شبعنا من عناهم وارتوينا الشاعر حجاب بن عبدالله ابن نحيت

شبعنا من عناهم وارتوينا = وعند رسوم منزلهم بكينا
ونادينا وقلنا خبروهم = ترانا من محبتهم نعينا
ترانا من مفارقهم نحلنا = وكان فراقهم طول فنينا
إلي جيتوا منازلهم فقولوا = لهم بأقوالنا يا راحلينا
ترانا للذي قالوا سمعنا = وباللي هم بغوا منا رضينا
وكل شروطهم نقدم عليها = قدمنا بالذي فنوا علينا
وترانا عن مخالفهم رجعنا = وهوّنا عقب ما احنا عصينا
ترانا في محبتهم حفرنا = وسيسنا ومن فوقه بينينا
تحملنا الهوى حتى هلكنا =ولولا الحب ما والله لعينا
انا مدري ومن يدري متاهم= لنا عقب التعذب راحمينا
وكان انفوسنا زلت وعالت = واخطينا و كنا مذنبينا
فإنا للعفو منهم طلبنا = وفي حد القصاص معهم مشينا
حشالله ما نخطي عليهم =وان عدنا فإنا ظالمينا
وكان استبعدوا عنا وقفوا = وعافوا قربنا لما دنينا
ترانا ما نقاطع من وصلهم = نواصلهم ولوهم قاطعينا
نصافيهم على طول الليالي = ولو ماهم غدا كدراً وطينا
ولا والله ننسى لو تناسوا =على طول الليالي والسنينا
عساهم بالرضى لو عذبونا= نراهم بالنعيم مخلدينا
طووا عنا كتاب والوصل واحنا = بنبطي عن وصلهم ما طوينا