه الأبيات :

كانت مسابقة بين عدد من الشعراء يقومون بالإجابة على عديد من الأسئلة , تلقى عليهم ويجاوبونها بأبيات من الشعر , وقام بعض الشعراء بالإجابة على كل سؤال

على حدة , وأحببت أن أجمع روابط الأبيات والأفكار في قالب واحد وقمت بالإجابة مجملة عليها كلها , وكانت الأسئلة كـالتـالي :


1- اسمك أو التعريف بشخصيتك أو التعبير عنها .
2-الوطن .
3-الأم .
4-الحب .
5-الليل .
6-البحر .
7-الغربة .
8-الفراق .
9-الخيانة .
10-صديق السوء .
11-الصديق الوفي .
12-الرجل إذا كان الشاعر رجل , المرأة إذا كانت الشاعرة امرأة .
13-متروك للشاعر الحرية لقول بيت أو بيتين فيما يشاء ..


وجاءت الأبيات التالية :

ياناشدٍ عنــّي .. وعن حالتي كيف=نوّاف بن فارع .. ولا بي خلافي
واعيش في ديرة هل الطيب والكيف=آل السعود اللي ذراهم لحافي
وضعيف عند أمي أنا دايم إضعيف=في قربها دايم لي الجو صافي
والله واكبر يا زمان المواليف=فيما مضى وقت الليال العجافي
يوم ٍ ليلي كلــّه يروح تصفيف=بنات فكري بين شاهي , وكافي
عند البحر ياما خذتنا السواليف=وأثر البحر يافي ولا هو بيافي
وبعده أعيش بغربتي وأسرح بطيف=أعيش في منفى ... ثمان ٍ رهافي
واثر الفراق اللي بغتنا مع الســِــيف=صدفه تفارقنا وضاع الزفافي
ماهي خيانه لكن الوضع ( تكليف)=إقبال* قبلي قال شيٍ خرافي
كــلــّــه من أصحاب الدسايس هل الزيف=أهل القشر وأهل النفوس الضعافي
وإلاّ صديق الضيق هو مدهل الضيف=وافي ويبقى طول الايام وافي
وعن البشر تقرا وتقرا تآليف=أحــدٍ قـــلـيــّـل عزم وأحدٍ سنافي
هاذي هي الدنيا وانا عندها ضيف =وادري أبرحل لو تطول الفيافي
ياابوبدر ولــّــى زمان التحاسيف=والصاحب الماخوذ خــلــّـه ,, عوافي
أنا حضرت وجبت كل التواصيف =ولاتهون الشامخات القوافي

وهنا شاعرنا يهدي قصيدة الى

هــذه الأبـيــات مـــهــداة إلى النقيب طيار / شافي بن فارع بن طليحان الفريدي .

اسعفينـي يـا معـان الـمـدح لــو لحـظـة زمــن=جيـت أبمـدح شافـي اللحظـات والعـد الـقـراح
هو زبون المدح وأهل المـدح واللـي لـه زبـن=شافي اللحظات .. والوقفات . وانوار الصباح
الـمـعـانـي والـمـكــارم لــــه لـحـالــه وقــفــن=ساعفـنـي يالمعـانـي واطلـقـن كـــل الـســراح
واشمخن فوق السحابه .. دام شاعركن ضمن=كــل مــن يسـمـع دلالاتـــه يلبـسـكـن وشـــاح
ماعتقـد غيـره يبـا يلبـس صفـاتـه لا .. ولــن=شـافـي المعـنـى ابـوفـارع عـلامـات الـنـجـاح
رايـــد الانـجــاز والتفـكـيـر ولــرايــه ثــمــن=لاعجـز غيـره عـن القمـه يبـا يـرقـى وطــاح
أسعفـه شافـي وقـال : أهـلاً هـلا إطلـب تـمـن=وانشـرح صـدر المعنّـى , يـا تباشيـر الفـلاح
شـافـي المعـنـى عـسـى ربــه يكافـيـه المـحـن=ويحفظه في حفظه الوافـي علـى درب الكفـاح

