اذا المراجل لبسة شماغ و عقال

اذا المراجل لبسة شمـاغ وعقـال
قل للعـذاري يلبسـن العمايـم

ماعاد يفرق زول حرمة ورجـال
دام الفعايل تشبه البعـض دايـم

المرجلة ماهيـب كلمـة وتنقـال
وتروح ماراحت هبوب النسايم

ولا خشونة صوت اورفع الاثقـال
او رزة صدور وفعل الزلايـم

ولاهي بعد مفتاح موتـر وجـوال
والا ردى لسانن حديثة شتايـم

المرجلة شيمه عن القيـل والقـال
رفيع نفسن حـر باجـو حايـم

المرجلة عقل وزن وزنـه جبـال
ودون العقل وش فرقنا والبهايم

يامسندي لومايل الوقت بـي مـال
ياولد أبويـه ياعظيـم العزايـم

يامعرب الجدين من العـم والخـال
يانخوة المفزوع وقت الهزايـم

المرجلة ياخوي هي طولـة البـال
هي العزم هي الصبر فالظلايـم

فيها الكـرم عـزة دلـه وفنجـال
فيهاالكرامه عن ردى الطبع شايم

والدين لامنه خـذا القلـب منـزال
مشى طريق الحق وابليس نايـم

ومن لاعرف ربه في طيب الحـال
لابد وقت الضيق بالهـم هايـم

حتى صلاتك مع جماعات ورجال
في خيرها ياخوي نعم الغنايـم

ولامن نصف ليلك قم صفي البـال
ياعظم اجرك بين ساجد وقايـم

ولامن رفع ربي له كل الاعمـال
حسن الذكر لاقالوا فلان صايـم

وخلك شريف القصد ياطيب الفـال
سوء المقاصد فالبيوت الهدايـم

واحذر تبيع النفس في دب الأنـذال
وتتبع خوي ابليس راع النمايـم

النفس خيل لـك اذا كنـت خيـال
ومن لاقوى نفسه قوته الهزايـم

ولاصرت ماتدري لوش انت رجال
والله خسارة فيك ذبـح التمايـم
راقتلي

صح لسانك ولسان شاعرها
تقبل مروري

النفس خيل لـك اذا كنـت خيـال
ومن لاقوى نفسه قوته الهزايـم

صح لسان الشاعر // وتسلم يمينك
النمر الأرقط
على ذا النقل

صح بدنك اخي طلال الحماد على مرورك العطر
لك ودي

تسلمين اختي ميس اشكرك على تواجدك العطر
لكي ودي

صح لسان الشاعر ولم قلمك اخوى النمر


تحيتي

صح بدنك اخي ابوفيصل
يعطيك العافيه على المرور الجميل
لك ودي

والدين لامنه خـذا القلـب منـزال
مشى طريق الحق وابليس نايـم

ومن لاعرف ربه في طيب الحـال
لابد وقت الضيق بالهـم هايـم

حتى صلاتك مع جماعات ورجال
في خيرها ياخوي نعم الغنايـم

ماراق لك الا الجزل يا النمر
سلمت ودمت على الاختيار الرائع
وصح لسان شاعرها وناقلها
تقبل مروري

مشكور اخي ابوحمد على المرور العطر
دمت