الشاعر ؛ نواف فارع

وهنا شاعرنا يواصل ابداعه

الطــيـــّــب يجبرك دائما ً لتقول نعم . هذه صفاتك ,

ولايحتاج لمدح أحد , ولا لأن تقول وتشرح للناس ماذا فعل ,

ولكنه أعني مشعل بن صالح بن مطيع سباق لفعل الجميل دائما ،

سمع بالأمس أبيات قلتها في أخوي شافي وكنت أقوله أنها خاصة , فقال , بعض الناس يمدح نفسه حتى في القنوات , مهو أخوه , ووجدته قد كتبها هنا في مجالسنا العامرة , ووجدت نفسي أنا أيضاً أكتب هذه الأبيات :

ابن مطيع اليا طرالي مشاريع=ماهو بلازم أتخذلي دراسه
آخذ بشور اللي له القاسي يطيع=مشعل ابوصالح حفيد الفراسه
ذكره يشجعني مع الناس تشجيع=من طيب ابوه وجد جده وساسه
من كان ساسه طيب ما والله يضيع=يزهاه طيب أصله وطيبه لباسه
توخروا بالله ياهل المراميع=لواثق الخطوه عطينا الرياسه
في خوة ابن مطيع لااشري ولاابيع=وابقى على خوة رفيقي حراسه
نعم الرفيق ومشعل ٍ ظلمة الريع=لاهان راسه صدق لاهان راسه

ومازال الابداع متواصل مع شاعرنا

هذه الأبيات لا يوجد لها تعليق , ومن باب الدعابة , والترفيه عن النفس , ليس إلاّ :

بعض العرب شكله تقل شكل عاجي=مريض قلب وعلّته مالها علاج
مدري يبي كرتير وإلاّ بواجي=وإلاّ يـبـيـله سمكره بايمن الصاج
يالله تخــلّص دورتي بانفراجي=واتحل دورات الليالي والاحراج
شكل المدرّب بس خرّب مزاجي=ولا جيت أدوّر للمشاكل والازعاج
لــكــنّ أباخذلي من الحـَــبّ باجي=واعطيه لامنــّــه بغى شي واحتاج
رخصه عمومي يامدير الكراجي=راحت فلوسي بين حــصـّه ومنهاج
ماجيت أدوّر عندكم للخراجي=خــلــّـك على وضعك معلــّم وكرباج
واحْــذر من أوقات المطر والعجاجي=ماتـوا بها يجي ثمانين حــجّــاج
وانا أبصبر يا وجيه الدجاجي=يالله تبدل ضيقة العبد بافراج

وهنا يزيد شاعرنا بالابداع بهذا المدح

يطيب لي أن أفخر بهامة من هــامــات ربــعــي
والمناسبة : أني إتصلت به مرّة من المرّات , وفي ثنايا حديثه قال : نواف لاأخفيك أني إذا سمعت بأن فريدي قد جرى عليه من أمور الدنيا شي أمسيت أعايشه نفس الهموم وأفعل لمساعدته ما بمقدوري فعله ,

الكل يعرف من أعني ، هو من كُنــٍّي بالعميد واشتهر بذيبان ولقٍّب أبوراكان أُورنس التاريخ ...

( أحــمــد بـن مــطــر الــعــود )

يــا العود والله لو مدحناك يـا العود=ماظنّتي نلحق جمايل فعولك
لكنّ أبكتبلك تعابير وردود=قبلي كثير من الملا صفّـقـولك
تعبير منهم عن كرمكم مع الجود=واحساس صادق عندهم عن وصولك
ذروة ســنــام المـجـد مـع بــاقــة ورود=مقدّمه منهم بيادي رسولك
وتنويه للقاصي ترى الدّرب مسدود=ردّد معي .. اللي مهولك يهولك
أحمد مطر نادر وقادر وبارود=وكل الصفات الســاميه من حمولك
كـفّيت مـع وفّيت واحــد عن وفــود=واطلق عيال الناس مــاهو بحولك
ترقى سنود وكل ما زادوا اتزود=حيّرتهم يا العود .. لاغاب زولك
تشهد لك أفعالك ويشهد لك جدود=وحتـّى بعيد الناس جوّ واشهدولك
إقبل تحيّاتي وشكري مع النــّود=مـادام بارض الطيب تصـهـل خيولك

وهنا مازال الابداع متواصل مع شاعرنا وبطريقة ثانية

توقعاتـي دايمـا ً صـح مـا اتخيـب=والـعــلــم لله والـتــوقــع كــهــانــه
ولاني بكاهن لكـن تخيـب وتصيـب=واخوانـنـا جـيـران مـثــل البـطـانـه
لكن ما دام الوضع شلهوب ورهيب=أكــيــد نـطـلــع مـالـنــا أي خــانــه
يـا كويتنـا يـا اخواننـا يـا لواعيـب=الله واكـبــر لـيـلــى دانــــه لــدانــه
يجي زمان ٍ ناخذ الكاس ونجيـب=حلـو المعانـي فـيـك يــا الديدحـانـه
الشـمـس لازم تلـطـع ولازم تغـيـب=لـنــا زمـــان .. وللمـعـنّـى زمـانــه
والله يـلــولا حشـمـتـي للـمـعـازيـب=لكسـر ثـلاثـه .. ثــم أقـسّـم ثمـانـه
واقنب قنيبك يا سهم وازهم الذيـب=اكــرر الـمـوضـوع والاسـطـوانـه
لكـن أبسهـج غثربـن ّ المشاريـب=متـسـاوي ٍ شعبانـهـم ورمضـانـه
عينتلـي ذيـبـان يــا منـبـع الطـيـب=يا حـي ّ ذكـره , بلّغـه فـي مكانـه
إنا على الوعد المسمى على الجيب=ناخـذ لـنـا فــر ّه ونـاقـف وزانــه
ونـردد الترحيـب ترحـيـب ترحـيـب=ونرجـي مـن الله دعمـنـا والاعـانـه

وهنا للغرام مع شاعرنا موقف

يامـفـاتـيـح الــغــلا .. ياجـمـاهـيـر الــغـــرام =صفقـوا للنايفـه .. واعلنـوا حـضـر القصـيـد
الـمـشـاعـر مـرهـفــه .. ياتـعـابـيـر الــكــلام=والمعـانـي كامـلـه .. جـيـت اغنيـهـا نـشـيـد
هي شروق الشمس لي .. هي تغاريد الحمام=جنّـة أيـام الحـيـاه .. والمكـاسـب والرصـيـد
قافـلات الشـوق لـي .. قـادهـا حـلـو الـزمـام=يشتكيـلـي شوقـهـا .. دم , شـريـان , وريــد
يامـنـظـمـة الــــدول .. يامـنـظـمـة الــســلام=الحبيبه حكمها .. فـي ( مُوناكـو والسويـد )
سجلوهـا باسمهـا .. فـي أحاسيـسـي وســام=لحظة ٍ مـن شوقهـا .. كنهـا لـي يـوم عيـد
حبي آيـات الجمـال .. ويـا بـلاد الشـام شـام=لا زعلـتـم مايفـيـد ..وإن رضـيـتـم مستـفـيـد
جايـز ٍ لـي حبهـا .. كـل عــام وكــل عــام=دايـمـاً تبـقـى مـنـاي وغيـرهـا يـبـقـى بـعـيـد

اخوى


ابو وسيم


صح لسان شاعرنا نواف فارع الفريدي ولاهنت يالذيب


النشر للجزل من قصيد ربعنا



تحيتي